Genesesi 50:1-26
50 Tenepo Zuze adakumbatira pai wace acilira kwene-kwene ndipo adawampsompsona.
2 Patsogolo pace Zuze adauza anyabasa wace omwe akhali adotolo kuti aikhe mankhwala mtembo wa pai wace kuti uleke kudzongeka. Tenepo adotolowo adaikhadi mankhwalayo mtembo wa Jirayeri.
3 Iwo adamala ntsiku 40 akucita basa limweri, pakuti kukonza mtembo kukhafunikira ntsiku zizinji tenepa. Aedjipitowo adapitiriza kumulira Jirayeri kwa ntsiku 70.
4 Pomwe ntsiku zomwe Zuze akhalira pai wace Djakobo zidamala, iye adauza nduna za* Farawo kuti: “Penu mungandidekere mtima, kandiuzireni Farawo kuti:
5 ‘Pai wangu adandilumbirisa kuti: “Inepano ndikufa. Ukandiikhe m’thenje lomwe ndidagobesa m’dziko la Kanani.” Tenepo ndaphata minyendo, ndibvumizeni kuti ndiyende ndikapendese pai wangu, ndikamala nin’bwerera.’”
6 Tenepo Farawo adamuuza kuti: “Ndoko ukapendese pai wakowo ninga momwe iwo adakulumbirisira.”
7 Tenepo Zuze adayenda kukapendesa pai wace ndipo atumiki wentse wa Farawo, akulu-akulu wa m’nyumba yace na akulu-akulu wentse wa m’dziko la Edjipito adayenda kukamuperekeza.
8 Wanthu wentse wa pamui pa Zuze, abale wace na wanthu wa pamui pa pai wace adayenda naye pabodzi. Ku Goseni kudandosala wana ang’ono, mabira, mbuzi na ng’ombe zawo.
9 Adatengambo ngolo na anyakupakira pa makavalo, ndipo thimu lentsero likhali likulu kwene-kwene.
10 Patsogolo pace adafika pa mbuwa ya ku Atadi, mphimpha ya ku Jordano. Kumweko adacita msinda ukulu wa nkhawa ndipo Zuze adalira pai wace kwa ntsiku 7.
11 Pomwe Akanani omwe akhakhala m’dzikolo adawawona wanthuwo akulira pa mbuwa ya Atadi, iwo adalewa kuti: “Nkhawa imweyi njikulu kwene-kwene kwa Aedjipito.” Ndipopa mbutoyo adaipasa dzina lakuti Abeli-miziraimu,* ndipo iri ku mphimpha ya Jordano.
12 Tenepo wana wa Djakobo adacita bzentse bzomwe iye akhadawauza.
13 Wana wacewo adamunyamula aciyenda naye ku Kanani ndipo adakamupendesa m’mphako ya m’munda wa Makipela, omwe ukhadanyang’anizana na munda wa Mamire, omwe Abulahamu akhadaugula kwa Efroni Mhiti kuti ukhale thenje.
14 Pomwe Zuze adamala kupendesa pai wace, adabwerera ku Edjipito pabodzi na abale wace na wentse omwe akhadamuperekeza kukapendesa pai wacewo.
15 Pomwe abale wace wa Zuze adawona kuti pai wawo asaika, iwo adati: “Pinango Zuze watikoyera cakumtima ndipo an’tibwezera bzakuipa bzentse bzomwe tidamucitira.”
16 Tenepo, iwo adatumizira Zuze mafala yakuti: “Pomwe pai wanu akhanati kufa, adatisiira mafala yakuti:
17 ‘Mukamuuze Zuze kuti: “Ndikukumbira ndipo ndaphata minyendo, lekerera bzakuphonya bza abale wako na bzakuipa bzentse bzomwe adakucitira.”’ Tsapano taphata minyendo, lekererani pikado za atumiki wa Mulungu wa pai wanufe.” Pomwe Zuze adabva bzimwebzi, adalira kwene-kwene.
18 Patsogolo pace, abale wace adayenda pomwe pakhana iyepo acigodama pamaso pace ndipo adalewa kuti: “Ife tiri pano ninga akapolo wanu.”
19 Zuze adawauza kuti: “Lekani kugopa, kodi ine ndine Mulungu kuti ndikutongeni?
20 Napo kuti mukhafuna kundicitira bzakuipa, Mulungu akhana cakulinga cabwino ndipo akhafuna kupulumusa moyo wa wanthu azinji ninga momwe akucitira lero.
21 Tenepo lekani kugopa, nin’pitiriza kumbakupasani cakudya pabodzi na wana wanu.” Na mafala yamweya iye adawatsangalaza na kuwakhazika mtima pantsi.
22 Zuze adapitiriza kukhala ku Edjipito na wanthu wa pamui pa pai wace, ndipo iye adakhala na moyo magole 110.
23 Zuze adawona m’badwo wacitatu wa wana wa Efraimu ndipo adawonambo wana wa Makiri omwe akhali mwana wa Manase. Zuze akhawona* wana amwewa ninga wace.
24 Pakumalizira pace, Zuze adauza abale wace kuti: “Inepano ndikufa, tsono kulewa cadidi Mulungu an’dzakuthandizani ndipo an’dzakucosani m’dziko lino, acikuyendesani ku dziko lomwe adalumbirira Abulahamu, Izaki na Djakobo.”
25 Tenepo Zuze adacitisa wana wa Jirayeri kulumbira ndipo adawauza kuti: “Kulewa cadidi, Mulungu an’dzakuthandizani. Tenepo mudzanyamule mafupa yangu pakucoka kuno.”
26 Zuze adafa na magole 110. Thupi lace lidaikhidwa mankhwala kuti lileke kudzongeka ndipo lidaikhidwa m’baulu* ku Edjipito.
Mafala ya m'nyantsi
^ Ayai, “wa kumui kwa.”
^ Kuthandauza “Kulira Nkhawa kwa Aedjipito.”
^ Kuthandauza “akhasamalira.”
^ Ayai, “kaxau.”
