Ezekiyeli 6:1-14
6 Yahova adalewalewa nande pomwe kuti:
2 “Iwe mwana wa munthu, zungunuka ucinyang’anisa mapiri ya Jirayeri ndipo ulewe maprofesiya ya bzomwe bziniwacitikira.
3 Ulewe kuti: ‘Imwe mapiri ya Jirayeri, bvani mafala ya Yahova Mbuya Mkululetu yakuti: Yahova Mbuya Mkululetu akulewa kuna mapiri, tumapiri tung’ono-tung’ono, mikulo na bzigwa kuti: “Ndikukubwereserani anyankhondo kuti adzamenyane namwe na xipada ndipo nin’dzapfudza mbuto zanu za padzulu.
4 Maguwa yanu ya ntsembe yan’dzagumulidwa, mbuto zanu zakutenthera bzakununtcirisa zin’dzapfudzidwa, ndipo nin’dzathusa wanthu wanu wakufa pamaso pa bzifanikiso bzanu bzakunyantsa.*
5 Nin’dzathusa anyakufa wa Jirayeri pamaso pa bzifanikiso bzawo bzakunyantsa, ndipo nin’dzamwaza mafupa yawo m’mbali mwa maguwa yawo ya ntsembe.
6 Mizinda in’dzapfudzidwa m’mbuto zentse zomwe mumbakhala, ndipo maguwa ya ntsembe yan’dzagumulidwa yaciphwanyidwa. Maguwa yanu ya ntsembe yan’dzagumulidwa yacipfudzidwa, bzifanikiso bzanu bzakunyantsa bzin’dzapfudzidwa, maguwa yanu yakutenthera bzakununtcirisa yan’dzagumulidwa, ndipo bzinthu bzomwe mudakonza na manja yanu bzin’dzapfudzidwa.
7 Wanthu omwe an’dzaphedwa an’dzagwa pakati panu, ndipo imwepo mun’dzadziwa kuti ine ndine Yahova.
8 “‘“Tsono nin’dzasiya winango, ndipo winango wa imwepo an’dzapulumuka ku xipada pakati pa mitundu ya wanthu mukadzabalalisidwa pa dziko la pantsi.
9 Ndipo wale omwe an’dzapulumuka an’dzandikumbukira pakati pa mitundu yomwe an’dzatengedwera ku ukapolo. Iwo an’dzazindikira momwe ndidasunamira thangwe ra mtima wawo wakusaya kukhulupirika* omwe udandipandukira na thangwe ra maso yawo yomwe yadafuna kwene-kwene* bzifanikiso bzawo bzakunyantsa. Iwo an’dzabva manyazi ndipo an’dzabva mseru na bzinthu bzentse bzakuipa na bzakunyantsa bzomwe adacita.
10 Iwo an’dzadziwa kuti ine ndine Yahova ndipo pomwe ndidawauza kuti nin’dzawabweresera tsoka ndiribe kundolewa papezi.”’
11 “Yahova Mbuya Mkululetu walewa kuti: ‘Womberani m’manja, menyani pantsi na nzayo zanu ndipo dandaulani bzinthu bzentse bzakuipa na bzakunyantsa bzomwe nyumba ya Jirayeri yacita, pakuti iwo an’dzafa na xipada, njala na cisi.*
12 Omwe an’dzakhala kutali an’dzafa na cisi, omwe an’dzakhala pafupi an’dzafa na xipada ndipo omwe an’dzaphonyedwa na bzinthu bzentsenebzi acisala, an’dzafa na njala; ndipo ciya cangu centse nin’dzatulira iwo.
13 Iwo an’dzadziwa kuti ine ndine Yahova, wanthu wawo wakufa akadzakhala pakati pa bzifanikiso bzawo bzakunyantsa, m’mbali mwa maguwa yawo ya ntsembe, mu tumapiri twentse tung’ono-tung’ono, pa ntsonga za mapiri yentse, pantsi pa miti yentse yakupswipirira na pantsi pa miti yomwe ina mthambi zikulu-zikulu pomwe iwo akhaperekera ntsembe zakununtcirisa, kuti aderekhese mitima ya bzifanikiso bzawo bzakunyantsa.
14 Nin’dzawafuthulira boko langu kuti ndiwalange ndipo dziko lawo lin’dzakhala matere, mbuto zentse zomwe iwo ambakhala zin’dzakhala matere kuposa dambo lomwe liri pafupi na Dibla. Ndipo iwo an’dzadziwa kuti ine ndine Yahova.’”
Mafala ya m'nyantsi
^ Mu Cihebereu falali pinango lingakhale likulewa bza “ndowe” ndipo limbaphatisidwa basa ninga fala lakunyoza.
^ Ayai, “waupombo ayai uputa.”
^ Ayai, “yomwe yadatewera mwa upombo ayai mwa uputa.”
^ Ayai, “matenda.”
