Ezekiyeli 38:1-23
38 Yahova adalewalewa nande pomwe kuti:
2 “Iwe mwana wa munthu, nyang’anisa Gogi wa dziko la Magogi, mtsogoleri mkulu wa* Meseki na Tubali ndipo lewa profesiya ya bzinthu bzakuipa bzomwe bzinimucitikira.
3 Lewa kuti: ‘Yahova Mbuya Mkululetu walewa kuti: “Iwe Gogi, mtsogoleri mkulu wa* Meseki na Tubali, ndikubwera kudzamenyana nawe.
4 Nin’dzacitisa kuti uzungunuke ndicikoloweka ntsagwada zako na medzo, ndipo nin’dzacitisa kuti ucoke pabodzi na acikunda wako wentse wamphanvu, makavalo na anyakupakira makavalo, wentse wakubvala bzakubvala bzakulemekezeka, thimu likulu la anyankhondo lomwe lina bzakukhotcera bzikulu-bzikulu na bzing’ono-bzing’ono,* ndipo wentsene an’dzakhala na maxipada.
5 Ndipo acikunda wa ku Persiya, Etiyopiya na Puti anawo pabodzi, wentse ana bzakukhotcera na makapaseti.
6 Gomeri na acikunda wace wentse, wanthu wa m’nyumba ya Togarima omwe ambakhala ku mphimpha zakutali za ku norte na acikunda wace wentse, inde wanthu azinji anawe.
7 “‘“Konzeka, konzekera iwepo pabodzi na acikunda wako kuti mukamenye nkhondo ndipo iwepo un’dzakhala mtsogoleri wawo.
8 “‘“Zikadzapita ntsiku zizinji iwepo un’dzacemeredwa. Kuphampha kwa magole iwepo un’dzapita m’dziko lomwe wanthu wace adabwerera pambuyo pakupulumuka ku xipada, omwe adatsonkhanisidwa pakati pa wanthu azinji acibweresedwa m’mapiri ya Jirayeri yomwe yakhadapfudzidwa kwa magole mazinji. Anyakukhala m’dziko limweri adabweresedwa kucokera pakati pa mitundu ya wanthu ndipo wentse akukhala mwakukhotcerereka.
9 Iwepo, acikunda wako wentse pabodzi na wanthu azinji omwe an’dzakuperekeza, un’dzabwera kudzamenyana nawo ninga conzi ndipo un’dzampsinkha dzikolo ninga mitambo.”’
10 “Yahova Mbuya Mkululetu walewa kuti: ‘Pa ntsiku imweyi, mu mtima mwako un’dzakumbuka kucita bzinthu bzakuipa.
11 Un’dzalewa kuti: “Nin’pita m’dziko la wanthu wakusaya kukhotcerereka. Ndiniyenda kukamenyana na wale omwe ambakhala mwakukhotcerereka na mwakusaya thupo liri-lentse. Wentsenewo ambakhala m’midzi yomwe iribe mimuro, bzakufungira ayai misuwo.”
12 Un’dzapita m’mwemo kuti ukapambe bzinthu bzizinji, ukapfudze mbuto zomwe zikhadapfudzidwa zomwe tsapano zikukhalidwa pomwe na wanthu ndipo ukapfudzembo wale omwe adatsonkhanisidwa pakati pa mitundu ya wanthu omwe akugwezeka cuma na bzinthu bzizinji ndipo akukhala pakati pa dziko.
13 “‘Xeba na Dedani, anyamalonda wa ku Tarisi na anyankhondo wace wentse an’dzakubvunza kuti: “Kodi iwepo un’dzapita m’dzikoli kuti upambe bzinthu bzizinji? Kodi watsonkhanisa anyankhondo wako azinji kuti utenge prata,* oro, cuma na bzinthu bzizinji?”’
14 “Tenepo iwe mwana wa munthu, uza Gogi profesiya yakuti: ‘Yahova Mbuya Mkululetu walewa kuti: “Pa ntsikuyo, pomwe wanthu wangu Ajirayeri an’dzakhala mwakukhotcerereka, kodi iwepo un’dzadziwa lini bzimwebzi?
15 Un’dzabwera kucokera kumbuto yako ku mphimpha zakutali za ku norte, iwepo pabodzi na wanthu wako azinji, wentse adapakira pa makavalo, omwe ni thimu likulu la anyankhondo na acikunda azinji.
16 Un’dzabwera kuti udzamenyane na wanthu wangu Ajirayeri ninga mtambo omwe umbampsinkha dziko, ndipo kuphampha kwa ntsiku zakumalizira, nin’dzakubweresa kuti udzamenyane na dziko langu, kuti mitundu ya wanthu idzandidziwe ndikadzabzicenesa pamaso pako mwakuphatisa basa iwepo Gogi.”’
17 “Yahova Mbuya Mkululetu walewa kuti: ‘Kodi ndiwepo lini ule omwe ndidakulewa m’mbuyomu mwakuphatisa basa atumiki wangu, aprofeta wa Jirayeri omwe kwa magole mazinji adalewa profesiya yakuti ungadadzabweresedwa kuti udzamenyane nawo?’
18 “‘Pa ntsikuyo, ntsiku yomwe Gogi an’dzapita m’dziko la Jirayeri ukali bwangu bukulu bun’dzagaka, walewa tenepo Yahova Mbuya Mkululetu.
19 Na nyongo yangu na moto wa ukali bwangu, inepano nin’dzalewalewa; pa ntsiku imweyo pan’dzacitika citeke-teke cikulu m’dziko la Jirayeri.
20 Thangwe ra inepano, ntsomba za m’nyanza, mbalame za kudzulu, bzirombo bza m’thengo na bzirombo bzentse bzakukwawa pa dziko la pantsi bzin’dzatetemera, ndipo wanthu pa dziko lentse la pantsi an’dzatetemerambo. Mapiri yan’dzagwesedwa, nkhomole zin’dzagumuka ndipo mimuro yentse in’dzagwa pa dziko.’
21 “Yahova Mbuya Mkululetu walewa kuti: ‘Nin’dzatumiza xipada m’mapiri yangu yentse kuti adzamenyane na Gogi ndipo mcikunda ali-wentse an’dzamenyana na mwanzace.
22 Nin’dzamutonga mwakuphatisa basa cisi* pabodzi na kupha wanthu, iye, acikunda wace pabodzi na wanthu wentse omwe akumuperekeza nin’dzawabvumbisira nvula yamphanvu, matalala, moto na enxofre.
23 Kulewa cadidi, nin’dzalatiza mphanvu zangu ndipo nin’dzawawonesa kuti ndine Mulungu wakucena na kubzidziwikisa pakati pa mitundu izinji, ndipo iwo an’dzadziwa kuti ine ndine Yahova.’
Mafala ya m'nyantsi
^ Ayai, “nduna ikulu ya.”
^ Ayai, “nduna ikulu ya.”
^ Bzimwebzi ni bzakukhotcera bzing’ono-bzing’ono bzomwe kawiri-kawiri bzikhanyamulidwa na anyakuthusa uta.
^ Ayai, “siriva.”
^ Ayai, “matenda.”
