Ezekiyeli 37:1-28
37 Boko la Yahova likhali pa ine ndipo Yahova adandilamusa na mzimu wace, acindiikha pakati pa cigwa* comwe cikhadadzala na mafupa.
2 Iye adacitisa kuti ndifambe m’mwemo ndipo ndidawona kuti m’cigwamo mukhana mafupa mazinji ndipo yakhadauma kwene-kwene.
3 Iye adandibvunza kuti: “Iwe mwana wa munthu, kodi mafupaya yangakhale pomwe na moyo?” Ine ndidatawira kuti: “Yahova Mbuya Mkululetu, mun’dziwa ndimwepo.”
4 Tenepo iye adandiuza kuti: “Lewa profesiya yakulewa bza mafupaya, yauze kuti: ‘Imwe mafupa yakuuma, tetekerani mafala ya Yahova yakuti:
5 “‘Yahova Mbuya Mkululetu akulewa bza mafupamwe kuti: “Nin’dzakuikhani mphuwe kuti mukhale pomwe na moyo.
6 Nin’dzakuikhani mdzipe na nyama ndipo nin’dzakuikhanimbo khanda na mphuwe kuti mukhale pomwe na moyo. Ndipo mun’dzadziwa kuti ine ndine Yahova.”’”
7 Tenepo ndidalewa profesiya ninga momwe akhadandiuzira, pomwe ndidandomala kulewa profesiyayo, ndidayamba kubva baludya la kumenyana-menyana kwa mafupayo, ndipo mafupayo yadayamba kuphatana liri-lentse na linzace.
8 Patsogolo pace kudabwera mdzipe na nyama pa mafupayo ndipo kudabwerambo khanda padzulu pace, tsono yakhalibe mphuwe.
9 Patsogolo pace iye adandiuza kuti: “Lewa profesiya kuna mphepo, iwe mwana wa munthu, lewa profesiya ndipo uza mphepo kuti: ‘Yahova Mbuya Mkululetu walewa kuti: “Iwe mphepo,* bwera kucokera ku mphepo zinai ndipo ufulizire omwe adafawa kuti akhale pomwe na moyo.”’”
10 Tenepo ndidalewa profesiya ninga momwe akhadandiuzira. Mphepo idapita mwa iwo, adayamba kukhala na moyo aciima ndipo adakhala thimu likulu la anyankhondo.
11 Patsogolo pace iye adandiuza kuti: “Iwe mwana wa munthu, mafupaya ni nyumba yentse ya Jirayeri. Iwo akulewa kuti: ‘Mafupa yathu yauma, ndipo cidikhiro cathu camala, tentse tamala kupfudzidwa.’
12 Tenepo lewa profesiya yakulewa bza iwo kuti: ‘Yahova Mbuya Mkululetu walewa kuti: “Imwe wanthu wangu, nin’dzafungula mathenje yanu ndicikulamusani ku mathenje yanuyo ndipo nin’dzakuyendesani ku dziko la Jirayeri.
13 Imwe wanthu wangu, ndikadzafungula mathenje yanu ndicidzakulamusani m’mathenje yanuyo, imwepo mun’dzadziwa kuti ine ndine Yahova.”’
14 ‘Nin’dzaikha mzimu wangu mwa imwepo, mun’dzakhala pomwe na moyo ndipo nin’dzacitisa kuti mukhale m’dziko lanu. Na tenepo mun’dzadziwa kuti ndine Yahova omwe ndalewa na kucita bzimwebzi,’ walewa tenepo Yahova.”
15 Yahova adalewalewa nande pomwe kuti:
16 “Iwe mwana wa munthu, tenga mpsimbo ndipo uinembe kuti: ‘Kwa Djuda na kwa wanthu wa Jirayeri omwe anaye pabodzi.’* Ndipo tenga mpsimbo inango uciinemba kuti: ‘Kwa Zuze, mpsimbo ya Efraimu na wentse wa m’nyumba ya Jirayeri omwe anaye pabodzi.’*
17 Ukamala phatanidza mpsimbo ziwirizo kuti zikhale mpsimbo ibodzi m’manja mwako.
18 Wanthu wako akakubvunza kuti: ‘Kodi un’tiuza lini kuti bzimwebzi bzin’funa kulewa ciyani?’
19 Uwatawire kuti: ‘Yahova Mbuya Mkululetu walewa kuti: “Nin’dzatenga mpsimbo ya Zuze yomwe iri m’manja mwa Efraimu na madzinza ya Jirayeri yomwe yali pabodzi na iye ndipo nin’dzayaphatanidza na mpsimbo ya Djuda; nin’dzazicitisa kukhala mpsimbo ibodzi, ndipo mpsimbozo zin’dzakhala ibodzi m’manja mwangu.”’
20 Mpsimbo zomwe un’dzazinembazo zidzakhale m’manja mwako kuti iwo adzaziwone.
21 “Tenepo auze kuti: ‘Yahova Mbuya Mkululetu walewa kuti: “Nin’cosa Ajirayeri pakati pa mitundu inango yomwe adayendayo ndipo ndiniwatsonkhanisa kucokera m’mbali zentse ndiciwabweresa m’dziko lawo.
22 Nin’dzacitisa kuti iwo akhale mtundu ubodzi m’dzikolo m’mapiri ya Jirayeri ndipo wentse an’dzatongedwa na mambo m’bodzi basi. Iwo an’dzakhala lini pomwe mitundu miwiri ne maumambo mawiri.
23 Iwo an’dzapswipizidwa lini pomwe na bzifanikiso bzawo bzakunyantsa,* bzicito bzawo bzakuipa ne na bzakuphonya bzawo. Nin’dzamalisa kusaya kukhulupirika kwawo komwe adandicitira mwakundiphonyera ndipo nin’dzawacenesa. Iwo an’dzakhala wanthu wangu ndipo ine nin’dzakhala Mulungu wawo.
24 “‘“Mtumiki wangu Davide an’dzakhala mambo wawo ndipo wentse makabusa wawo an’dzakhala m’bodzi. Iwo an’dzafamba mwakubverana na malamulo yangu ndipo an’dzabvera bzakutonga bzangu.
25 Iwo an’dzakhala m’dziko lomwe ndidapasa mtumiki wangu Djakobo, dziko lomwe makolo yawo yakale yadakhalambo. An’dzakhala m’mwemo mpaka kale-kale, iwo, wana wawo na wana wa wana wawo ndipo mtumiki wangu Davide an’dzakhala mtsogoleri wawo* mpaka kale-kale.
26 “‘“Nin’dzacita nawo mpangano wa mtendere ndipo un’dzakhala mpangano wakusaya kumala. Nin’dzacitisa kuti akhazikike m’dzikomo nakuti awande kwene-kwene, ndipo nin’dzaikha templo yangu pakati pawo mpaka kale-kale.
27 Tendi langu* lin’dzakhala pakati pawo, ine nin’dzakhala Mulungu wawo ndipo iwo an’dzakhala wanthu wangu.
28 Templo yangu ikadzakhala pakati pawo mpaka kale-kale, mitundu ya wanthu in’dzadziwa kuti ine Yahova ndikucenesa Jirayeri.”’”
Mafala ya m'nyantsi
^ Ayai, “gowa.”
^ Ayai, “mphuwe.”
^ Ayai, “omwe mbanzace.”
^ Ayai, “omwe mbanzace.”
^ Mu Cihebereu falali pinango lingakhale likulewa bza “ndowe” ndipo limbaphatisidwa basa ninga fala lakunyoza.
^ Ayai, “nduna yawo.”
^ Ayai, “Nyumba yangu.”
