Genesesi 24:1-67
24 Abulahamu akhadakalamba ndipo akhana magole mazinji ndipo Yahova akhadamusimba pa bzentse.
2 Abulahamu adauza nyabasa wace omwe akhali mkulu kwene-kwene pamui pacepo ndipo akhalimbo nyakunyang’anira wa bzinthu bzace bzentse kuti: “Ndaphata minyendo, ikha boko lako kuntsi kwa ntcafu yangu
3 ndipo lumbira m’dzina la Yahova Mulungu wa kudzulu na Mulungu wa pa dziko la pantsi, kuti un’tengera lini mwana wangu Izaki mkazi pakati pa wana wacikazi wa Akanani omwe ndikukhala pakati pawo m’dziko lino.
4 M’mbuto mwace, ndoko ku dziko langu komwe kuna adzinza wangu ndipo ukatengere mkazi mwanangu Izaki kumweko.”
5 Tenepo nyabasayo adabvunza Abulahamu kuti: “Tsono tani penu mkaziyo an’kalamba kubwera nande kuno? Kodi ndidzamutenge mwana wanuyu ndiciyenda naye ku dziko lomwe mudacokera?”
6 Pamwepo Abulahamu adamutawira kuti: “Ne, uwonesese kuti uleke kudzatenga mwana wangu uciyenda naye kumweko.
7 Yahova Mulungu wakudzulu, omwe adandicosa kumui kwa pai wangu na kwa adzinza wangu na omwe adandiuza kuti: ‘Nin’dzapasa dziko lino wana wako,’* an’dzatumiza anjo wace aciyenda kutsogolo kwako ndipo kulewa cadidi iwepo un’katengeradi mwana wangu Izaki mkazi kumweko.
8 Tsono penu mkaziyo an’kalamba kubwera nawe, iwepo un’dzatsudzuka ku lumbiro limweri. Koma leka kutenga mwana wanguyu ucidzayenda naye kumweko.”
9 Tenepo nyabasa wa Abulahamuyo adaikha boko lace kuntsi kwa ntcafu ya Abulahamu mbuya wace acilumbira kwa iye pa nkhani imweyi.
10 Tenepo nyabasayo adatenga ngamira 10 na bzinthu bzabwino bzakusiyana-siyana bza mbuya waceyo. Patsogolo pace, iye adacita ulendo bwakuyenda ku Mezopotamiya ku mzinda wa Nawori.
11 Pomwe iye adafika pa mcera wa madzi kunja kwa mzindayo, iye adacitisa kuti ngamira zigodame pamwepo. Kukhali kumaulo, nthawe yomwe akazi akhacoka mu mzindamo kuyenda kukatunga madzi.
12 Patsogolo pace iye adati: “Yahova Mulungu wa mbuya wangu Abulahamu, ndaphata minyendo, citisani kuti bzinthu bzindifambire bwino lero ndipo latizani lufoyi lanu lacadidi kwa mbuya wangu Abulahamu.
13 Ndaima pa mcera pano ndipo atsikana wa mu mzindamu akubwera kudzatunga madzi.
14 Bzicitike kuti mtsikana omwe ndimuuze kuti: ‘Ndipasembo madzi yakumwa,’ ndipo iye acitawira kuti: ‘Mwani ndipo nin’tungirambo madzi ngamira zanuzi kuti zimwe,’ umweyo akhale mtsikana omwe mwasankhulira mtumiki wanu Izaki. Mukacita bzimwebzi, nin’dziwa kuti mwalatiza lufoyi lacadidi kwa mbuya wangu.”
15 Akanati kumala kulewalewa, Rabeka adabula mu mzindamo na mtsuko wace pa phewa. Rabeka akhali mwana wa Betuweli ndipo Betuweliyo akhali mwana wa Milka mkazi wace wa Nawori, omwe akhali m’bale wace wa Abulahamu.
16 Mtsikanayo akhali wakudeka kwene-kwene, akhali dende ndipo akhanati kugona na mwamuna. Tenepo iye adapolika ku mcera kule, adatunga madzi mu mtsuko mwace acicoka kumweko.
17 Pa nthawe imweyoletu, nyabasa wa Abulahamuyo adamuthamangira acimuuza kuti: “Ndaphata minyendo, ndipasembo madzi ya mu mtsuko wakoyu ndimwembo pang’ono.”
18 Rabeka adatawira kuti: “Mwani mbuya wangu.” Tenepo iye adatula mtsuko waceyo mwakamfulumize aciupendesa ndipo nyabasayo adamwa.
19 Pomwe adamaliza kupereka madziyo, Rabeka adati: “Nin’tungirambo madzi ngamira zanuzi mpaka izo kukhondwa.”
20 Mwakamfulumize iye adakhuthula madzi yomwe yakhali mu mtsuko mwace yale m’mwadiya* mwakudyera bzifuwo. Patsogolo pace, iye adathamanga mwakubwereza-bwereza kukatunga madzi pa mcera pale, mpaka ngamira zentse za mulendoyo kumwa zicikhondwa.
21 Pa nthawe yentseneyi, mwamunayo akhadanyamala ndipo akhamunyang’anisa mwakudabwa, acimbabzibvunza penu Yahova akhadacitisa kuti bzinthu bzimufambire bwino pa ulendo bwacebo ayai ne.
22 Pomwe ngamirazo zidamala kumwa madziyo, mwamunayo adamupasa mphete ya pamphuno ya oro yomwe ikhalemera metade ya siklo* na pulsera* ziwiri za oro zakulemera masiklo* 10.
23 Patsogolo pace iye adamubvunza kuti: “Ndaphata minyendo, ndiuze, kodi ndiwe mwana wa yani? Kodi kumui kwa pai wako kuna mbuto kuti tingakagonembo?”
24 Iye adamutawira kuti: “Ndine mwana wa Betuweli ndipo pai wangu ni mwana wa Milka na Nawori.”
25 Ndipo iye adathumizira kuti: “Tina cakudya cizinji ca bzifuwo pabodzi na mbuto yakugona.”
26 Tenepo mwamunayo adagodama, acitsulimisa nkhope yace mpaka pantsi pamaso pa Yahova
27 aciti: “Atumbizidwe Yahova Mulungu wa mbuya wangu Abulahamu, pakuti iye alibe kusiya kulatiza lufoyi lace lacadidi na kukhulupirika kwace kwa mbuya wangu. Yahova wanditsogolera mpaka kumui kwa adzinza wa mbuya wangu.”
28 Tenepo mtsikanayo adathamanga aciyenda kukauza bzinthu bzimwebzi mai wace na wanthu winango.
29 Rabeka akhana nkhoswe yace yakucemeredwa Labani. Tenepo Labani adathamanga kuyenda ku mcera komwe kukhana munthu ule kunja kwa mzindayo.
30 Iye adathamangira kumcerako thangwe adawona mphete ya pamphuno ire na pulsera ku boko kwa mpfumakazi yace, acibvambo mafala ya mpfumakazi yace Rabeka pomwe akhalewa kuti: “Mwamunayo wandiuza bzakati-bzakati.” Tenepo iye adayenda kukagumana na mwamunayo ndipo adakamugumana adaima na ngamira zace pamcerapo.
31 Pomwe adamuwona, iye adati: “Bwerani imwe wakusimbidwa na Yahova. Thangwe ranyi mudaima kunja kuno? Inepano ndakonza kale mbuto kumuiku, ya imwepo na ngamira zanuzi.”
32 Tenepo munthuyo adayenda acikapita m’nyumbamo ndipo Labani adatsudzula mitolo yomwe ikhali pa ngamirazo ndipo adazipasa cakudya. Iye adatengambo madzi acipasa mulendo ule kuti asambe m’minyendo pabodzi na wentse omwe akhanaye pabodzi.
33 Tsono pomwe adamupasa cakudya kuti adye, iye adati: “Inepano nin’dya lini mpaka ndilewe bzomwe ndabwerera.” Tenepo Labani adati: “Lewani.”
34 Tenepo iye adati: “Ndine nyabasa wa Abulahamu.
35 Yahova wasimba kwene-kwene mbuya wangu ndipo awadaza mwa kuwapasa mabira, ng’ombe, prata, oro, anyabasa wacimuna na wacikazi, ngamira na mabulu.
36 Kuthumizira bzimwebzi, Sara mkazi wa mbuya wangu adawaberekera mwana wacimuna pomwe adakalamba ndipo mbuya wanguwo an’dzapasa mwanayo bzentse bzomwe anabzo.
37 Tenepo mbuya wangu adandicitisa kulumbira kuti: ‘Leka kutengera mwana wangu Izaki mkazi pakati pa wana wacikazi wa Akanani omwe ndikukhala pakati pawo m’dziko lino.
38 M’mbuto mwace, ndoko kumui kwa pai wangu na kwa adzinza wangu ndipo katengere mwana wangu mkazi kumweko.’
39 Tsono inepano ndidabvunza mbuya wangu kuti: ‘Tsono tani penu mkaziyo an’kalamba kubwera nande kuno?’
40 Mbuya wangu adanditawira kuti: ‘Yahova omwe nimbamutumikira an’tumiza anjo wace kuti ayende nawe pabodzi, ndipo iye an’dzacitisa kuti bzinthu bzikufambire bwino pa ulendo bwako, ndipo iwepo ukatengere mwana wangu Izaki mkazi kwa adzinza wangu na kumui kwa pai wangu.
41 Iwepo un’dzatsudzuka ku lumbiro lomwe wacitali ukayenda kwa adzinza wangu ndipo iwo nkukalamba kukupasa mkaziyo. Na bzimwebzi un’dzatsudzuka ku lumbiroli.’
42 “Pomwe ndafika pa mcera pale lero, inepano ndalewa kuti: ‘Yahova Mulungu wa mbuya wangu Abulahamu, penu mun’citisa kuti bzinthu bzindifambire bwino, pacitike ibzi:
43 Mtsikana omwe abwere pa mcera pomwe ndaima pano kudzatunga madzi, ndicimuuza kuti, “Ndaphata minyendo, ndipasembo madzi ya mu mtsuko wakoyu ndimwembo pang’ono,”
44 ndipo iye acitawira kuti, “Mwani, ndipo nin’tungirambo madzi ngamira zanuzi kuti zimwe,” umweyo akhale mkazi omwe imwepo Yahova mwasankhulira mwana wa mbuya wangu.’
45 “Tsono pomwe ndikhanati kumala kupemba ca mu mtima, ndawona Rabeka akubwera na mtsuko wace paphewa ndipo iye wapolikira ku mcera aciyamba kutunga madzi. Patsogolo pace ndamuuza kuti: ‘Ndaphata minyendo, ndipasembo madzi ndimwe.’
46 Tenepo iye watula mtsuko omwe ukhali paphewa pace mwakamfulumize acindiuza kuti: ‘Mwani, ndipo nin’tungirambo madzi ngamira zanuzi.’ Inepano ndamwa madziyo ndipo iye watungirambo madzi ngamirazo.
47 Patsogolo pace ndamubvunza kuti, ‘Kodi ndiwe mwana wa yani?’ Iye wanditawira kuti ‘Ndine mwana wa a Betuweli ndipo pai wangu ni mwana wa a Milka na a Nawori.’ Tenepo, inepano ndam’bvazika mphete pa mphuno pace na pulsera m’manja mwace.
48 Patsogolo pace ndagodama ndicitsulimisa nkhope yangu mpaka pantsi pamaso pa Yahova, ndicitumbiza Yahova Mulungu wa mbuya wangu Abulahamu, omwe wanditsogolera m’njira yakuthemera kuti ndidzatengere mkazi mwana wa mbuya wangu kwa adzinza wawo.
49 Tsono ndiuzeni penu mun’funa kulatiza lufoyi lacadidi na kukhulupirika kwa mbuya wangu, tsono penu mun’funa lini ndiuzeni kuti ndiwone bzakucita.”*
50 Tenepo Labani na Betuweli adatawira kuti: “Bzimwebzi mpsakucokera kwa Yahova. Ifepano tingalewe lini kuti inde ayai ne.
51 Nguyu Rabeka, mutengeni muyende naye kuti akakhale mkazi wa mwana wa mbuya wanu ninga momwe Yahova walewera.”
52 Pomwe nyabasa wa Abulahamuyo adabva mafala yawoya, adagodama, acitsulimisa nkhope yace mpaka pantsi pamaso pa Yahova.
53 Patsogolo pace iye adayamba kucosa bzinthu bza prata na oro na bzakubvala acipasa Rabeka, ndipo adapasambo nkhoswe yace na mai wace bzinthu bzakuumira kwene-kwene.
54 Patsogolo pace iye pabodzi na amuna omwe akhanawo pabodzi wale adadya na kumwa ndipo adagona kumweko.
Pomwe adamuka macibese, iye adati: “Ndisiyeni ndibwerere kwa mbuya wangu.”
55 Tenepo nkhoswe yace na mai wace adati: “Musiyeni Rabeka abakakhale nafe ntsiku 10. Patsogolo pace iye angayende.”
56 Tsono iye adawauza kuti: “Lekani kundicedwesa pakuti Yahova wacitisa kuti bzinthu bzindifambire bwino pa ulendo bwangubu. Ndisiyeni ndibwerere kwa mbuya wangu.”
57 Tenepo iwo adati: “Mbatimucemereni Rabeka kuti tibvembo bzomwe iye akukumbuka.”
58 Tenepo iwo adamucemera Rabekayo acimubvunza kuti: “Kodi iwepo un’funa kuyenda pabodzi na mwamunayu?” Iye adatawira kuti: “Inde nin’funa.”
59 Tenepo iwo adabvuma kuti Rabeka* na mulezi* wace ayende pabodzi na nyabasa wa Abulahamu na amuna omwe akhanaye pabodzi.
60 Iwo adasimba Rabeka ndipo adamuuza kuti: “Rabeka, wana wako* adzakhale bzulu na bzulu ndipo iwo adzakunde mizinda ya anyamadulanthaka wawo.”
61 Tenepo Rabeka na anyabasa wace wacikazi wale adamuka acikapakira ngamira, ndipo adayenda pabodzi na nyabasa wa Abulahamuyo. Ndipo Nyabasa wa Abulahamuyo adatenga Rabeka aciyenda naye.
62 Izaki akhakhala ku Negebe, tsono ntsiku inango pomwe akhafamba mu njira yakuyenda ku Beeri-lahai-roi,
63 iye adayenda m’thengo kumaulo pomwe kukhadoka kuti akakumbukire bzinthu bzinango. Pomwe adanyang’anisa kutsogolo adawona ngamira zikubwera.
64 Pomwe Rabeka adanyang’anisa kutsogolo aciwona Izaki, iye adabuluka mwakamfulumize pa ngamira yomwe akhadapakirayo.
65 Patsogolo pace iye adabvunza mtumiki wa Abulahamu ule kuti: “Kodi munthu omwe akubwera kutsogolo kwathu kudzagumana nafeyu ni mbani?” Nyabasa ule adamutawira kuti: “Ni mbuya wangu.” Tenepo iye adatenga nguwo acimpsinkha msolo wace.
66 Ndipo nyabasayo adauza Izaki bzinthu bzentse bzomwe akhadacita.
67 Patsogolo pace, Izaki adatenga Rabeka aciyenda naye mu tendi la mai wace Sara. Iye adatenga Rabeka acikhala mkazi wace ndipo adayamba kumufuna kwene-kwene, ndipo bzimwebzi bzidacitisa kuti iye atsangalazidwe pambuyo pakusaikidwa mai wace.
Mafala ya m'nyantsi
^ Mafala yace caiyo: “mbeu yako.”
^ Ayai, “m’ngalawa.”
^ Siklo ibodzi ikhali magrama 11,4. Onani Mafala Yakuphampha B14.
^ Ayai, “nkhwinjiri.”
^ Siklo ibodzi ikhali magrama 11,4. Onani Mafala Yakuphampha B14.
^ Mafala yace caiyo: “kuti ndiyende ku boko lamadzere ayai lamadidi.”
^ Mafala yace caiyo: “mpfumakazi yawo.”
^ Umweyu akhali mulezi wace pomwe akhali mwana ndipo adadzakhala nyabasa wace.
^ Mafala yace caiyo: “mbeu yako.”
