Genesesi 15:1-21
15 Patsogolo pace, Abulamu adabva fala la Yahova m’masomphenya lomwe lidati: “Leka kugopa Abulamu. Inepano nin’dzakukhotcerera* ndipo iwepo un’dzatambira mabaibai makulu.”
2 Abulamu adatawira kuti: “Yahova Mbuya Mkululetu, kodi mun’dzandipasa ciyani ine? Onani, mpaka pano ndikalibe mwana ndipo Eliyezeri wa ku Damasko ndiye omwe an’dzatenga bzinthu bzangu bzentse ninga utaka.”
3 Abulamu adathumizira kuti: “Mulibe kundipasa mwana* ndipo nyabasa wangu ndiye omwe an’dzatenga bzinthu bzangu bzentse ninga utaka.”
4 Tsono Yahova adamutawira kuti: “Nyabasa wakoyo an’dzatenga lini bzinthu bzako ninga utaka, koma mwana wako caiye ndiye omwe an’dzatenga bzinthu bzentse ninga utaka.”
5 Tenepo, Mulungu adauza Abulamu kuti acoke panja ndipo adamuuza kuti: “Ndaphata minyendo, nyang’anisa kudzulu ndipo lewenga nyenyezi zomwe ziri kudzuluku penu ungakwanise.” Ndipo adathumizira kuti: “Wana wako* an’dzawanda ninga nyenyezi zomwe ukuwona kudzuluzi.”
6 Abulamu adakhulupira Yahova ndipo bzimwebzi bzidacitisa kuti Mulungu amuwone kuti ngwakulungama.
7 Ndipo iye adathumizira pomwe kuti: “Inepano ndine Yahova, omwe ndidakucosa m’dziko la Uri wa Akalideya kuti ndidzakupase dzikoli ninga utaka bwako.”
8 Tenepo Abulamu adabvunza kuti: “Yahova Mbuya Mkululetu, kodi ningatsimikize tani kuti dzikoli lin’dzakhaladi langu?”
9 Iye adamutawira kuti: “Tenga phandauzi wa magole matatu, mbuzi ikazi ya magole matatu, bira wa magole matatu, njiwa ing’ono na nkhangaiwa ing’ono.”
10 Tenepo, iye adatengadi bzentsenebzo acibzigwata kati na kati, ndipo adaikha mbali iri-yentse mwakunyang’anizana na inzace,* koma alibe kugwata mbalamezo.
11 Tenepo, mbalame zomwe zimbadya nyama zidayamba kumbutha pa nyama ya bzifuwo bzomwe bzikhadaphedwabzo, tsono Abulamu akhazithotha.
12 Pomwe dzuwa likhamira, Abulamu adagona tulo twamphanvu ndipo mdima wakupasa mantha udamupsinkha.
13 Patsogolo pace, Mulungu adauza Abulamu kuti: “Dziwa kuti wana wako* an’dzakakhala ninga alendo ku dziko lomwe ndawo lini ndipo wanthu wa kumweko an’dzawayesa akapolo, aciwaboneresa kwa magole 400.
14 Koma nin’dzapasa nyathwa mtundu omwe iwo an’dzautumikirayo ndipo patsogolo pace iwo an’dzacoka na bzinthu bzizinji.
15 Tsono iwepo un’dzafa* mwa mtendere ndipo un’dzapendesedwa pomwe wakalamba kwene-kwene.
16 Tsono m’badwo wacinai wa wana wakowo ndiwo omwe un’dzabwerera kuno, thangwe nthawe yakuti Aamori alangidwe ikanati kukwana.”*
17 Ndipo pomwe dzuwa lidamira kuciyamba kucita mdima, kudabwera forno yomwe ikhacoka utsi ndipo ntsatso wa moto udapita na pakati pa nyama zomwe zikhadagwatidwa-gwatidwa zire.
18 Pa ntsiku imweyi, Yahova adacita mpangano na Abulamu mwa kumuuza kuti: “Nin’dzapereka dzikoli kwa wana wako,* kuyambira ku mkulo wa ku Edjipito mpaka ku mkulo ukulu, omwe ni mkulo wa Eufrate.
19 Nin’dzawapasa dziko la Akeni, Akenezi, Akadimoni,
20 Aheti, Aperizi, Arefaimu,
21 Aamori, Akanani, Agirigasi na Ajebusi.”
Mafala ya m'nyantsi
^ Mafala yace caiyo: “Inepano nin’dzakakhala cakukhotcerera cako.”
^ Mafala yace caiyo: “mbeu.”
^ Mafala yace caiyo: “mbeu yako.”
^ Ayai, “adaikha mbali iri-yentse patsogolo pa inzace.”
^ Mafala yace caiyo: “mbeu yako.”
^ Mafala yace caiyo: “un’dzayenda kuna abereki wako.”
^ Ayai, “thangwe pikado za Aamori zikanati kufika kuti alangidwe.”
^ Mafala yace caiyo: “mbeu yako.”
