Genesesi 35:1-29
35 Patsogolo pace, Mulungu adauza Djakobo kuti: “Lamuka, ndoko ku Beteli, ukakhale kumweko ndipo ukandimangire guwa la ntsembe kumweko. Ine ndine Mulungu wacadidi omwe adawonekera kwa iwepo pomwe ukhathawa m’bale wako Esau.”
2 Patsogolo pace, Djakobo adauza wanthu wa pamui pace na wentse omwe akhanaye pabodzi kuti: “Cosani mirungu yacirendo pakati panu, bziceneseni, cinjani bzakubvala bzanu,
3 ndipo ticite ulendo bwakuyenda ku Beteli. Kumweko, nin’kakonzera Mulungu wacadidi guwa la ntsembe, ule omwe adanditawira pa ntsiku ya kutsautsika kwangu ndipo ambakhala nande ku mbuto* iri-yentse na kuli-kwentse komwe nimbayenda.”
4 Tenepo iwo adapereka kwa Djakobo mirungu yentse yacirendo yomwe akhanayo na mphete zomwe akhadabvala m’makutu, ndipo Djakoboyo adabzifucira* pantsi pa muti ukulu omwe ukhali pafupi na Sekemu.
5 Pomwe iwo akhayenda, Mulungu adacitisa kuti wanthu wentse wa m’mizinda yapafupi abve mantha, na tenepo, alibe kuwatewera wana wa Djakobo kuti amenyane nawo.
6 Pakumalizira pace, Djakobo adafika ku Luzi komwe ni ku Beteli m’dziko la Kanani, iye pabodzi na wanthu wentse omwe akhanawo.
7 Kumweko adamanga guwa la ntsembe ndipo mbutoyo adaicemera kuti Eli-beteli,* thangwe ni kumweko komwe Mulungu wacadidi adawonekera kwa iye pomwe akhathawa m’bale wace.
8 Patsogolo pace, Debora makayaya wa Rabeka adafa ndipo adapendesedwa ku Beteli, m’nyantsi mwa phiri, pantsi pa muti ukulu. Tenepo mutiyo adaucemera kuti Aloni-bakuti.*
9 Mulungu adawonekera pomwe kwa Djakobo pomwe akhabwerera kwawo kucokera ku Padani-aramu ndipo adamusimba.
10 Mulungu adamuuza kuti: “Iwepo dzina lako ndiwe Djakobo. Tsono kuyambira lero, un’cemeredwa lini pomwe Djakobo, koma un’cemeredwa kuti Jirayeri.” Ndipo iye adayamba kucemeredwa kuti Jirayeri.
11 Mulungu adapitiriza kumuuza kuti: “Ine ndine Mulungu Wamphanvu-zentse. Bereka wana ndipo uwande. Mwa iwepo mun’dzacoka mitundu mizinji na madzinza mazinji ndipo winango mwa wana wako* an’dzakhala amambo.
12 Pakulewa bza dziko lomwe ndidapasa Abulahamu na Izaki, nin’dzalipereka kwa iwepo na kwa wana wako.”*
13 Ndipo Mulungu adacoka acimusiya Djakobo pa mbuto yomwe akhalewalewa nayepo.
14 Tenepo, Djakobo adaimisa mwala wa mkumbuso pa mbuto yomwe akhalewalewa nayepo, ndipo iye adatsanulira mwalayo ntsembe ya vinyu na mafuta.
15 Ndipo Djakobo adapitiriza kucemera mbuto yomwe Mulungu akhadalewalewa naye ire kuti Beteli.
16 Patsogolo pace, iwo adacoka ku Beteliko. Pakhadasala mtantho utali kuti afike ku Efrata pomwe nthawe yakuti Rakeli abereke idakwana. Tsono iye adabonera kwene-kwene pakuberekapo.
17 Pomwe iye akhabonera kwene-kwene kuti abereke mwanayo, daya* adamuuza kuti: “Leka kucita thupo, thangwe unibereka pomwe mwana munango wacimuna.”
18 Pomwe iye akhamalizika (pakuti iye akhafa), adapasa mwanayo dzina lakuti Beni-oni* tsono pai wace adamupasa dzina lakuti Benjamini.*
19 Tenepo Rakeli adafa, ndipo adamupendesa m’mphepete mwa njira yakuyenda ku Efrata, komwe ni ku Betelehemu.
20 Djakobo adaikha mwala ukulu pa mthutu ya Rakeli; ndipo mwalayo ukalipo mpaka lero pa mthutu ya Rakeliyo.
21 Patsogolo pace Jirayeri adaguduka acikamanga tendi lace pafupi na ntsanza ya Ederi.
22 Ntsiku inango pomwe Jirayeri akhakhala ku dziko limwero, Rubeni adagona na Bila mkazi mng’ono wa pai wace ndipo Jirayeri adadziwa bzimwebzo.
Djakobo akhana wana wacimuna 12.
23 Wana omwe Leya adaberekera Djakobo akhali awa: Wakuyamba akhali Rubeni, kubwera Simiyoni, Levi, Djuda, Isakari na Zebuloni.
24 Wana omwe Rakeli adaberekera Djakobo akhali Zuze na Benjamini.
25 Wana omwe Bila nyabasa wa Rakeli adaberekera Djakobo akhali Dani na Nafitali.
26 Ndipo wana omwe Zilpa nyabasa wa Leya adaberekera Djakobo akhali Gadi na Aseri. Amwewa ni wana wacimuna omwe Djakobo adabereka ku Padani-aramu.
27 Pakumalizira pace, Djakobo adafika kwa pai wace Izaki ku Mamire, mphimpha ya ku Kiriyati-arba, komwe ni ku Hebroni, komwe Abulahamu na Izaki adakhalambo ninga alendo.
28 Izaki adakhala na moyo magole 180.
29 Patsogolo pace Izaki adadzafa ndipo adakaikhidwa m’thenje lomwe adaikhidwa makolo yace yakale,* pambuyo pakukhala na moyo utali na wakukondwa; ndipo Esau na Djakobo adakamupendesa.
Mafala ya m'nyantsi
^ Ayai, “mu njira.”
^ Ayai, “adabzibisa.”
^ Kuthandauza “Mulungu wa ku Beteli.”
^ Kuthandauza “Muti Ukulu Wakulirira.”
^ Mafala yace caiyo: “wana omwe an’dzacokera m’ciuno mwako.”
^ Mafala yace caiyo: “mbeu yako.”
^ Ayai, “nyakubazika.”
^ Kuthandauza “Mwana wa Msunamo Wangu.”
^ Kuthandauza “Mwana wa ku Boko Langu Lamadidi.”
^ Mafala yace caiyo: “adaikhidwa pabodzi na wanthu wa kwace.”
