Jeremiya 14:1-22
14 Thangwe ra kunesa kwa nvula, Yahova adauza Jeremiya kuti:
2 Djuda akulira ndipo misuwo yace yapfudzidwa,
Iyo yasunama ndipo yagwa pantsi,Ndipo kulira kwace kukubveka mu Jeruzalemu.
3 Azimbuya wawo atuma anyabasa kuti akatunge madzi,
Iwo ayenda mpaka pa micera, tsono alibe kugumana madzi.
Iwo abwerera na bzombo bzakusaya madzi.
Iwo ana manyazi ndipo asunama,Ndipo ampsinkha misolo yawo.
4 Pakuti pantsi pakhekhemuka,Thangwe ra kunesa kwa nvula m’dzikoli,Alimi agoboka m’mabondo ndipo ampsinkha misolo yawo.
5 Napo bawala m’thengo ambasiya mwana wace omwe wabadwa tsapanopaThangwe mulibe mauswa.
6 Mabulu ya m’thengo yambaima m’tumapiri tung’ono-tung’ono twakusaya mauswa.
Yakupuma mwakuneseka ninga mphumphi;Maso yawo yakuwona lini bwino thangwe kulibe cakudya.
7 Napo bzakuphonya bzathu caibzo bzikulatiza kuti tina mulandu,Imwe Yahova, citani bzinthu mwakubverana na dzina lanu.
Pakuti bzicito bzathu bzakusaya kukhulupirika mpsizinji,Ndipo takuphonyerani.
8 Imwe cidikhiro ca Ajirayeri, Mpulumusi wawo pa nthawe za mabvuto,Thangwe ranyi mukucita bzinthu ninga mulendo m’dzikoli,Ninga munthu omwe ali paulendo omwe waima usiku kuti agone?
9 Thangwe ranyi mukucita bzinthu ninga munthu omwe wamalidwa nzeru,Ninga mcikunda omwe angakwanise lini kupulumusa munthu?
Pakuti imwepo muli pakati pathu, Imwe Yahova,Ndipo ife tikudziwika na dzina lanu.
Lekani kutisiya.
10 Pakulewa bza wanthuwa, Yahova walewa kuti: “Iwo ambafuna kufamba-famba ndipo ambapumisa lini minyendo yawo. Ndipopa Yahova ambakomedwa lini nawo. Tsapano iye an’kumbukira bzakuphonya bzawo ndipo an’dzawalanga thangwe ra pikado zawo.”
11 Na tenepo Yahova adandiuza kuti: “Leka kuwapempherera wanthuwa kuti bzinthu bzileke kuwafambira bwino.
12 Iwo akabzimana kudya,* ine nimbatetekera lini kudandaula kwawo. Iwo akambapereka ntsembe zakucita kutentha na ntsembe za bzinthu bza m’munda, ine nimbakomedwa lini nazo, pakuti nin’dzawapha na xipada, njala na cisi.”*
13 Na bzimwebzi ine ndidati: “Maine, imwe Yahova Mbuya Mkululetu, aprofeta akuuza wanthu kuti: ‘Imwepo mun’dzafa lini na xipada ne na njala, pakuti ine nin’dzakupasani mtendere caiwo m’dziko lino.’”
14 Ndipo Yahova adanditawira kuti: “Aprofeta akulewa maprofesiya yakunama m’dzina langu. Ine ndiribe kuwatuma, ne ndiribe kuwapasa lamulo liri-lentse ne ndiribe kulewalewa nawo. Iwo akulewa maprofesiya ya m’masomphenya yakunama, vima-vima wakusaya basa na kunama kwa mitima yawo.
15 Tenepo, pakulewa bza aprofeta omwe akulewa maprofesiya m’dzina langu uko ndiribe kuwatuma, ndipo akulewa kuti pan’dzawoneka lini xipada ne njala m’dziko lino, Yahova akulewa kuti: ‘Aprofeta amwewo an’dzafa na njala na xipada.
16 Ndipo wanthu omwe adatetekera maprofesiya yawoyo an’dzathusidwa m’miseu ya Jeruzalemu thangwe ra njala na xipada, ndipo pan’dzawoneka lini munthu wakupendesa iwo, azikazawo, wana wawo wacimuna ne wacikazi, pakuti nin’dzawabweresera tsoka lomwe ndakuthemera kwa iwo.’
17 “Auze mafala aya:‘Maso yangu yapitirize kucoka misozi usiku na masikati,Pakuti mwana wacikazi wa wanthu wangu omwe ni dende, wakundidwiratu ndipo wapfudzidwa,Ndipo kudzongeka kwace n’kukulu kwene-kwene.
18 Ndikayenda m’thengo,Ndikuwona wanthu omwe adaphedwa na xipada!
Ndipo ndikapita mu mzinda,Ndikuwona wanthu omwe akuduwala thangwe ra njala.
Aprofeta na antsembe akufamba-famba m’dziko lomwe ambalidziwa lini.’”
19 Kodi Djuda mwamulambiratu, ayai mwanyantsidwa na Ziyoni?
Thangwe ranyi mwatipweteka tenepayu, mu njira yomwe tin’pola lini pomwe?
Tikhadikhirira mtendere, tsono palibe kubwera bzinthu bzabwino,Tikhadikhirira nthawe yakupozedwa, koma tikuwona bzinthu bzakugopswa bzokha-bzokha!
20 Imwe Yahova, ifepano tazindikira kuphonya kwathu,Na kuphonya kwa makolo yathu yakale,Pakuti takuphonyerani.
21 Thangwe ra dzina lanu, lekani kutilamba;Lekani kunyoza mpando wanu wa ulemerero.
Kumbukirani mpangano omwe mudacita nafe, ndipo lekani kuupfudza.
22 Kodi bzifanikiso bzakusaya basa bza wanthu wa mitundu bzingabvumbise nvula,Ayai kudzulu kokha kungakwanise kubvumbisa nvula izinji?
Imwe Yahova Mulungu wathu, kodi ndimwe lini mwekha omwe mungakwanise kucita bzimwebzi?
Ife timbadikhirira imwepo,Pakuti ndimwe mwekha omwe mumbakwanisa kucita bzinthu bzintsenebzi.
