Genesesi 4:1-26
4 Adamu adagona na mkazace Eva ndipo iye adakhala na pathupi. Pomwe adabereka Kaini, Evayo adati: “Ndabereka mwana wacimuna na thandizo la Yahova.”
2 Na kupita kwa nthawe, iye adadzabereka Abeli m’bale wace wa Kaini.
Abeli adadzakhala makabusa wa mabira ndipo Kaini akhali mulimi.
3 Na kupita kwa nthawe, Kaini adabweresa bzisapo bzinango bza m’munda mwace kuti apereke ntsembe kwa Yahova.
4 Tsono Abeli adabweresa wana wakuyamba kubadwa wa mabira yace, aciyapereka ntsembe pabodzi na mafuta yace. Yahova adakomedwa na Abeli pabodzi na ntsembe yaceyo,
5 tsono iye alibe kukomedwa na Kaini pabodzi na ntsembe yace. Tenepo, Kaini adakalipa kwene-kwene ndipo adapsoma.*
6 Ndipopa Yahova adabvunza Kaini kuti: “Thangwe ranyi udakalipa kwene-kwene ndipo udapsoma?
7 Ukacinja ucicita bzabwino, kodi ningaleke kukomedwa nawe pomwe? Tsono ukasaya kucinja ucicita bzabwino, pikado yakubisalikira pa msuwo ndipo ikufunisisa kukumbwandira, kodi iwepo un’dzakwanisa kuikunda?”
8 Patsogolo pace Kaini adauza m’bale wace Abeli kuti: “Mbatiyende kumunda.” Pomwe akhali kumundako, Kaini adamenya m’bale wace Abeli ndipo adamupha.
9 Patsogolo pace, Yahova adabvunza Kaini kuti: “Kodi ali kuponi m’bale wako Abeli?” Iye adatawira kuti: “Ndikudziwa lini. Kodi ine ndine mulindiri wa m’bale wanguyo?”
10 Tenepo Mulungu adati: “Wacitiranyi bzimwebzi? Tetekera! Mulopa wa m’bale wako ukundilirira kucokera ku mataka.
11 Tsapano ndiwe wakutembereredwa ndipo nin’kuthamangisa pa mataka yomwe yafungula mulomo wace kuti yatambire mulopa wa m’bale wako Abeli kucokera m’manja mwako.
12 Iwepo ukalima, mataka yan’dzakupasa lini cakudya cakukwanira.* Iwepo un’dzakhala nyakufamba-famba na nyakuthawa-thawa pa dziko la pantsi.”
13 Tsono Kaini adati kwa Yahova: “Nyathwa yomwe mukundipasa thangwe ra kuphonya kwanguyi njakuwawa kwene-kwene ndipo njakunesa kuipirira.
14 Lero mukundithotha m’dziko lino ndipo nin’dzakhala kutali kwene-kwene na imwepo. Nin’dzakhala nyakufamba-famba na nyakuthawa-thawa pa dziko la pantsi ndipo ali-wentse omwe an’dzandigumana, kulewa cadidi, an’dzandipha.”
15 Tsono Yahova adauza Kaini kuti: “Ndipopa ali-wentse omwe an’kupha iwepo Kainiwe nin’dzamupasa nyathwa kanomwe.”
Tenepo, Yahova adaikhira* cizindikiro* Kaini kuti ali-wentse omwe animugumana aleke kumupha.
16 Patsogolo pace, Kaini adacoka pamaso pa Yahova aciyenda kukakhala ku dziko la Nodi,* kumabvadzuwa kwa Edeni.
17 Na kupita kwa nthawe, Kaini adagona na mkazace ndipo mkaziyo adakhala na pathupi acibereka Inoki. Patsogolo pace iye adamanga mzinda ndipo adaupasa dzina la mwana wace Inoki.
18 Inoki adabereka Iradi, Iradi adabereka Mehujaeli, Mehujaeli adabereka Metusayeli ndipo Metusayeli adabereka Lameki.
19 Lameki adalowola akazi awiri. Mkazi wakuyamba dzina lace akhali Ada ndipo waciwiri akhali Zila.
20 Na kupita kwa nthawe, Ada adadzabereka Jabali. Jabali akhali munthu wakuyamba kukhala m’matendi na kufuwa bzifuwo.
21 M’bale wace wa Jabali akhali Jubali. Iye akhali munthu wakuyamba pa wanthu wentse omwe ambaimba harpa* na citoliro.
22 Zila adaberekambo Tubali-kaini, omwe akhali m’misiri wakusula bzinthu bza mtundu uli-wentse bza kobre* na simbi,* ndipo mpfumakazi ya Tubali-kaini ikhali Naama.
23 Lameki adauza azikazace Ada na Zila mafala aya:
“Tetekerani mafala yangu imwe akazi wa Lameki;Khalani tceru pa bzomwe nin’funa kulewa:
Ndapha munthu thangwe wandipweteka,Inde, ndaphadi tswaka thangwe landimenya.
24 Penu omwe anipha Kaini an’dzalangidwa maulendo 7,Ndiye kuti omwe anipha ine Lameki an’dzalangidwa maulendo 77.”
25 Adamu adagona pomwe na mkazace ndipo adabala mwana wacimuna. Eva adapasa mwanayo dzina lakuti Seti* thangwe pomwe adabadwa, iye adalewa kuti: “Mulungu wandipasa mwana munango m’mbuto mwa Abeli omwe adaphedwa na m’bale wace Kaini.”
26 Patsogolo pace, Seti adabereka mwana wacimuna ndipo adamupasa dzina lakuti Inosi. Pa nthawe imweyi, wanthu adayamba kucemera pa dzina la Yahova.
Mafala ya m'nyantsi
^ Mafala yace caiyo: “ndipo nkhope yace idagwa.”
^ Mafala yace caiyo: “mphanvu yace.”
^ Ayai pinango, “adakhazikisira.”
^ Pinango cizindikiro cimweci cikhali lamulo lakucenjeza wanthu.
^ Mafala yakuti “dziko la Nodi,” yambathandauza dziko la wanthu wakuthawa kwawo.
^ ‘Harpa’ ni cakuimbira comwe
^ Ayai, “mkuwa.”
^ Ayai, “fero.”
^ Kuthandauza, “Wakusankhulidwa, Wakuikhidwa; Wakukhazikisidwa.”
