Genesesi 13:1-18
13 Patsogolo pace, Abulamu adacoka ku Edjipito aciyenda ku Negebe, iye, mkazace na bzentse bzomwe akhanabzo pabodzi na Loti.
2 Abulamu akhadadala kwene-kwene ndipo akhana bzifuwo bzizinji, prata na oro.
3 Pomwe akhacoka ku Negebe kuyenda ku Beteli, iye adakhala m’mbuto zakusiyana-siyana mpaka kufika komwe kukhana tendi lace pakati pa Beteli na Ai,
4 ku mbuto komwe iye akhadamanga guwa la ntsembe kule. Ndipo kumweko Abulamu adacemera dzina la Yahova.
5 Ndipo Loti, omwe akhafamba pabodzi na Abulamu akhanambo mabira, ng’ombe na matendi.
6 Tsono mbuto yomwe akhakhalayo ikhali ing’ono ndipo bzingadakwanisika lini kuti iwo apitirize kukhala pabodzi thangwe bzifuwo bzawo bzikhadawanda.
7 Bzimwebzi bzidacitisa kuti amakabusa wa Abulamu na amakabusa wa Loti ayambe kunesana. (Pa nthawe imweyi Akanani na Aperizi akhakhala m’dzikomo.)
8 Tenepo Abulamu adauza Loti kuti: “Ndaphata minyendo, ifepano tileke kunesana ndipo amakabusa wako na amakabusa wangu alekembo kunesana, pakuti ndife ubale bwathu.
9 Ndaphata minyendo, mbatimwazane. Iwepo ungasankhule komwe un’funa kukhala m’dziko lino; penu iwepo uniyenda kumadzere, inepano ndiniyenda kumadidi ndipo penu iwepo uniyenda kumadidi, inepano ndiniyenda kumadzere.”
10 Tenepo Loti adawona kuti cigawo centse ca Jordano mpaka ku Zoari cikhana madzi mazinji (pa nthawe imweyi Yahova akhanati kupfudza Sodoma na Gomora) ndipo cigawo cimweci cikhali ninga zunde la Yahova na dziko la Edjipito.
11 Loti adasankhula cigawo centse ca Jordano, ndipo adafulukira kumabvadzuwa kwa cigawoco. Tenepo iwo adamwazana.
12 Abulamu akhakhala ku Kanani tsono Loti akhakhala pafupi na mizinda ya m’cigawo ca Jordano. Pakumalizira pace, iye adadzakamanga tendi lace pafupi na mzinda wa Sodoma.
13 Tsono wanthu wa ku Sodoma akhali wakuipa kwene-kwene ndipo akhana pikado pamaso pa Yahova.
14 Pomwe Loti adasiyana na Abulamu, Yahova adauza Abulamuyo kuti: “Ndaphata minyendo, ima pomwe ulipo ndipo nyang’anisa ku norte na ku suli, kumabvadzuwa na kumadokero,
15 pakuti dziko lentse lomwe ukuwonali nin’dzakupasa iwepo na wana wako* kuti likhale utaka bwanu mpaka kale-kale.
16 Ndipo nin’dzacitisa kuti wana wako* awande ninga mcenga pa dziko la pantsi. Tenepo, penu munthu an’kwanisa kulewenga mcenga ndiye kuti bzin’dzakwanisikambo kulewenga wana wako.*
17 Tenepo, famba-famba m’dzikoli kuti udziwe khwankhwa lace na kutalimpha kwace, pakuti nin’dzalipereka kwa iwepo.”
18 Abulamu adapitiriza kukhala m’matendi. Na kupita kwa nthawe, iye adakakhala pakati pa miti mikulu-mikulu ya Mamire ku Hebroni ndipo kumweko iye adamangira Yahova guwa la ntsembe.
Mafala ya m'nyantsi
^ Mafala yace caiyo: “mbeu yako.”
^ Mafala yace caiyo: “mbeu yako.”
^ Mafala yace caiyo: “mbeu yako.”
