Jeremiya 1:1-19
1 Aya ni mafala ya Jeremiya,* mwana wa Hilikiya, m’bodzi wa antsembe wa ku Anatoti m’dziko la Benjamini.
2 Yahova adalewalewa naye mu ntsiku za Djosiya mwana wa Amoni, omwe akhali mambo wa Djuda mu gole laci 13 la utongi bwace.
3 Iye adalewalewa naye pomwe mu ntsiku za Jewoyakimu mwana wa Djosiya, mambo wa Djuda, mpaka kuphampha kwa gole laci 11 la utongi bwa Zedekiya mwana wa Djosiya, mambo wa Djuda, m’mwezi wacixanu pomwe Jeruzalemu adayendesedwa ku ukapolo.
4 Yahova adalewalewa nande kuti:
5 “Pomwe ndikhanati kukukonza m’mimba mwa mai wako, ine ndikhakudziwa kale,*Ndipo pomwe ukhanati kubadwa,* ine ndikhadakucenesa kale.*
Ndidakusankhula kuti ukhale mprofeta kuna mitundu ya wanthu.”
6 Tenepo ine ndidati: “Maine, imwe Yahova Mbuya Mkululetu!
Inepano nimbadziwa lini kulewalewa thangwe ndine mulumbwana.”*
7 Tsono Yahova adati:
“Leka kulewa kuti: ‘Ndine mulumbwana.’
Pakuti iwepo un’funika kuyenda kwa wentse omwe nin’kutumiza,Ndipo ukalewe bzentse bzomwe nin’kuuza.
8 Leka kuwagopa, thangwe ra mawonekedwe yawoPakuti ‘ndinawe kuti ndikupulumuse,’ walewa tenepo Yahova.”
9 Patsogolo pace Yahova adafuthula boko lace acikhuya mulomo wangu. Ndipo Yahova adandiuza kuti: “Ndaikha mafala yangu pamulomo pako.
10 Ntsiku ya lero nin’kupasa utongi kuna mitundu ya wanthu na amambo kuti uzule na kugumula, kuti upfudze na kugwesa, kuti umange na kubzala.”
11 Yahova adalewalewa nande pomwe kuti: “Jeremiya, ukuwona ciyani?” Ine ndidatawira kuti: “Ndikuwona kamthambi ka muti wa amendwa.”
12 Yahova adandiuza kuti: “Wawona bwino, inepano nin’pitiriza kuwonesesa kuti ndikuteweza mafala yangu.”
13 Yahova adalewalewa nande pomwe kaciwiri kuti: “Kodi ukuwona ciyani?” Ine ndidatawira kuti: “Ndikuwona cikalango* cikupferuka ndipo mulomo wace udapendekera ku norte kuyenda ku suli.”
14 Patsogolo pace Yahova adandiuza kuti:
“Tsoka lin’dzabwera kucokera kumbali ya ku norteNdipo lin’dzagwera wanthu wentse wa m’dzikoli.
15 Pakuti Yahova walewa kuti, ‘Ine nin’dzacemeresa madzinza yentse ya amambo wa ku norte,Iwo an’dzabwera ndipo ali-wentse an’dzaikha mpando wace wa umamboPa misuwo yakupitira mu Jeruzalemu,M’mbali zentse za mimuro yawoNa m’mizinda yentse ya Djuda.
16 Ine nin’dzawatonga thangwe ra bzinthu bzentse bzakuipa bzomwe iwo adacita,Pakuti iwo adandisiyaNdipo akupereka ntsembe za utsi kuna mirungu inango,Na kugodamira bzinthu bzomwe iwo ambabzikonza na manja yawo.’
17 Tsono iwepo un’funika kukonzeka,Lamuka ndipo ukawauze bzentse bzomwe ndakuuza.
Leka kuwagopaKuti ine ndileke kukucitisa mantha pamaso pawo.
18 Pakuti lero ndakucitisa kukhala mzinda wakulimba,Pilare ya simbi* na mimuro ya kobre* kuti dziko lentseneli lileke kukukunda:Amambo wa Djuda na nduna zawo,Antsembe wawo na wanthu wa m’dzikoli.
19 Ndipo iwo an’dzamenyana nawe,Koma an’dzakukunda liniPakuti ‘Ine ndinawe kuti ndikupulumuse,’ walewa tenepo Yahova.”
Mafala ya m'nyantsi
^ Pinango-pentse dzinali limbathandauza “Yahova Ambakuza.”
^ Ayai, “ndikhadakusankhula kale.”
^ Mafala yace caiyo: “pomwe ukhanati kucoka m’mimba.”
^ Ayai, “ndikhadakuikha kale pambali.”
^ Ayai, “tswaka.”
^ Ayai, “poto ya mulomo ukulu.”
^ Ayai, “fero.”
^ Ayai, “mkuwa.”
