Genesesi 39:1-23
39 Zuze adayendesedwa ku Edjipito ndipo m’Edjipito munango wakucemeredwa Potifari, omwe akhali nduna ya pamui pa Farawo na mkulu wa acikunda wakulindira mambo, adamugula kwa Ajumayeri omwe akhadayenda naye ku Edjipitoko.
2 Tsono Yahova akhana Zuze ndipo ciri-centse comwe akhacita cikham’fambira bwino. Tenepo iye adaikhidwa kuti ambanyang’anire nyumba ya mbuya wace, m’Edjipito ule.
3 Mbuya waceyo adawona kuti Yahova akhana Zuze nakuti Yahovayo akhamuthandiza kuti ciri-centse comwe an’cita cimufambire bwino.
4 Zuze adadzakhala nyabasa omwe Potifari akhamukhulupira kwene-kwene. Tenepo adamusankhula kuti akhale wakunyang’anira pamui pace na bzentse bzomwe akhanabzo.
5 Kuyambira pomwe Potifari adasankhula Zuze kuti akhale nyakunyang’anira pamui pace na bzinthu bzace bzentse, Yahova adapitiriza kusimba nyumba ya m’Edjipitoyo thangwe ra Zuze, ndipo Yahovayo akhasimba bzentse bzomwe akhanabzo kumui kwace na kumunda kwace.
6 Patsogolo pace, Potifari adasiya bzentse m’manja mwa Zuze ndipo akhacita lini thupo na ciri-centse. Cinthu comwe iye akhasankhula yekha cikhali cakudya basi. Ndipo Zuze akhali wakuwoneka bwino na wakudeka.
7 Na kupita kwa nthawe, mkazi wa mbuya wace adayamba kusirira Zuze acimbamuuza kuti: “Gona nande.”
8 Tsono iye akhambalamba aciuza mkazi wa mbuya waceyo kuti: “Mbuya wangu an’dziwa lini bzinthu bzomwe bzina inepano m’nyumba muno, ndipo bzinthu bzentse abzipereka m’manja mwangu.
9 Palibe nyakunyang’anira mkulu pamui pano kuposa inepano, ndipo iwo aikha bzinthu bzentse m’manja mwangu kupambula imwepo thangwe ndimwe akazawo. Tsono kodi ningacitirenyi cinthu cakuipa kwene-kweneci ndiciphonyera Mulungu?”
10 Ntsiku zentse mkaziyo akhanyengerera Zuze, tsono Zuzeyo alibe kubvuma kugona naye ne kukhala naye pabodzi.
11 Ntsiku inango pomwe Zuze adapita m’nyumba kuti akaphate basa lace, mukhalibe nyabasa ne na m’bodziyo m’nyumbamo.
12 Tenepo mkaziyo adaphata cakubvala ca Zuze aciti: “Gona nande!” Tsono iye adasiya cakubvala caceco m’manja mwa mkaziyo acithawira panja.
13 Pomwe mkaziyo adawona kuti Zuze wasiya cakubvala cace m’manja mwace acithawira panja,
14 iye adayamba kukuwa acimbacemera anyabasa wa pamuipo ndipo adawauza kuti: “Onani, Mhebereu omwe mwamuna wangu watibwereserayu, an’funa kuticitira bzinthu bzapezi-pezi kuti wanthu atiseke. Iye akhadabwera kuti adzandipswithe, tsono inepano ndakuwa na mphanvu zangu zentse.
15 Pomwe wandibva ndikukuwa, iye wasiya cakubvala caceci pambali pangupa acithawira panja.”
16 Patsogolo pace, mkaziyo adasiya cakubvalaco pambali pacepo mpaka pomwe mwamuna wace adabwera pamuipo.
17 Ndipo iye adamuuzambo bzibodzi-bodzibzo kuti: “Mhebereu omwe mudatibweresera ule, akhadabwera kuna inepano kuti adzandicite bzinthu bzapezi-pezi.
18 Tsono pomwe ndayamba kukuwa, iye wasiya cakubvala caceci pambali pangu acithawira panja.”
19 Pomwe mbuya waceyo adabva mafala ya mkazi wace yakuti: “Bzimwebzi ndibzo bzomwe nyabasa wanu wandicita,” iye adakalipa kwene-kwene.
20 Tenepo mbuyayo adaphata Zuze acikam’fungirisa m’kawoko ya anyam’kawoko wa mambo ndipo iye adapitiriza kukhala kumweko.
21 Tsono Yahova adapitiriza kukhala na Zuze acimulatiza lufoyi lacadidi, ndipo iye adacitisambo kuti mkulu wakunyang’anira m’kawokomo amudekere mtima.
22 Tenepo nyakunyang’anira m’kawokoyo adasankhula Zuze kuti akhale nyakunyang’anira wentse omwe akhali m’kawokomo, ndipo Zuzeyo akhanyang’anirambo bzentse bzomwe bzikhacitika m’mwemo.
23 Ndipo mkulu wakunyang’anira m’kawokoyo akhacita lini thupo na cinthu ciri-centse comwe cikhali m’manja mwa Zuze, pakuti Yahova akhana Zuzeyo ndipo Yahovayo akhacitisa kuti bzentse bzomwe Zuze an’cita bzimufambire bwino.
