Ezekiyeli 32:1-32
32 Mu gole laci 12, mwezi waci 12, pa ntsiku yakuyamba ya mweziyo, Yahova adalewalewa nande pomwe kuti:
2 “Iwe mwana wa munthu, imba nyimbo yakulira pakulewa bza Farawo mambo wa ku Edjipito ndipo lewa kuti:‘Iwepo ukhali mphondolo yamphanvu pakati pa mitundu ya wanthu,Tsono wapfudzidwa,
Iwepo ukhali cirombo cikulu ca m’nyanza ucimbabvundulira mikulo yako,Ukhambabvundula madzi na minyendo yako, ucimbapswipiza mikulo.’
3 Yahova Mbuya Mkululetu walewa kuti:
‘Nin’dzakuthusira khokota wangu mwakuphatisa basa thimu la wanthu,Ndipo iwo an’dzakuphata na khokota wanguyo.
4 Nin’dzakuthusa pantsi,Ndipo nin’dzakusiya pa thengo.
Nin’dzacitisa kuti mbalame zentse zakudzulu zikumbuthe,Ndipo bzirombo bza m’thengo bza pa dziko lentse la pantsi, bzin’dzakhuta nyama yako.
5 Nyama yako nin’dzaithusa m’mapiri,Ndipo mthindi zako zakusala nin’dzazidzaza m’bzigwa.*
6 Nin’dzatotesa dziko la pantsi mpaka kufika m’mapiri na mulopa wakucoka m’thupi mwako,Ndipo mulopayo un’dzadzaza mikulo.’
7 ‘Iwepo ukadzapfudzidwa, nin’dzampsinkha kudzulu ndipo nin’dzacitisa nyenyezi zace kukhala mdima.
Nin’dzampsinkha dzuwa na mitambo,Ndipo mwezi un’dzawonesa lini ceza cace.
8 Thangwe ra iwepo, nin’dzacitisa mdima bzinthu bzentse bzomwe bzimbawonesa ceza kudzulu,Ndipo dziko lako nin’dzalimpsinkha na mdima,’ walewa tenepo Yahova Mbuya Mkululetu.
9 ‘Nin’dzaboneresa wanthu azinji mu mtima ndikadzayendesa wanthu wako ku ukapolo, kwa wanthu wa mitundu inango,Ku madziko yomwe iwepo umbayadziwa lini.
10 Nin’dzacitisa wanthu azinji kubonera mu mtima mwawo,Ndipo amambo wawo an’dzatetemera na mantha thangwe ra iwepo,
Inepano ndikadzaphatisa basa xipada yangu pamaso pawo.Iwo an’dzatetemera mwakusaya kulekeza
Ali-wentse an’dzacita mantha na moyo wace pa ntsiku yakuphedwa kwako.’
11 Pakuti Yahova Mbuya Mkululetu walewa kuti:
‘Xipada ya mambo wa ku Babiloniya in’dzabwera kwa iwepo.
12 Nin’dzacitisa kuti dziko lako lidzagwe na xipada za acikunda wamphanvu,Acikunda wakuipa kwene-kwene kuposa wa mitundu yentse.
Iwo an’dzamalisa kubzikuza kwa Edjipito ndipo wanthu wace wentse an’dzaphedwa.
13 Nin’dzapha bzifuwo bzace bzentse, bzomwe bzimbadya pafupi na madzi yace mazinji,Nzayo za wanthu ne njondo za bzifuwo zin’dzabvundulira lini pomwe madzi yamweya.’
14 ‘Pa nthaweyo, nin’dzacenesa madzi yace,Ndipo nin’dzacitisa kuti mikulo yace iyerere ninga mafuta ya azeite,’ walewa tenepo Yahova Mbuya Mkululetu.
15 ‘Ndikadzacitisa Edjipito kukhala matere yakusaya wanthu na dziko lakusaya cinthu,Ndikadzapha wanthu wentse wakukhala m’mwemo,Iwo an’dzadziwa kuti ine ndine Yahova.
16 Imweyi ni nyimbo yakulira ndipo kulewa cadidi, wanthu adzaiimba,Wana wacikazi wa mitundu ya wanthu an’dzaiimba.
An’dzaimba pakulewa bza Edjipito na pakulewa bza mitundu yentse ya wanthu,’ walewa tenepo Yahova Mbuya Mkululetu.”
17 Mu gole laci 12, pa ntsiku yaci 15 ya mwezi,* Yahova adalewalewa nande aciti:
18 “Iwe mwana wa munthu, lira thangwe ra mathimu ya wanthu wa ku Edjipito ndipo ulewe kuti iwo pabodzi na mitundu yamphanvu ya wanthu an’dzapolikira ku dziko la kunyantsi komwe an’dzakhala na wanthu wentse omwe adafa.*
19 “‘Kodi iwepo ukubziwona ninga udadeka kwene-kwene kuposa winango? Iwepo un’dzafa ndipo un’dzagona pabodzi na wanthu wakusaya kucitidwa mgwatidwe!’*
20 “‘Aedjipito afa pakati pa wanthu omwe aphedwa na xipada, iwo aphedwa na xipada. Atengeni pabodzi na thimu lawo lentse.
21 “‘Pantsi pa thenje,* acikunda wamphanvu an’dzalewalewa naye pabodzi na wale omwe ambamuthandiza. Kulewa cadidi, Aedjipito an’dzaphedwa na xipada ndipo an’dzapfudzidwa ninga wanthu wakusaya kucitidwa mgwatidwe.
22 Asiriya ali kumweko pabodzi na thimu lawo lentse. Mathenje yawo yali m’mbali mwawo ndipo wentse afa na xipada.
23 Mathenje yawo yali m’dindi* lakuzika ndipo thimu lawo liri m’mbali mwa thenje lawo. Wentsenewo adafa na xipada thangwe pomwe iwo akhana moyo, adacitisa mantha wanthu.
24 “‘Elamu ali kumweko pabodzi na thimu lace, m’mbali mwa thenje lace. Wentse wa iwo adafa na xipada, iwo adayenda pantsi ali wakusaya kucitidwa mgwatidwe, wale omwe akhacitisa mantha wanthu. Tsapano iwo an’dzacita manyazi pabodzi na wale omwe akuyenda m’dindi.*
25 Pakati pa anyakufa, adamukonzera mbuto yakugona pabodzi na thimu lace lentse, m’mbali mwa thenje lace. Wentsenewo alibe kucitidwa mgwatidwe ndipo adafa na xipada pakuti akhacitisa mantha wanthu. Iwo an’dzacita manyazi pabodzi na wale omwe akuyenda m’dindi.* Iye waikhidwa pakati na wanthu wakufa.
26 “‘Kumweko kuna Meseki na Tubali pabodzi na mathimu yawo. Mathenje yawo yali m’mbali mwawo.* Wentsenewo alibe kucitidwa mgwatidwe ndipo adafa na xipada, pakuti akhacitisa mantha wanthu.
27 Kodi an’dzagona lini pabodzi na acikunda wamphanvu wakusaya kucitidwa mgwatidwe omwe adafa, omwe adayenda m’thenje* pabodzi na bzifuzo bzawo bza nkhondo? Xipada zawo zin’dzaikhidwa kuntsi kwa misolo yawo ndipo pikado zawo zin’dzaikhidwa kuntsi kwa mafupa yawo,* pakuti acikunda wamphanvuwa akhacitisa mantha wanthu.
28 Tsono iwepo un’dzapfudzidwa pakati pa wanthu wakusaya kucitidwa mgwatidwe* ndipo un’dzagona pabodzi na wanthu omwe adaphedwa na xipada.
29 “‘Edomu ali kumweko na amambo wace pabodzi na akulu-akulu wace wentse. Napo kuti mbamphanvu, iwo apendesedwa pakati pa wanthu omwe adaphedwa na xipada. Iwo an’dzagona pabodzi na wanthu wakusaya kucitidwa mgwatidwe na omwe akuyenda m’dindi.*
30 “‘Kumweko kuna nduna zentse za* ku norte pabodzi na Asidoniyo wentse. Iwo adayenda m’dindi* na manyazi pabodzi na wanthu omwe adaphedwa, napo kuti akhacitisa mantha wanthu thangwe ra mphanvu zawo. Iwo an’dzagona ali wakusaya kucitidwa mgwatidwe pabodzi na omwe adaphedwa na xipada, ndipo an’dzacita manyazi pabodzi na wale omwe akuyenda m’dindi.
31 “‘Farawo an’dzawona bzinthu bzentsenebzi ndipo an’dzatsangalazidwa na bzinthu bzomwe bzidacitikira thimu lace. Farawo pabodzi na acikunda wace wentse an’dzaphedwa na xipada,’ walewa tenepo Yahova Mbuya Mkululetu.
32 “‘Pakuti iye adacitisa mantha wanthu, Farawo pabodzi na thimu lace lentse an’dzagona na wanthu wakusaya kucitidwa mgwatidwe pabodzi na omwe adaphedwa na xipada,’ walewa tenepo Yahova Mbuya Mkululetu.”
Mafala ya m'nyantsi
^ Ayai, “m’magowa.”
^ Pinango-pentse akulewa bza mwezi waci 12. Onani vesi 1.
^ Mafala yace caiyo: “an’dzapolikira m’dindi.”
^ Ayai, “sirkumsizau.”
^ Ayai, “Seoli,” lomwe ni thenje la wanthu wentse. Onani Kafotokozedwe ka Mafala Manango.
^ Ayai, “m’thenje.”
^ Ayai, “m’thenje.”
^ Ayai, “m’thenje.”
^ Pinango-pentse akulewa bza mambo wa Meseki na Tubali.
^ Ayai, “Seoli,” lomwe ni thenje la wanthu wentse. Onani Kafotokozedwe ka Mafala Manango.
^ Pinango akulewa bza acikunda omwe adapendesedwa pabodzi na maxipada yawo pa kulemekeza acikunda.
^ Ayai, “sirkumsizau.”
^ Ayai, “m’thenje.”
^ Ayai, “atsogoleri wentse wa.”
^ Ayai, “m’thenje.”
