Jeremiya 13:1-27
13 Yahova adandiuza kuti: “Ndoko ukagule bande la* linyo* ndipo ulimange m’ciuno mwako, tsono leka kulitotesa.”
2 Tenepo ndidagula bandero mwakubverana na momwe Yahova akhadandiuzira, ndipo ndidalimanga m’ciuno mwangu.
3 Yahova adalewalewa nande pomwe kaciwiri kuti:
4 “Tenga bande lomwe wagula ucilimanga m’ciuno lire, ndipo ndoko ku Eufrate ucikalibisa mu mphako.”
5 Tenepo ine ndidayenda, ndipo ndidakabisa bandero pafupi na mkulo wa Eufrate ninga momwe Yahova akhadandiuzira.
6 Tsono pomwe padapita ntsiku zizinji, Yahova adandiuza kuti: “Lamuka, ndoko ku mkulo wa Eufrate ndipo katenge bande lomwe ndidakuuza kuti ukalibise lire.”
7 Tenepo ndidayenda ku Eufrate, ndipo ndidafukula bandero pa mbuto yomwe ndikhadalibisa ire, ndipo ndidawona kuti likhadadzongeka, mwakuti likhalibe na basalo.
8 Yahova adalewalewa nande pomwe kuti:
9 “Yahova walewa kuti: ‘Mwa njira ibodzi-bodziyi, kubzikuza kwa Djuda na kubzikuza kwa Jeruzalemu kun’dzakhala ninga banderi.
10 Wanthu wakuipawa, omwe ambalamba kubvera mafala yangu, ndipo ambacita bzomwe an’funa na kutewera mirungu inango, kuitumikira na kuigodamira, an’dzakhala wakusaya basa ninga banderi.’
11 ‘Pakuti ninga momwe bande limbaphatirira m’ciuno mwa munthu, inepano ndacitisa nyumba yentse ya Jirayeri na ya Djuda kundiphatirira, kuti akhale kwa ine wanthu, dzina,* ulemerero na cinthu cakudeka. Tsono iwo alibe kubvera,’ walewa tenepo Yahova.
12 “Ndipo iwepo un’funika kuwauza pomwe kuti: ‘Yahova Mulungu wa Jirayeri walewa kuti: “Mun’funika kudzaza mitsuko yentse mikulu-mikulu na vinyu.”’ Tsono iwo an’dzakutawira kuti: ‘Kodi ifepano tin’dziwa lini kuti tin’funika kudzaza mitsuko yentse mikulu-mikulu na vinyu?’
13 Tenepo auze kuti: ‘Yahova walewa kuti: “Nin’ledzeresa wentse omwe ambakhala m’dzikoli, amambo omwe adakhala pa mpando wa umambo wa Davide, antsembe, aprofeta na wentse omwe ambakhala mu Jeruzalemu.
14 Ndipo nin’dzawamenyesera kwa winango na mwanzace, ndipo nin’dzacita bzibodzi-bodzibzo kwa azipai na wana. Nin’dzawadekera lini mtima ne kuwabvera ntsisi ndipo palibe cinthu comwe cin’dzanditazisa kuwapfudza,’ walewa tenepo Yahova.”
15 Bvani ndipo tetekerani.
Lekani kubzikuza, pakuti Yahova walewa.
16 Pasani ulemerero Yahova Mulungu wanu,Pomwe iye akanati kubweresa mdimaNa pomwe nzayo zanu zikanati kukhukhumudwa m’mapiri usiku.
Imwepo mun’dzadikhirira ceza,Tsono iye an’dzabweresa mdima;Ndipo an’dzacitisa mdimayo kukhala mdima wa ndiweyani.
17 Tsono mukalamba kubva,Nin’dzalira mwakabise-bise thangwe ra kubzikuza kwanu.
Nin’dzacoka misozi mizinji ndipo maso yangu yan’dzayerera misozi,Pakuti mabira ya Yahova yatengedwa kuyenda ku ukapolo.
18 Uza mambo na mai wace kuti: ‘Khalani pantsi,Pakuti korowa yanu yakudeka in’dzagwa kucokera mu msolo mwanu.’
19 Mizinda ya ku suli yafungidwa,* palibe omwe angaifungule.
Wanthu wentse wa ku Djuda ayendesedwa ku ukapolo, wentsene ayendesedwa ku ukapolo ndipo palibe omwe wasala.
20 Nyang’anisa uwone wanthu omwe akubwera kucokera ku norte.
Bziri kuponi bzifuwo bzomwe adakupasa, mabira yako yakudeka yale?
21 Kodi un’dzalewa ciyani cirango cako cikadzakufikiraKucokera kwa axamwali wako wa pamtima omwe ukhabverana nawo kuyambira paciyambi?
Kodi un’dzabva lini kuwawa ninga momwe mkazi ambabvera pakubereka?
22 Ukadzalewa mu mtima mwako kuti: ‘Thangwe ranyi bzinthu bzimwebzi bzandicitikira?’
Thangwe ra kuwanda kwa pikado zako, ndipopa wakhundulidwa saya yako
Ndipo wabva kuwawa akatende wako.
23 Kodi Mkuxe* angacinje kore ya thupi lace ayai nyalugwe angacinje mawala yace?
Penu angakwanise kucita bzimwebzi,Ndiye kuti imwepombo omwe mudapfunzisidwa kucita bzinthu bzakuipa mungakwanisembo kucita bzinthu bzabwino.
24 Ndipopa nin’kumwazani ninga mungu omwe ukumbuluka na mphepo ya m’dambo.
25 Yahova walewa kuti: “Bzimwebzi ni bzomwe bzin’dzakucitikira ndipo ni mbali yako yomwe nin’dzakupasaThangwe wandiyebwa ndipo wathemba kunama.”
26 Tenepo nin’dzakundula saya yako mpaka kumpsinkha nkhope yako,Ndipo wanthu an’dzakuwonera.
27 Makhalidwe yako ya uputa na cikhumbo cako comwe ciri ninga kavalo wacikazi omwe akusirira kavalo wacimunaNa uputa bwako bwakunyantsa,* an’dzabuwonambo.
M’tumapiri tung’ono-tung’ono m’thengoNdidawona makhalidwe yako yakunyantsa.
Tsoka kwa iwe Jeruzalemu!
Kodi un’dzakhala wakupswipa mpaka lini?”
Mafala ya m'nyantsi
^ Ayai, “sintu ya.”
^ Linyo imbalimidwa kuyambira kale-kale ndipo imbaphatisidwa basa pa kukonza bzakubvala.
^ Ayai, “mbiri.”
^ Ayai, “yazunguliridwa.”
^ Ayai, “munthu wa ku Etiyopiya.”
^ Ayai, “bwakupasa manyazi.”
