Jeremiya 12:1-17
12 Imwe Yahova, imwepo ndimwe Mulungu wakulungama.Ndikadandaula kwa imwepo napo ndikambalewa bza katongedwe kanu, imwepo mumbacita bzinthu mwacirungamo.
Tsono n’thangwe ranyi wanthu wakuipa bzinthu bzimbawafambira bwino?Ndipo n’thangwe ranyi wanthu wacinyengo ambakhala mwakusaya thupo?
2 Imwepo mwawabzala ndipo iwo amera mizi,
Iwo akula ndipo abala bzisapo.
Nthawe zentse iwo ambalewa bza imwepo, tsono makumbukidwe yawo yali kutali kwene-kwene na imwe.
3 Tsono imwepo Yahova mumbandidziwa bwino ndipo mumbandiwona;Mudafufudza mtima wangu ndipo mudawona kuti ndine wakubzipereka kwa imwe.
Apambuleni ninga mabira yomwe yakuyenda kukaphedwa,Ndipo akoyereni ntsiku yakudzaphedwa.
4 Kodi dzikoli lin’dzapitiriza kufota mpaka lini?Ndipo mauswa yentse yan’dzauma mpaka lini?
Thangwe ra uipi bwa wanthu wa m’dzikoli,Bzirombo na mbalame bzamala kupfudzidwa.
Pakuti iwo alewa kuti: “Iye akuwona lini bzomwe bzin’dzaticitikira.”
5 Penu umbaneta ukambathamanga na wanthu,Kodi ungakwanise tani kucita mapici yakuthamanga na makavalo?
Napo ukubzibva wakukhotcerereka m’dziko la mtendere,Kodi n’ciyani comwe cin’dzakucitikira ukadzakhala m’thengo lakugudira m’mphepete mwa Jordano?
6 Pakuti napo abale wako caiwo, wana wa pai wako,Akucitira bzinthu mwacinyengo.
Iwo akulewa bzinthu bzakuipa mwakukuwa.
Leka kuwakhulupira,Napo acikuuza bzinthu bzabwino.
7 “Ndasiya nyumba yangu, ndasiyambo utaka bwangu.
Ndapereka wakufunidwa wangu m’manja mwa anyamadulanthaka wace.
8 Utaka bwangu bwakhala ninga mphondolo kwa ine m’thengo.
Wakufunidwa wangu wandilirimira.
Ndipopa ndayamba kumuwenga kwene-kwene.
9 Utaka bwangu bwakhala ninga mbalame ya mawala-mawala yomwe imbadya nyama;Mbalame zinango zaizungulira kuti ziidye.
Imwe bzirombo bzentse bza m’thengo, bwerani, tsonkhananiBwerani mudzadye.
10 Amakabusa azinji adzonga munda wangu wa uva;Iwo aponda-ponda mbuto yangu.
Acitisa mbuto yangu kukhala dambo lakusaya cinthu.
11 Aicitisa kukhala dambo.
Ndipo yauma.Yakhala matere pamaso pangu.
Mbuto yentseneyo yapfudzidwaNdipo palibe omwe anayo basa.
12 Anyakupfudzawo adabwera kucokera m’njira zentse zomwe zimbapita na m’dambo.Pakuti xipada ya Yahova ikupfudza kucokera kuphampha kwa dziko mpaka phampha linango.
Palibe mtendere kwa munthu ali-wentse.
13 Iwo abzala tirigu, koma abvuna minga.
Aphata basa lakunetesa, koma alibe kugumana phindu.
Iwo an’dzacita manyazi na bzakubvuna bzawoThangwe ra ukali bukulu bwa Yahova.”
14 Pakulewa bza avizinyu wangu wentse wakuipa omwe akupfudza utaka bwangu bomwe ndidapasa wanthu wangu Ajirayeri, Yahova walewa kuti: “Nin’dzawazula m’dziko lawo ndipo nin’dzazulambo nyumba ya Djuda yomwe iri pakati pawo.
15 Tsono ndikadzawazula, nin’dzawabvera pomwe ntsisi ndipo nin’dzabwezera ali-wentse wa iwo utaka bwace na mbuto yace.”
16 “Ndipo iwo akadzacita nyongo yakudziwa njira za wanthu wangu na kulumbira m’dzina langu kuti: ‘Pana Yahova Mulungu wamoyo,’ ninga momwe iwo adapfunzisira wanthu wangu kulumbira m’dzina la Baala, iwo an’dzakhala pakati pa wanthu wangu.
17 Tsono iwo akadzalamba kubvera, nin’dzazula mtundu umweyo, nin’dzauzula na kuupfudza,” walewa tenepo Yahova.
