Lakuyenda kwa Filimoni 1:1-25
1 Ine Paulo, omwe ndiri m’kawoko thangwe ra kukhulupira Kristu Jezu, ndiri pabodzi na m’bale wathu Timotio ndipo ndikunembera Filimoni, nyabasa mwanzathu wakufunidwa,
2 Afiya mpfumakazi yathu, Arikipo mcikunda mwanzathu na gwere lentse lomwe limbatsonkhana kumui kwako:
3 Mukhale na kudeka mtima kukulu pabodzi na mtendere wakucokera kwa Mulungu Baba wathu na Mbuya wathu Jezu Kristu.
4 Nimbatenda Mulungu wangu nthawe zentse ndikambapemba na kukumbukira bza iwepo,
5 pakuti ndikupitiriza kubva bza cikhulupiro cako na lufoyi lomwe unalo kwa Mbuya Jezu na kwa anyakucena wentse.
6 Nimbapemba kuti cikhulupiro comwe umbalatiza, cikucitise kuzindikira bzinthu bzentse bzabwino bzomwe tinabzo mwa Kristu.
7 Pakuti ndidakondwa kwene-kwene na kutsangalazidwa pomwe ndidabva bza lufoyi lako, thangwe iwepo m’bale wangu, udatsangalaza mitima ya anyakucena.
8 Thangwe ra bzimwebzi, napo kuti ndinabo ufulu mwa Kristu bwakukuuza bzomwe un’funika kucita,
9 ndawona kuti bziri bwino kucita kukukumbira mwalufoyi, pakuti ine Paulo, ndine munthu wacikulire ndipo tsapano ndiri m’kawoko thangwe ra kukhulupira Kristu Jezu.
10 Nin’funa kukumbirira mwanangu Onezimo, omwe ndadzakhala babace pomwe ndiri m’kawoko* muno.
11 Pakuyamba, iye akhali lini wakufunika kwa iwepo, koma tsapano ngwakufunika kwa iwepo na inepano.
12 Inepano ndikumubwezera kwa iwepo, inde, iye ali pa mtima pangu caipo.*
13 Ndikhafuna kuti apitirize kukhala na inepano kuti ambanditumikire m’mbuto mwako, pomwe ndiri m’kawoko muno thangwe ra mafala yabwino.
14 Tsono ndikufuna lini kucita cinthu ciri-centse mwakusaya kubvumizidwa na iwepo, kuti cabwino ciri-centse comwe ungacite, uleke kucicita mwakukakamizika koma mwakucita kufuna na mtima wako wentse.
15 Pinango ndibzo bzomwe bzidamucitisa kubakacoka pang’ono, kuti akabwerera kwa iwepo udzakhaliretu naye mpaka kale-kale,
16 sikuti ninga kapolo basi koma ninga m’bale wakufunidwa, maka-maka kwa inepano, tsono kuposeratu inepano, kwa iwepo, pakuti iye ni kapolo na m’bale wako mwa Mbuya.*
17 Tenepo, penu umbandiwona ninga xamwali wako,* mutambire bwino ninga momwe ungadatambirira inepano.
18 Kuthumizira bzimwebzi, penu iye adakuphonyera cinthu ciri-centse ayai penu anawe mangawa, nin’dzakubwezera ndinepano.
19 Ine Paulo, ndikunemba tsambali na manja yangu, ndipo ndikulumbira kuti nin’dzakubwezera mangawa yaceyo. Tsono iwepo un’dziwa kuti unandembo mangawa ya moyo wako.
20 Inde m’bale, ndikufunikira thandizo lako mwakubverana na Mbuya; tsangalaza mtima wangu mwakubverana na Kristu.
21 Ndikutsimikiza kuti unibvuma kucita bzomwe ndikukumbirabzi, ndipopa ndikukunembera tsambali thangwe ndikudziwa kuti un’dzacita bzizinji kuposa bzomwe ndalewabzi.
22 Kuthumizira bzimwebzi, undikonzerembo mbuto kuti ndidzafikire, pakuti ndina cidikhiro cakuti nin’tsudzulidwa mwakubverana na mipembo yanu, ndicibwerera kwa imwepo.
23 Epafra, omwe ni mwanzangu m’kawoko muno mwakubverana na Kristu Jezu, akupereka kulimba,
24 ndipo Marko, Aristako, Dema na Luka omwe ni anyabasa anzangu, akuperekambo kulimba.
25 Kudeka mtima kukulu kwa Mbuya Jezu Kristu kukhale namwe, thangwe ra kubzipereka kwanu.
Mafala ya m'nyantsi
^ Mafala yace caiyo: “ndina makorenti.”
^ Ayai, “nimbamufuna kwene-kwene.”
^ Mafala yace caiyo: “mwa kuthupi na mwa Mbuya.”
^ Mafala yace caiyo: “mwanzako.”
