Genesesi 12:1-20
12 Yahova adauza Abulamu kuti: “Coka m’dziko lako, siya azibale wako na adzinza wa pai wako, ndipo uyende ku dziko lomwe nin’dzakulatiza.
2 Inepano nin’dzakucitisa kuti ukhale mtundu ukulu, nin’dzakusimba ndipo nin’dzacitisa kuti dzina lako libvekere ndipo wanthu wentse an’dzasimbidwa thangwe ra iwepo.
3 Nin’dzasimba omwe an’kusimba ndipo nin’dzatemberera omwe an’kutemberera. Kulewa cadidi, mabanja yentse pa dziko la pantsi yan’dzasimbidwa* thangwe ra iwepo.”
4 Tenepo Abulamu adafuluka ninga momwe Yahova akhadamuuzira ndipo Loti adayendambo naye pabodzi. Abulamu akhana magole 75 yakubadwa pomwe adafuluka ku Harani.
5 Abulamu adatenga mkazace Sarai, Loti, mwana wa m’bale wace, bzinthu bzentse bzomwe akhanabzo na anyabasa wentse omwe akhanawo ku Harani, ndipo iwo adacita ulendo bwakuyenda ku dziko la Kanani. Pomwe iwo adafika ku Kananiko,
6 Abulamu adagwata na m’dzikomo mpaka kukafika ku Sekemu, pafupi na miti mikulu-mikulu ya ku More. Pa nthawe imweyo, Akanani akhakhala m’dzikolo.
7 Patsogolo pace, Yahova adawonekera kwa Abulamu acimuuza kuti: “Nin’dzapasa dzikoli mbadwa zako.” Tenepo, Abulamu adamanga guwa la ntsembe pa mbuto yomwe Yahova adawonekera kwa iye.
8 Na kupita kwa nthawe, iye adafuluka kumweko aciyenda ku mphimpha za kumapiri, kumabvadzuwa kwa Beteli ndipo adamanga tendi lace kumweko. Beteli akhali kumadokero ndipo Ai akhali kumabvadzuwa kwace. Kumweko iye adamangira Yahova guwa la ntsembe ndipo adayamba kucemera dzina la Yahova.
9 Patsogolo pace, Abulamu adanyamula tendi lace acimbakhala m’mbuto zakusiyana-siyana kuyenda ku mphimpha ya ku Negebe.
10 Tsono m’dzikolo mudagwa njala ndipo Abulamu adapolikira ku Edjipito acikakhala kwa kanthawe,* thangwe njalayo ikhadalemwa kwene-kwene.
11 Pomwe akhadasala pang’ono kupita mu Edjipito, Abulamu adauza mkazi wace Sarai kuti: “Tetekera, ndikudziwa kuti iwepo ndiwe mkazi wakudeka kwene-kwene.
12 Tenepo Aedjipito akakakuwona, mwakusaya kupenukira iwo an’kalewa kuti: ‘Umweyu ni mkazace.’ Ndipo iwo an’kandipha ndipo an’kasiya iwepo na moyo.
13 Ndaphata minyendo, ukalewe kuti ndine nkhoswe yako kuti bzinthu bzindifambire bwino nakuti ndilekembo kuphedwa.”
14 Pomwe adandopita mu Edjipito, Aedjipitowo adawona kuti mkaziyo akhali wakudeka kwene-kwene.
15 Nduna za Farawo zidamuwonambo ndipo zidakauza Farawoyo momwe iye akhadekera. Mkaziyo adatengedwa ndipo adayendesedwa ku nyumba kwa Farawoyo.
16 Tenepo, Farawoyo adasamalira bwino Abulamu thangwe ra Sarai ndipo iye adamupasa mabira, ng’ombe, mabulu yacikazi ya yacimuna, anyabasa wacimuna na wacikazi na ngamira.
17 Tsono Yahova adagwesera cisi Farawo pabodzi na banja lace na atumiki wace thangwe ra Sarai mkazi wa Abulamu.
18 Tenepo, Farawo adacemera Abulamu acimubvunza kuti: “Thangwe ranyi wandicitira bzimwebzi? Thangwe ranyi ulibe kundiuza kuti umweyu ni mkazi wako?
19 Thangwe ranyi iwepo walewa kuti umweyu ni mpfumakazi yako? Inepano ndikhadasala pang’ono kumulowola kuti akhale mkazangu. Mkazako uyu. Mutenge uyende naye!”
20 Farawo adauza anyabasa wace kuti aperekeze Abulamu na mkazace kucoka mu Edjipitomo, ndipo iwo adawaperekeza na bzentse bzomwe akhanabzo.
