Ezekiyeli 31:1-18
-
Kugwa kwa Edjipito kuli ninga kugwa kwa muti utali wa mkungudza (1-18)
31 Mu gole laci 11, mwezi wacitatu, pa ntsiku yakuyamba ya mweziyo, Yahova adalewalewa nande pomwe kuti:
2 “Iwe mwana wa munthu, uza Farawo mambo wa Edjipito pabodzi na wanthu wace kuti:‘Kodi ndiwe wakundendemerana na mbani pa ukulu bwako?
3 Pakhana Msiriya omwe ni muti wa mkungudza* wa ku Lebanoni,Muti utali kwene-kwene wa mthambi zakudeka, omwe mthambi zacezo zikhana masamba yakugudira yomwe yakhacitisa mthunzi.Ntsonga yace ikhafika m’mitambo.
4 Mutiyo udakula kwene-kwene thangwe ra madzi ndipo madzi yakuzika yadacitisa kuti utalimphe.
Mikulo ya madzi idazungulira pa mbuto pomwe mutiyo ukhadabzalidwa;Migero ya madzi ikhathirizira miti yentse ya m’thengo.
5 Ndipopa udatalimpha kuposa miti yentse ya m’thengo.
Mthambi zace zidawanda zicitalimphaThangwe ra kuwanda kwa madzi yace.
6 Mbalame zentse zakudzulu zikhakonza bzitsa* mu mthambi zace,Bzirombo bzentse bza m’thengo bzikhabalira pantsi pa mthambi zace,Ndipo wanthu azinji wa mitundu yentse akhakhala m’mithunzi yace.
7 Mutiyo ukhadadeka ndipo kukula kwa mthambi zace kukhadadekambo,Pakuti mizi yace ikhapolika mpaka kukafika pomwe pana madzi mazinji.
8 Palibe muti munango wa mkungudza m’munda wa Mulungu omwe ungadandendemerana na umweyu.
Ndipo palibe muti wa junípero omwe ukhana mthambi zakundendemerana na za muti umweyu,Palibe muti wa platano* uli-wentse omwe ukhana mthambi ninga zace.
Ndipo palibe muti unango m’munda wa Mulungu omwe ungadandendemerana na kudeka kwace.
9 Ndaudekesa na masamba mazinji.Ndipo miti inango yentse ya mu Edeni, omwe ni munda wa Mulungu wacadidi, ikhaucitira njiru.’
10 “Tenepo, Yahova Mbuya Mkululetu walewa kuti: ‘Pakuti mutiyo watalimpha kwene-kwene mpaka ntsonga yace kufika m’mitambo ndipo wabzikuza thangwe ra kutalimpha kwace,
11 nin’dzaupereka m’manja mwa mtongi wamphanvu wa mitundu ya wanthu. Mwakusaya kupenukira, mtongiyo an’dzamulanga ndipo ine nin’dzamulamba thangwe ra bzinthu bzakuipa bzomwe adacita.
12 Wanthu wa mitundu inango omwe mbakuipa kwene-kwene, an’dzamugwesa ndipo an’dzamusiya m’mapiri, masamba yace yan’dzagwa m’bzigwa bzentse* ndipo mthambi zace zakutchoka zin’dzagwera m’mikulo yentse ya m’dzikolo. Wanthu wentse wa pa dziko la pantsi an’dzacoka pa mthunzi wace acimusiya yekha.
13 Mbalame zentse zakudzulu zin’dzakhala pa cimuti cakugwaco, ndipo bzirombo bzentse bza m’thengo bzin’dzakhala mu mthambi zace.
14 Bzimwebzi bzin’dzacitika kuti paleke kuwoneka muti utali pafupi na madzi ayai kucitisa ntsonga yace kufika m’mitambo, nakuti paleke kuwoneka muti wakuthiriziridwa bwino ucitalimpha mpaka m’mitambo. Pakuti miti yentse in’dzapfudzidwa, in’dzayenda pantsi pa dziko pabodzi na wana wa wanthu omwe akuyenda m’dindi.’*
15 “Yahova Mbuya Mkululetu walewa kuti: ‘Pa ntsiku yomwe mutiyu un’dzayendesedwa m’thenje,* ine nin’dzacitisa kuti wanthu alire. Ndipopa nin’dzampsinkha madzi yakuzika ndicifunga mikulo kuti madzi mazinji yaleke kufamba. Nin’dzacitisa ku Lebanoni kuti kukhale mdima thangwe ra iye ndipo miti yentse ya m’thengo in’dzafota.
16 Nin’dzacitisa mitundu ya wanthu kutetemera thangwe ra kugwa kwace, ndikadzamucitisa kupita m’thenje* pabodzi na wentse omwe akupita m’dindi,* ndipo miti yentse ya ku Edeni, miti yakudeka na yabwino ya ku Lebanoni, yentse yakuthiriziridwa bwino in’dzatsangalazidwa pantsi pa mataka.
17 Iwo an’dzapita naye pabodzi m’thenje,* wale omwe adaphedwa na xipada pabodzi na omwe akhamuthandizira omwe akhakhala mu mthunzi wace pakati pa mitundu ya wanthu.’
18 “‘Kodi ni muti uponi wa mu Edeni omwe ungandendemezeredwe na ulemerero na ukulu bwako? Tsono iwepo mwakusaya kupenukira un’dzagwesedwa pantsi pabodzi na miti ya ku Edeni mpaka pantsi pa mataka. Iwepo un’dzagona pakati pa wanthu wakusaya kucitidwa mgwatidwe* na wanthu omwe aphedwa na xipada. Bzimwebzi ni bzomwe bzin’dzacitikira Farawo pabodzi na wanthu wace wentse,’ walewa tenepo Yahova Mbuya Mkululetu.”
Mafala ya m'nyantsi
^ Ayai, “muti wa sedro.”
^ Ayai, “cisasira.”
^ Muti umweyu umbagumanika ku Síria, ku Palestina na ku Líbano.
^ Ayai, “m’magowa yentse.”
^ Ayai, “m’thenje.”
^ Ayai, “Seoli,” lomwe ni thenje la wanthu wentse. Onani Kafotokozedwe ka Mafala Manango.
^ Ayai, “Seoli,” lomwe ni thenje la wanthu wentse. Onani Kafotokozedwe ka Mafala Manango.
^ Ayai, “m’thenje.”
^ Ayai, “Seoli,” lomwe ni thenje la wanthu wentse. Onani Kafotokozedwe ka Mafala Manango.
^ Ayai, “sirkumsizau.”
