Genesesi 42:1-38
42 Pomwe Djakobo adadziwa kuti ku Edjipito kukhana phoso, iye adabvunza wana wace kuti: “Thangwe ranyi mukundokhala ne kucita cinthu ciri-centse?”
2 Iye adalewa pomwe kuti: “Ndabva kuti ku Edjipito kuna phoso. Ndokoni kumweko kuti mukatigulire cakudya, kuti tipitirize kukhala na moyo ticileka kufa.”
3 Tenepo abale wace 10 wa Zuze adayenda ku Edjipito kuti akagule phoso.
4 Tsono Djakobo alibe kubvumiza kuti Benjamini, m’bale wace wa Zuze, ayende pabodzi na abale wace winangowo pakuti adati: “Pinango angacite ngozi acifa.”
5 Wana wa Jirayeri adayenda pabodzi na wanthu winango omwe akhayenda kukagula cakudya, thangwe rakuti njalayo ikhadafikambo m’dziko la Kanani.
6 Zuze ndiye omwe akhanyang’anira dziko lentse la Edjipito ndipo ndiye omwe akhagulisirambo phoso wanthu wentse wa pa dziko la pantsi. Tenepo, abale wace adafika acimugodamira, acitsulimisa nkhope zawo mpaka pantsi.
7 Pomwe Zuze adawawona abale wacewo, nthawe imweyoletu adawazindikira, koma iye alibe kufuna kubzidziwikisa kwa iwo. Ndipo iye adalewalewa nawo mwakukalipa aciwabvunza kuti: “Kodi imwepo mwacokera kuponi?” Iwo adamutawira kuti: “Tacokera ku Kanani ndipo tabwera kudzagula cakudya.”
8 Napo kuti Zuze adawazindikira abale wacewo, iwo alibe kumuzindikira.
9 Nthawe imweyoletu Zuze adakumbukira bza maloto yomwe akhadalota pakulewa bza abale wacewo, ndipo adawauza kuti: “Imwepo mwabwera kudzazonda dzikoli! Mwabwera kudzawona mbuto zakusaya kukhotcerereka za dziko lathuli.”
10 Tsono iwo adamutawira kuti: “Ne mbuya wathu, atumiki wanufe tandobwera kudzagula cakudya basi.
11 Tentsenefe ndife wana wa munthu m’bodzi. Ndife wanthu wakulungama. Atumiki wanufe, ndife lini azondi.”
12 Tsono iye adawatawira kuti: “Imwepo mukunama! Mwabwera kudzawona mbuto zakusaya kukhotcerereka za dziko lathuli.”
13 Na tenepo iwo adati: “Atumiki wanufe tiripo 12 pa ubale bwathu. Ndife wana wa munthu m’bodzi ku dziko la Kanani ndipo mng’ono wathu wasala na pai, tsono munangoyo kulibe.”
14 Tenepo Zuze adawauza kuti: “Bzomwe ndalewa bzire n’cadidi. ‘Imwepo ndimwedi azondi!’
15 Nin’kuyezani kuti ndiwone penu mukulewa cadidi ayai ne mwa kucita ibzi: Pana Farawo wamoyo, imwepo mun’coka lini kuno mpaka m’bale wanu mng’onoyo kubwera kuno.
16 Tumani m’bodzi wanu kuti ayende kukatenga mng’ono wanuyo pomwe winangomwe mun’bakafungiridwa m’kawoko. Mwa njira imweyi, bzin’dziwika penu mwalewa cadidi ayai ne. Penu mukunama, ndiye kuti pana Farawo wamoyo, imwepo ndimwe azondi.”
17 Tenepo iye adawafungira m’kawoko kwa ntsiku zitatu.
18 Pa ntsiku yacitatuyo Zuze adawauza kuti: “Pakuti inepano nimbagopa Mulungu, citani ibzi kuti mupitirize kukhala na moyo.
19 Penu ndimwedi wakulungama, m’bodzi wanu asale m’kawoko muno ndipo winangomwe muyende kuti mukapereke cakudya kwa wanthu wa kumui kwanu omwe akubonera na njala.
20 Ndipo mukabwere naye mng’ono wanuyo kuno, mukacita bzimwebzi nin’dzadziwa kuti mudalewadi cadidi ndipo muniphedwa lini.” Tenepo iwo adacitadi bzimwebzo.
21 Ndipo iwo adayamba kuuzana kuti: “Mwakusaya kupenukira ifepano tikulangidwa thangwe ra bzomwe tidamucitira m’bale wathu. Pakuti tidawona kubonera kwace pomwe akhatikumbira kuti timubvere ntsisi, tsono ifepano tidalamba. Ndipopa tsokali likutibwererapa.”
22 Tsono Rubeni adawauza kuti: “Ndiribe kukuuzani kuti lekani kumucitira cakuipa mwanayu? Koma imwepo mulibe kundibvera. Tsapano mulopa wace ukusundidwa kwa ifepano.”
23 Tsono iwo akhadziwa lini kuti Zuze akhabva, thangwe pakulewalewa nawo akhaphatisa basa nyakusandulizira.
24 Tenepo iye adayenda pamphunzu aciyamba kulira. Pomwe adabwerera adayamba pomwe kulewalewa nawo ndipo adatenga Simiyoni acimumanga iwo akuwona.
25 Zuze adauza anyabasa wace kuti adzaze cakudya m’masakha mwawo acibwezera kobiri ya ali-wentse m’sakha mwace. Ndipo adawauzambo kuti awapase cakudya kuti adye pa ulendobo. Iwo adawacitiradi bzimwebzo.
26 Tenepo, iwo adapakiza cakudyaco pa mabulu yawo, aciyenda.
27 Pomwe adafika pa mbuto yomwe angadagona, m’bodzi wawo adatsudzula sakha wace kuti apase cakudya bulu wace, ndipo iye adawona kobiri yace iri m’sakhamo.
28 Tenepo iye adauza abale wace kuti: “Onani! Andibwezera kobiri zangu, ndipo ziri m’sakhamu!” Pamwepo mitima yawo idanyukha, ndipo adayamba kutetemera. Iwo adanyang’anisana acibvunzana kuti: “Kodi n’ciyani comwe Mulungu akuticitiraci?”
29 Pomwe adafika kwa pai wawo Djakobo ku dziko la Kanani, adawafotokozera bzentse bzomwe bzikhadawacitikira kuti:
30 “Mwamuna omwe ni mbuya wa dzikolo, walewalewa nafe mwaukali kwene-kwene ndipo watinamizira kuti tikhayenda kukazondera mbuto zomwe n’zakusaya kukhotcerereka za dzikolo.
31 Tsono ife tamuuza kuti: ‘Ndife wanthu wakulungama. Ndipo ndife lini azondi.
32 Tiripo 12 pa ubale bwathu ndipo ndife wana wa pai m’bodzi. M’bodzi wathu kulibe ndipo mng’ono wasala na pai wathu ku dziko la Kanani.’
33 Koma mwamunayo, omwe ni mbuya wa dzikolo adalewa kuti: ‘Penu ndimwedi wanthu wakulungama citani ibzi: M’bodzi wanu asale nande kuno ndipo winangomwe tengani cakudya muyende naco kwa adzinza wanu omwe akubonera na njala.
34 Ndipo mudzabwere na m’bale wanu mng’onoyo kuno kuti ndidzatsimikizire kuti ndimwedi lini azondi koma ndimwe wanthu wakulungama. Mukacita bzimwebzo, nin’dzakubwezerani m’bale wanuyu ndipo mungadzacitembo malonda m’dziko lino.’”
35 Pomwe iwo akhacosa bzomwe bzikhali m’masakha mwawo, ali-wentse adawona cikhwama ca kobiri m’sakha mwace. Pomwe iwo pabodzi na pai wawo adawona kobirizo, adabva mantha kwene-kwene.
36 Pai wawo Djakobo adadandaula kuti: “Wana wangu akumala thangwe ra imwepo! Zuze kulibe, Simiyoni kulibe pomwe ndipo tsapano mun’funa kutengambo Benjamini. Thangwe ranyi bzimwebzi bzikundicitikira!”
37 Tsono Rubeni adauza pai wace kuti: “Mudzaphe wana wangu awiri ndikasaya kukubwereserani Benjamini. Muperekeni m’manja mwangu ndipo ndikupicira kuti nin’dzabwera naye kwa imwepo.”
38 Tsono iye adalewa kuti: “Mwanangu aniyenda lini namwe thangwe m’bale wace adafa kale ndipo iye wasala yekha. Cikamucitikira cinthu mwananguyu, ndipo acifa pa ulendobo, imwepo mun’dzacitisa kuti ndife* na msunamo pomwe ndakalamba pano.”
Mafala ya m'nyantsi
^ Ayai, “nin’dzapolikira ku Thenje.” Onani Kafotokozedwe ka Mafala Manango pa fala lakuti “Seoli.”
