Genesesi 30:1-43
30 Pomwe Rakeli adawona kuti akhalibe kuberekera wana Djakobo, iye adacitira ntcanje m’bale wace ndipo adauza Djakoboyo kuti: “Ndipaseni wana, ayai nin’fa.”
2 Tsono Djakobo adamukalipira Rakeli acilewa kuti: “Kodi inepano ndine Mulungu? Kodi ndine omwe ndacitisa kuti usaye kubereka?”
3 Tenepo iye adati: “Tengani nyabasa wangu Bila. Gonani naye kuti andiberekere wana kuti kucokera mwa iye inembo ndikhale na wana.”
4 Tenepo, Rakeli adapereka nyabasa wace Bila kwa Djakobo kuti akhale mkazi wace ndipo iye adagona naye.
5 Bila adakhala na pathupi ndipo na kupita kwa nthawe adadzaberekera Djakobo mwana wacimuna.
6 Tenepo Rakeli adati: “Mulungu wakhala mtongi wangu ndipo watetekera fala langu, mwakuti wandipasa mwana wacimuna.” Ndipopa iye adapasa mwanayo dzina lakuti Dani.*
7 Bila nyabasa wace wa Rakeli, adadzakhala pomwe na pathupi ndipo na kupita kwa nthawe adaberekera Djakobo mwana waciwiri wacimuna.
8 Tenepo Rakeli adati: “Ndanesana kwene-kwene na m’bale wangu ndipo ndakunda.” Ndipopa iye adapasa mwanayo dzina lakuti Nafitali.*
9 Pomwe Leya adawona kuti akhadaima kubereka, adapereka nyabasa wace Zilpa kwa Djakobo kuti akhala mkazi wace.
10 Ndipo Zilpa nyabasa wa Leya adaberekera Djakobo mwana wacimuna.
11 Tenepo Leya adati: “Ndacita mwayi.” Ndipo iye adapasa mwanayo dzina lakuti Gadi.*
12 Patsogolo pace, Zilpa nyabasa wa Leya adaberekera pomwe Djakobo mwana munango wacimuna.
13 Tenepo Leya adati: “Ndakomedwa kwene-kwene pakuti akazi an’dzandicemera wakukondwa.” Tenepo iye adacemera mwanayo kuti Aseri.*
14 Pa nthawe yakubvuna tirigu, Rubeni adayenda kukazunga m’thengo. Kumweko adakagumana mandraki* ndipo adayatenga acikapasa mai wace Leya. Patsogolo pace, Rakeli adauza Leya kuti: “Ndaphata minyendo, ndipasembo mandraki ya mwana wakoya.”
15 Tsono Leya adamutawira kuti: “Kodi bziribe kukwana kunditengera mwamuna komwe wacita? Kodi un’funa kutengambo mandraki ya mwana wanguya?” Tsono Rakeli adamutawira kuti: “Penu bziri tenepo, ndipase mandraki ya mwana wakoya ndipo iye an’gona na iwepo usiku buno.”
16 Pomwe Djakobo akhacokera kumunda kumaulo, Leya adayenda kukagumana naye acimuuza kuti: “Usiku buno mun’gona na ine thangwe ndapereka mandraki ya mwana wangu kuti mugone nande.” Tenepo usiku bumwebo Djakobo adagona na Leya.
17 Ndipo Mulungu adabva mpembo wa Leya acimutawira, ndipo iye adakhala na pathupi aciberekera Djakobo mwana wacixanu wacimuna.
18 Patsogolo pace Leya adati: “Mulungu wandibaira thangwe ndapereka nyabasa wangu kwa bayangu.” Tenepo iye adapasa mwanayo dzina lakuti Isakari.*
19 Ndipo Leya adakhala pomwe na pathupi, aciberekera Djakobo mwana waci 6 wacimuna.
20 Patsogolo pace Leya adati: “Mulungu wandipasa mphaso yabwino. Mwamuna wangu an’komedwa nande pakuti ndamuberekera wana 6 wacimuna.” Tenepo iye adapasa mwanayo dzina lakuti Zebuloni.*
21 Na kupita kwa nthawe, Leya adadzabereka mwana wacikazi ndipo adamupasa dzina lakuti Dina.
22 Pakumalizira pace Mulungu adakumbukira Rakeli, ndipo adabva mpembo wace acimutawira mwa kumuthandiza kuti ayambe kubereka.*
23 Iye adakhala na pathupi ndipo adabereka mwana wacimuna, aciti: “Mulungu wacosa kunyozeka kwangu.”
24 Tenepo iye adapasa mwanayo dzina lakuti Zuze,* aciti: “Yahova wandithumizira pomwe mwana munango wacimuna.”
25 Pomwe Rakeli adabereka Zuze, Djakobo adauza Labani pa nthawe imweyoletu kuti: “Ndibvumizeni ndibwerere kwathu ku dziko lathu.
26 Ndipaseni azikazangu na wana wangu omwe ndidakuphatirani basa, pakuti imwepo mukudziwa bwino momwe ndidakuphatirani basa.”
27 Tsono Labani adamutawira kuti: “Penu wandidekera mtima, ndaphata minyendo, pitiriza kubakakhala nande, pakuti ndawombeza* ndipo ndawona kuti Yahova akundisimba thangwe ra iwepo.”
28 Ndipo iye adathumizira kuti: “Ndiuze bzomwe ningakupagali ndipo inepano nin’dzakupasa.”
29 Tenepo Djakobo adauza Labani kuti: “Imwepo mukudziwa momwe ndidakuphatirani basa na momwe ndidasamalirira bwino bzifuwo bzanu.
30 Ndipo imwepo mukudziwambo kuti pomwe ndikhanati kubwera, mukhana bzifuwo bzing’ono-ng’ono, koma tsapano bzifuwo bzanu bzathumizirika ndipo bzawanda ndipo Yahova akukusimbani kuyambira pomwe inepano ndidafika kuno. Tenepo, kodi ni lini pomwe nin’dzaphatirambo basa banja langu?”
31 Tenepo Labani adabvunza Djakobo kuti: “Kodi un’funa kuti ndikupase ciyani?” Djakobo adatawira kuti: “Lekani kundipasa cinthu ciri-centse. Nin’bwerera kukasamalira na kuusa bzifuwo bzanu. Tsono nin’funa kuti imwepo mucite nande mpangano.
32 Lero nin’pita na pakati pa bzifuwo bzanu bzentse. Imwepo mupambule mabira yentse yamathotho, yamabanga-mabanga,* tumabira twentse tupswipa na mbuzi iri-yentse yamabanga-mabanga ayai yamathotho-mathotho. Kuyambira lero, bzifuwo bzomwe bzin’badwa tenepayu bzin’khala pagamento yangu.
33 Pa ntsiku yomwe mun’dzabwera kudzawona bzifuwo bzanu, mun’dzawoneratu mwekha kuti ndikuteweza bzomwe ndikukuuzanibzi. Mukadzawona mbuzi iri-yentse yakusaya mathotho-mathotho, ayai mabanga-mabanga na kabira kali-kentse kacimuna kapswipa kana inepano, ndiye kuti ndaba.”
34 Tenepo Labani adati: “Bziri bwino. Bzikhale ninga momwe waleweramu.”
35 Pa ntsiku imweyo, Labani adapambula atonde wa mithemba-mithemba na wa mabanga-mabanga na mbuzi zentse zikazi za mathotho-mathotho na za mabanga-mabanga pakati pa bzifuwo bzace. Adapambulambo iri-yentse yomwe ikhana banga licena na tumabira twentse twacimuna tupswipa, acipereka kwa wana wace.
36 Patsogolo pace, Labani adatenga bzifuwo bzace aciyenda nabzo kutali na komwe kukhana Djakobo pa mtantho wa ulendo bwa ntsiku zitatu, ndipo Djakobo adapitiriza kuusa bzifuwo bzomwe bzikhadasala bza Labani.
37 Patsogolo pace, Djakobo adatenga tumiti tuwiri twa estorake,* amendwa na platano,* ndipo adatukwatula-kwatula acisiya tumitito tuli mbee twakusaya mabade.
38 Patsogolo pace, iye adatenga tumiti tomwe akhadatukwatula tule, acituikha m’mwadiya mwakumwera madzi bzifuwo. Adaikha tumitito m’mwemo kuti bzifuwo bzikabwera kudzamwa madzi ndipo bzikazi bzikawona tumitito bzicite nkhwidwa.*
39 Tenepo bzifuwo bzikazi bzikawona tumiti tule, bzikhacita nkhwidwa bzicikhala na dzamu. Tenepo bzifuwobzo bzikhabala wana wamithemba-mithemba, wamabanga-mabanga na wamathotho-mathotho.
40 Patsogolo pace, Djakobo adapambula tumabira twacimuna acituikha pambali, ndipo adapambulambo mabira yentse ya mithemba-mithemba na mapswipa yomwe yakhali pabodzi na bzifuwo bza Labani, ndipo adacitisa kuti bzifuwo bzomwe bzikhadasalabzo bzinyang’anise bzifuwo bza mithemba-mithemba na bzipswipa bzire. Patsogolo pace iye adapambula bzifuwo bzace kuti bzikhale pabzokha ndipo alibe kubzisanganiza na bzifuwo bza Labani.
41 Ndipo pa nthawe iri-yentse yomwe bzifuwo bzacikazi bzikhacita nkhwidwa, Djakobo akhatenga tumiti tule acituikha m’mwadiya mwakumwera madzi mule kuti bzinyang’anise bzicikhala na dzamu.
42 Tsono iye akawona kuti bzifuwobzo bziribe mphanvu, akhaikha lini tumiti tule m’madzimo. Tenepo nthawe zentse, bzifuwo bzentse bzakutepa bzikhakhala bza Labani ndipo bzamphanvu bzikhakhala bza Djakobo.
43 Tenepo Djakobo adadala kwene-kwene ndipo iye adakhala na anyabasa wacimuna na wacikazi, ngamira na mabulu.
Mafala ya m'nyantsi
^ Kuthandauza “Nyakutonga.”
^ Kuthandauza “Nkhondo zomwe ndamenya.”
^ Kuthandauza “Mwayi.”
^ Kuthandauza “Kukondwa; Cikondweso.”
^ Mandraki ni bzisapo bza kamuti kanango komwe azimai akhadya thangwe akhakumbuka kuti akadya bzingadawathandiza kukhala na pathupi.
^ Kuthandauza “Iye ni pagamento yangu.”
^ Kuthandauza “Kubvuma.”
^ Mafala yace caiyo: “Mulungu adamutetekera acifungula mthumbo yace.”
^ Cigwatho ca dzina lakuti Zuzefiya, lomwe limbathandauza kuti “Yahova athumizire (awandise).”
^ Ayai, “ndawona cizindikiro.”
^ Ayai, “yamawala-mawala.”
^ Ni muti omwe umbacosa maluwa yomwe yambanuntcira bwino.
^ Muti umweyu umbagumanika ku Síria, ku Palestina na ku Líbano.
^ Nkhwidwa ni pa nthawe yomwe bzifuwo bzimbafuna kukwirana.
