Ezekiyeli 36:1-38
36 “Iwe mwana wa munthu, lewa profesiya ya bzinthu bzomwe bzin’dzacitikira mapiri ya Jirayeri kuti: ‘Imwe mapiri ya Jirayeri, bvani mafala ya Yahova.
2 Yahova Mbuya Mkululetu walewa kuti: “Nyamadulanthaka wakunyozani mwa kulewa kuti: ‘Ya, bziri bwino! Mpaka mapiri yakale-kale yakhala yathu!’”’
3 “Tenepo lewa profesiya yakuti: ‘Yahova Mbuya Mkululetu walewa kuti: “Pakuti iwo adakucitisani kukhala matere ndipo adamenyana namwe kucokera ku mbali zentse kuti mukhale utaka bwa wale omwe adapulumuka kucokera pa mitundu ya wanthu, pakuti wanthu akupitiriza kulewa bza imwepo na kukulewani kuipa,
4 ndipopa imwe mapiri ya Jirayeri, tetekerani mafala ya Yahova Mbuya Mkululetu, Yahova Mbuya Mkululetu akuuza mapiri, tumapiri tung’ono-tung’ono, mikulo na bzigwa,* matere yomwe yakukhalidwa lini na wanthu na mizinda yomwe idasiidwa yomwe idapambidwa icisinjiriridwa na wanthu omwe adapulumuka pakati pa mitundu ya wanthu yakuwazungulira.
5 Yahova Mbuya Mkululetu akulewa kuti: ‘Nin’dzalewalewa na ukali bwangu bzakugaka moto kwa wale omwe adapulumuka pakati pa mitundu ya wanthu na kwa Edomu wentse na wale omwe mwakukomedwa na mwakunyoza kwene-kwene ambalewa kuti dziko langu ndawo, kuti atenge dzikolo pabodzi na mbuto yakudyesera bzifuwo.’”’
6 “Tenepo lewa profesiya yakulewa bza dziko la Jirayeri ndipo uza mapiri, tumapiri tung’ono-tung’ono, mikulo na bzigwa kuti: ‘Yahova Mbuya Mkululetu walewa kuti: “Tetekerani! Ndinilewalewa mwa nyongo na mwaukali thangwe ra kunyoza komwe mitundu ya wanthu yakucitani.”’
7 “Tenepo, Yahova Mbuya Mkululetu walewa kuti: ‘Ndaimisa boko langu ndipo ndikulumbira kuti mitundu yapafupi in’dzanyozedwambo.
8 Tsono imwe mapiri ya Jirayeri, mun’dzakhala na mthambi ndipo mun’dzabalira bzisapo wanthu wangu Ajirayeri, pakuti iwo anibwerera mwakusaya kucedwa.
9 Ndipo ine ndinamwe pabodzi, nin’dzakuthandizani ndipo mun’dzalimidwa na kubzalidwa.
10 Nin’dzawanza wanthu wako, nyumba yentse ya Jirayeri, inde nyumba yentse, mizinda in’dzakhalidwa ndipo matere yan’dzamangidwa pomwe.
11 Inde, nin’dzawanza wanthu wako na bzifuwo bzako. Iwo an’dzawanda acikhala azinji. Nin’dzacitisa kuti mukhalidwe ninga kale, nin’dzacitisa kuti bzinthu bzikufambireni bwino kuposa kale ndipo mun’dzadziwa kuti ine ndine Yahova.
12 Nin’dzacitisa wanthu wangu Ajirayeri kukhala mwa imwepo ndipo iwo an’dzakutengani kuti mukhale wawo. Imwepo mun’dzakhala utaka bwawo ndipo wana wawo an’dzafa lini pomwe thangwe ra imwepo.’”
13 “Yahova Mbuya Mkululetu walewa kuti: ‘Pakuti iwo akukulewani kuti: “Iwepo ndiwe dziko lomwe limbapha wanthu ndipo umbacitisa wanthu wa mitundu yako kuleka kukhala na wana,”’
14 ‘ndipopa iwepo un’dzadya lini pomwe wanthu ne kucitisa wanthu wa mitundu yako kuleka kukhala na wana,’ walewa tenepo Yahova Mbuya Mkululetu.
15 ‘Nin’dzacitisa lini pomwe kuti wanthu wa mitundu inango akutukwane ne kukucitisa kuti upirire kunyozedwa na wanthu winango ndipo un’dzakhukhumudwisa lini pomwe wanthu wa mitundu yako,’ walewa tenepo Yahova Mbuya Mkululetu.”
16 Ndipo Yahova adalewalewa nande pomwe kuti:
17 “Iwe mwana wa munthu, pomwe nyumba ya Jirayeri ikhakhala m’dziko lawo, iwo adaipswipiza thangwe ra makhalidwe yawo na bzicito bzawo. Kwa ine, makhalidwe yawo yakhali yakupswipa ninga mkazi omwe ali ku mwezi.
18 Tenepo ndidawakhuthulira ciya cangu, thangwe ra kupha wanthu komwe adacita m’dzikolo na kupswipiza dzikolo thangwe ra bzifanikiso bzawo bzakunyantsa.*
19 Ndipopa ndidawabalalisira kwa wanthu wa mitundu inango ndipo ndidawabalalisira m’madziko manango. Ndipo ndidawatonga mwakubverana na makhalidwe yawo na bzicito bzawo.
20 Tsono pomwe iwo adafika kwa mitundu imweyi, wanthu adapswipiza dzina langu lakucena mwa kulewa bza iwo kuti: ‘Awa ni wanthu wa Yahova, tsono iwo adacoka m’dziko lace.’
21 Ndipopa nin’dzakhotcerera dzina langu lakucena, lomwe nyumba ya Jirayeri idapswipiza pakati pa mitundu yomwe iwo adayenda.”
22 “Na tenepo, uza nyumba ya Jirayeri kuti: ‘Yahova Mbuya Mkululetu walewa kuti: “Imwe wa m’nyumba ya Jirayeri, inepano nin’cita bzimwebzi sikuti thangwe ra imwepo, koma thangwe ra dzina langu lakucena lomwe imwepo mudalipswipiza pakati pa mitundu inango yomwe imwepo mudayenda.”’
23 ‘Inepano nin’dzacenesadi dzina langu likulu lomwe lidapswipizidwa pakati pa mitundu inango lomwe imwepo mudalipswipiza pakati pawo. Ndipo wanthu wa mitundu inango an’dzadziwa kuti ine ndine Yahova, ndikadzacenesedwa pakati panu pamaso pa mitundu inangoyo,’ walewa tenepo Yahova Mbuya Mkululetu.
24 ‘Nin’dzakucosani pakati pa mitundu inango na kukutsonkhanisani kucokera m’madziko yentse ndipo nin’dzakubwezerani m’dziko lanu.
25 Nin’dzakuwazirani madzi yakucena ndipo mun’dzakhala wakucena. Nin’dzacenesa kupswipa kwanu kwentse na ku bzifanikiso bzanu bzentse bzakunyantsa.
26 Nin’dzakupasani mtima upsa na makumbukidwe mapsa. Nin’dzacosa m’thupi mwanu mtima wakuuma ninga mwala ndicikupasani mtima wakufewa ninga nyama.*
27 Nin’dzaphatisa basa mphanvu yangu kuti ndicinje makumbukidwe yanu, nin’dzacitisa kuti mufambe mwakubverana na bzakutonga bzangu ndipo mun’dzabvera na kuteweza malamulo yangu.
28 Tenepo imwepo mun’dzakhala m’dziko lomwe ndidapasa makolo yanu yakale, mun’dzakhala wanthu wangu ndipo ine nin’dzakhala Mulungu wanu.’
29 “‘Nin’dzakupulumusani ku bzakupswipa bzanu bzentse, nin’dzacitisa kuti bzakudya bzibale kwene-kwene ndipo nin’dzakubwereserani lini njala.
30 Nin’dzacitisa kuti miti ibale bzisapo bzizinji ndipo nin’dzacitisambo kuti bzakudya bza m’munda bzibale kwene-kwene kuti muleke kupasidwa manyazi pakati pa mitundu inango thangwe ra njala.
31 Tenepo mun’dzakumbukira makhalidwe yanu yakuipa na bzicito bzanu bzakuipa ndipo mun’dzanyantsidwa thangwe ra bzakuphonya bzanu na bzicito bzanu bzakunyantsa.
32 Tsono dziwani ibzi: Ine ndikucita lini bzimwebzi thangwe ra imwepo, imwe wa m’nyumba ya Jirayeri, citani manyazi ndipo umidwani thupi thangwe ra makhalidwe yanu,’ walewa tenepo Yahova Mbuya Mkululetu.
33 “Yahova Mbuya Mkululetu walewa kuti: ‘Pa ntsiku yomwe nin’dzakucenesani ku bzakuphonya bzanu bzentse, nin’dzacitisa kuti mizinda ikhalidwe pomwe na wanthu ndipo matere yamangidwe pomwe.
34 Dziko lomwe likhali matere lomwe munthu ali-wentse akhaliwona pakupita na m’mwemo, lin’dzalimidwa.
35 Ndipo wanthu an’dzalewa kuti: “Dziko lomwe likhali matere lakhala ninga zunde la Edeni, mizinda yomwe ikhali matere ndipo ikhakhalidwa lini na wanthu na yakudzongeka, tsapano yamangidwa ndipo ikukhalidwa pomwe na wanthu.”
36 Ndipo wanthu wa mitundu inango omwe an’dzasala pakati panu, an’dzadziwa kuti ndine Yahova omwe ndamanga mbuto zomwe zikhadapfudzidwa na kubzala mbuto yomwe ikhali matere, ndine Yahova omwe ndalewa na kucita bzimwebzi.’
37 “Yahova Mbuya Mkululetu walewa kuti: ‘Kuthumizira bzimwebzi nin’dzabvuma kuti nyumba ya Jirayeri indikumbire kuti ndiwacitire ibzi: Kucitisa wanthu wawo kuwanda ninga mabira.
38 Ndipo mizinda yomwe ikhali matere in’dzadzala na wanthu, ninga wanthu wakucenesedwa, ninga mabira ya ku Jeruzalemu* pa nthawe ya phwando, ndipo an’dzadziwa kuti ine ndine Yahova.’”
Mafala ya m'nyantsi
^ Ayai, “na magowa.”
^ Mu Cihebereu falali pinango lingakhale likulewa bza “ndowe” ndipo limbaphatisidwa basa ninga fala lakunyoza.
^ Omwe ni mtima wakufulumiza kubvera malango ya Mulungu.
^ Ayai pinango, “ninga thimu la mabira mu Jeruzalemu yomwe yan’funa kuperekedwa ntsembe.”
