Jeremiya 11:1-23
11 Mafala yomwe Yahova adauza Jeremiya njakuti:
2 “Kauze wanthu wentse kuti atetekere mafala ya mpanganoya.
“Ukalewe mafalaya* kwa wanthu wa ku Djuda na kwa omwe ambakhala ku Jeruzalemu,
3 ndipo ukawauze kuti: ‘Yahova Mulungu wa Jirayeri walewa kuti: “Tsoka kwa munthu omwe an’bvera lini mafala ya mpanganoya,
4 omwe ndidaucita na makolo yanu yakale pa ntsiku yomwe ndidawacosa m’dziko la Edjipito, kucokera m’forno yakusungunusira simbi mwakulewa kuti: ‘Bverani fala langu ndipo citani bzinthu bzentse bzomwe nin’kuuzani; mun’dzakhala wanthu wangu ndipo ine nin’dzakhala Mulungu wanu,
5 ndipo inepano nin’dzateweza mpangano omwe ndidacita na makolo yanu yakale, wakuwapasa dziko lakuyerera mkaka na uci ninga momwe bziriri lero.’”’”
Tenepo ine ndidatawira kuti: “Ameni,* imwe Yahova.”
6 Yahova adandiuza kuti: “Dziwisa mafala yentseneya m’mizinda ya Djuda na m’miseu ya Jeruzalemu kuti: ‘Tetekerani mafala ya mpanganoya ndipo yatewezeni.
7 Pakuti ndidacenjeza makolo yanu yakale kucokera pa ntsiku yomwe ndidawacosa m’dziko la Edjipito mpaka lero, ndipo ndidawauza mwakubwereza-bwereza* kuti: “Bverani fala langu.”
8 Tsono iwo alibe kubvera ne kukhala tceru, m’mbuto mwace ali-wentse wa iwo adapitiriza kuumisa msolo wace, acitewera mtima wace wakuipa. Ndipopa ndidawabweresera mafala yentse ya mpanganoyu yomwe ndidawauza kuti ayabvere, yomwe iwo adalamba kuyateweza.’”
9 Patsogolo pace Yahova adandiuza kuti: “Wanthu wa ku Djuda na omwe ambakhala ku Jeruzalemu apangana kundiphindukira.
10 Iwo abwerera ku bzakuphonya bzomwe makolo yawo yakale yakhacita, pomwe adalamba kubvera mafala yangu. Iwo adatewera mirungu inango aciitumikira. Wanthu wa nyumba ya Jirayeri na wa nyumba ya Djuda alibe kuteweza mpangano omwe ndidacita na makolo yawo yakale.
11 Na tenepo Yahova walewa kuti: ‘Ndiniwabweresera tsoka lomwe iwo an’dzakwanisa lini kulithawa. Iwo akadzakumbira thandizo, ine nin’dzawatetekera lini.
12 Tenepo mizinda ya Djuda na anyakukhala ku Jeruzalemu an’dzayenda kuna mirungu yomwe ambaiperekera ntsembe* ndipo an’dzakakumbira thandizo, tsono mirunguyo in’dzawapulumusa lini pomwe tsokalo lin’dzawafikira.
13 Pakuti mirungu ya Djuda yawanda kwene-kwene ninga mizinda yace ndipo maguwa yomwe adakonzera cinthu cakupasa manyazi* yawanda kwene-kwene ninga miseu ya mu Jeruzalemu, maguwa yakuperekera ntsembe kuna Baala.’
14 “Tsono iwepo* leka kuwapempherera wanthuwa. Leka kuwadandaulira ne kuwapempherera, pakuti nin’dzawabva lini iwo akadzandidandaulira thangwe ra tsoka lomwe lin’dzawagwera.
15 Kodi wanthu wangu wakufunika ana ugo bwanyi bwakukhala pamui pangu,Pomwe azinji wa iwo akucita bzinthu mwakubverana na bzinthu bzakuipa bzomwe iwo akufuna kucita?
Kodi mungakwanise kucitisa kuti tsoka lileke kukufikirani thangwe ra nyama yakupambulika?
Kodi imwepo mun’dzakomedwa pa nthawe imweyi?
16 Yahova akhakucemerani muti wa maolivera wakugudira bwino,Wakudeka na wa bzisapo bzabwino.
Tsono kudabveka kugunda kukulu ndipo iye adaugasa na moto,Iwo adatcola mthambi zace.
17 “Imwe wa nyumba ya Djuda na wa nyumba ya Jirayeri, Yahova wa anyankhondo, ule omwe adakubzalani walewa kuti munigwedwa na tsoka thangwe ra bzakuipa bzomwe mwacita ndipo mwamukalipisa thangwe ra ntsembe zomwe mwapereka kwa Baala.”
18 Imwe Yahova, mudandiuza bzomwe bzikhacitika;Pa nthawe imweyi, imwe Mulungu mudandiwonesa bzomwe iwo akhacita.
19 Ine ndikhali wakuderekha ninga mwana wacimuna wa bira omwe akuyenda kukaphedwa.
Ndikhadziwa lini kuti iwo akhapangana kundicita cinthu cakuipa mwakulewa kuti:
“Mbatipfudzeni mutiyu pabodzi na bzisapo bzace;Ndipo mbatimucoseni ku dziko la wanthu wamoyo,Kuti dzina lace lileke kukumbukiridwa pomwe.”
20 Tsono Yahova wa anyankhondo ambatonga mwacirungamo;Iye ambafufudza mitima ya wanthu na makumbukidwe* yawo ya mkati.
Ndicitiseni kuwona pomwe mukuwalanga,Thangwe mulandu wangu ndausiya m’manja mwanu.
21 Tenepo, ibzi ni bzomwe Yahova walewa kuna wanthu wa ku Anatoti, omwe akufuna kundipha ndipo akulewa kuti: “Leka kulewa profesiya m’dzina la Yahova, thangwe ukapitiriza kucita bzimwebzi, ifepano tin’kupheratu”;
22 tsono Yahova wa anyankhondo walewa kuti: “Inepano ndinimalizana nawo. Maswaka yan’dzafa na xipada, ndipo wana wawo wacimuna na wacikazi an’dzafa na njala.
23 Ndipo palibe ne na m’bodziyo omwe an’dzasala, thangwe nin’dzabweresera tsoka wanthu wa ku Anatoti mu gole lomwe nin’dzawalanga.”
Mafala ya m'nyantsi
^ Bzikuwoneka kuti mafalaya yakhayenda kuna Jeremiya.
^ Ayai, “Bzikhale tenepo.”
^ Mafala yace caiyo: “ndikhalamuka macibese-bese ndiciwacenjeza.”
^ Ayai, “ntsembe ya utsi.”
^ Ayai, “mulungu wakupasa manyazi.”
^ Omwe ni Jeremiya.
^ Mafala yace caiyo: “impso.”
