Genesesi 27:1-46
27 Pomwe Izaki adakalamba, maso yace yadacita khungu ndipo akhawona lini bwino-bwino. Iye adacemera mwana wace mkulu Esau, aciti: “Mwana wangu!” Iye adatawira kuti: “Inde pai.”
2 Ndipo Izaki adati: “Inepano ndakalamba ndipo nin’dziwa lini ntsiku yomwe ningafe.
3 Tenepo ndaphata minyendo, tenga bzakusodzera bzako, kacikhwama kako kakuikhira misewe na uta ndipo ndoko m’thengo ukandiphere nyama.
4 Uikonze uciiphika bwino ninga momwe nimbafunira ndipo undibweresere. Nin’funa kuti ndidye, patsogolo pace ndikusimbe ndikanati kufa.”
5 Tsono pomwe Izaki akhalewalewa na mwana wace Esau, Rabeka akhatetekera. Patsogolo pace Esau adayenda m’thengo kukasodza nyama kuti abwere nayo.
6 Ndipo Rabeka adauza mwana wace Djakobo kuti: “Ndabva pai wako akuuza mkulu wako Esau kuti:
7 ‘Ukandiphere nyama ndipo uiphike bwino. Patsogolo pace udzandipase kuti ndidye ndipo inepano ndidzakusimbe pamaso pa Yahova ndikanati kufa.’
8 Tsono mwana wangu, tetekera bwino-bwino bzomwe ndikuuze ndipo ucite ninga momwe ndikuuziremo.
9 Ndaphata minyendo, ndoko ukatenge tumbuzi tuwiri twakunenepa bwino; nin’funa nditukonze ndiciphikira pai wako cakudya cakukoma kwene-kwene comwe ambacifuna cire.
10 Patsogolo pace ukapereke kwa pai wako kuti adye nakuti iwo akusimbe akanati kufa.”
11 Djakobo adauza mai wace Rabeka kuti: “M’bale wangu Esau ana maukuse, tsono thupi langu lidanyalala.
12 Tsono tani pai akakandikhuya? Kulewa cadidi, iwo an’kazindikira kuti ndikuwanamiza, tenepo, m’mbuto mwa kundisimba, iwo an’kanditemberera.”
13 Tsono mai wacewo adamutawira kuti: “Mwanangu, themberero limwero lidzagwere inepano, sikuti iwepo. Ndocita bzomwe ndikukuuzabzi ndipo kanditengere tumbuzito.”
14 Na tenepo, Djakobo adayenda kukatenga tumbuzito acikapasa mai wace, ndipo mai wacewo adaphika cakudya cakukoma ninga momwe pai wacewo ambafunira.
15 Patsogolo pace, Rabeka adatenga bzakubvala bzabwino kwene-kwene bza mwana wace mkulu Esau, bzomwe bzikhali m’nyumba acibvazika mwana wace mng’ono Djakobo.
16 Ndipo iye adam’bvazikambo makanda ya tumbuzi tule m’manja mwace na m’khosi mwace momwe mukhalibe maukuse.
17 Patsogolo pace, iye adapasa mwana wace Djakobo cakudya cakukoma comwe akhadaphikaco pabodzi na pau.
18 Tenepo Djakobo adayenda komwe kukhana pai wace acilewa kuti: “Pai!” Ndipo Izaki adatawira kuti: “Inde mwana wangu. Kodi ndiwe yani, Esau ayai Djakobo?”
19 Djakobo adatawira pai wacewo kuti: “Ndine mwana wanu wakuyamba Esau. Ndacita bzentse bzomwe mwandiuza. Mukani mukhale kuti mudye nyama yomwe ndakupherani kuti mundisimbe.”
20 Pamwepo, Izaki adamubvunza kuti: “Mwanangu, kodi nyama imweyi waigumana tani mwakamfulumize tenepayu?” Iye adatawira kuti: “Ni thangwe rakuti Yahova Mulungu wanu wandithandiza kuigumana.”
21 Tsono Izaki adauza Djakobo kuti: “Fendera pafupi kuti ndikukhuye mwana wangu, kuti ndidziwe penu ndiwedi mwana wangu Esau ayai ne.”
22 Tenepo, Djakobo adafendera pomwe pakhana pai wace Izaki, ndipo iwo adamuphata-phata. Patsogolo pace adalewa kuti: “Falali nda Djakobo tsono manjaya nja Esau.”
23 Iye alibe kumuzindikira thangwe manja yace yakhana maukuse ninga manja ya m’bale wace Esau, tenepo Izaki adamusimba.
24 Patsogolo pace, iye adamubvunza kuti: “Kodi iwepo ndiwedi mwana wangu Esau?” Iye adatawira kuti: “Inde ndinepano.”
25 Pamwepo Izaki adati: “Ndipase nyama yomwe wandipherayo kuti ndidye.” Iye adamupasadi nyamayo ndipo Izaki adadya, ndipo Djakobo adamupasambo vinyu acimwa.
26 Tenepo pai wace Izaki adamuuza kuti: “Mwanangu, fendera pafupi ndipo ndimpsompsone.”
27 Tenepo Djakobo adafendereradi pai waceyo aciwampsompsona ndipo iwo adakwanisa kubva mnuntci wa bzakubvala bzacebzo. Patsogolo pace adamusimba acilewa kuti:
“Mnuntci wabwino wa mwana wangu uli ninga mnuntci wa munda omwe Yahova adausimba.
28 Mulungu wacadidi akupase mame yakudzulu ndipo mataka ya pa dziko la pantsi yakhale na ndovolo. Iye acitise bzakubvuna bzako kukhala bzizinji pabodzi na vinyu yako ipsa.
29 Wanthu akutumikire ndipo mitundu ya wanthu ikugodamire. Ukhale mbuya wa abale wako ndipo wana wa mai wako akugodamire. Atembereredwe ali-wentse omwe an’kutemberera ndipo asimbidwe ali-wentse omwe an’kusimba.”
30 Pomwe Izaki adandomala kusimba Djakobo, ndipo pomwe Djakoboyo adacoka pomwe pakhana pai wace Izaki, m’bale wace Esau adafika kucokera kukasodza.
31 Iyembo adaphika cakudya cakukoma aciyenda naco kwa pai wace, ndipo adauza pai wacewo kuti: “Pai, mukani mudye nyama yomwe inepano mwana wanu ndakukonzerani kuti mundisimbe.”
32 Tenepo pai wace Izaki adamubvunza kuti: “Kodi ndiwe yani?” Iye adatawira kuti: “Ndine Esau, mwana wanu wakuyamba kubadwa.”
33 Tenepo Izaki adayamba kutetemera kwene-kwene ndipo adabvunza kuti: “Kodi mbani omwe wandibweresera nyama ule? Inepano ndadya kale iwepo ukanati kufika ndipo ndamusimba, ndipo palibe omwe angacinje bzimwebzi.”
34 Pomwe Esau adabva mafala ya pai waceyo, iye adayamba kulira mwakukuwa kwene-kwene na mwakuwawidwa, aciwauza kuti: “Pai, ndisimbenimbo ine!”
35 Tsono iye adati: “M’bale wako wabwera ndipo wandinyengeza kuti atambire ndiye bzisimbo bzomwe bzikhali bzako.”
36 Tenepo Esau adati: “Ndipopa iye dzina lace ni Djakobo,* pakuti wandipenyerera kawiri-kentse. Wanditengera kale ugo bwangu bwakukhala mwana wakuyamba kubadwa ndipo tsapano wanditengerambo bzisimbo bzangu.” Ndipo adathumizira kuti: “Kodi mulibe kundisiirambo cisimbo ne na cibodzico?”
37 Tsono Izaki adamutawira kuti: “Ndamuuza kuti akhale mbuya wako ndipo ndamupasambo azibale wace wentse kuti akhale atumiki wace. Ndamusimbambo kuti adzakhale na phoso lizinji na vinyu ipsa. Tsono n’ciyani cinango casala comwe ningakucitire mwana wangu?”
38 Esau adabvunza pai wace kuti: “Pai, mulibe kusala na cisimbo ne na cibodzico? Ndisimbeni, inde ndisimbenimbo ine pai.” Na bzimwebzi, Esau adayamba kulira kwene-kwene.
39 Tenepo pai wace Izaki adamutawira kuti:
“Un’dzakhala kutali na mataka ya ndovolo ndipo un’dzakhalambo kutali na mame ya kudzulu.
40 Un’dzathemba xipada pa moyo wako wentse ndipo un’dzatumikira m’bale wako, tsono ukadzaneta na djoki lace un’dzalitcola ndipo un’dzalicosa m’khosi mwako.”
41 Esau adayamba kuwenga Djakobo thangwe ra bzisimbo bzomwe pai wace akhadamupasa, ndipo Esau akhambalewa mu mtima mwace kuti: “Pai wangu asala pang’ono kufa.* Patsogolo pace, nin’dzapha Djakobo.”
42 Pomwe Rabeka adauzidwa mafala yomwe mwana wace mkulu Esau adalewa, pa nthawe imweyoletu iye adacemeresa mwana wace mng’ono Djakobo acimuuza kuti: “M’bale wako Esau an’funa kukupha pakufuna kubwezera bzomwe wamucitira.
43 Tenepo mwana wangu, cita bzomwe ndikuuzebzi. Thawa ndipo ndoko kwa m’bale wangu Labani ku Harani.
44 Ukakhale naye kumweko kwa nthawe itali mpaka ciya ca m’bale wako cidzamale,
45 aciyebwa bzentse bzomwe wamucitirabzi. Patsogolo pace nditi ndidzatume munthu kuti adzakutenge, pakuti nin’funa lini kuluza mwentse awiri pa ntsiku ibodzi.”
46 Patsogolo pace, Rabeka adauza Izaki kuti: “Moyo ukundidekera lini thangwe ra wana wacikazi wa Heti. Tsono Djakobo akalowolambo mkazi pakati pa akazi wacihiti ninga omwe ali kunowa, bziri bwino kundofa.”
Mafala ya m'nyantsi
^ Kuthandauza “Nyakuphata katende; Nyakupenyerera anzace.”
^ Mafala yace caiyo: “ntsiku zakulira pai wangu zikufendera.”
