Jeremiya 17:1-27
17 “Pikado ya Djuda yanembedwa na cakunembera ca simbi.*
Yanembedwa mu mtima mwawo na ponta ya diyamanteNdipo yanembedwambo m’manyanga ya m’maguwa yawo ya ntsembe.
2 Napo wana wawo akukumbukira maguwa yawo ya ntsembe na maposto yawo yakupambulika,*Kumbali kwa muti wakugudira na m’tumapiri tung’ono-tung’ono,
3 M’mapiri kunja kwa mzinda.
Bzinthu bzanu na cuma canu centse nin’dzabzipereka ninga bzinthu bzakupamba,Inde m’mbuto zanu zakunamatira* thangwe ra pikado yomwe mudacita m’mphimpha zentse.
4 Imwepo mun’dzalamba mwekha utaka bomwe ndidakupasani,
Nin’dzakucitisani kuti mutumikire anyamadulanthaka wanu m’dziko lomwe mumbalidziwa lini,Pakuti imwepo mwagasa ukali bwangu ninga moto.*
Ndipo bun’dzagaka mpaka kale-kale.
5 Yahova walewa kuti:
“Wakutembereredwa ni munthu* omwe akuthemba wanthu,Omwe ambathemba mphanvu za wanthuNdipo mtima wace umbasiya Yahova.
6 Iye an’dzakhala ninga muti omwe uli okha m’dambo.
Iye an’dzawona lini bzinthu bzabwino bzikabwera,Koma an’dzakhala m’dziko lakuuma m’dambo,Dziko la munyu, lomwe palibe omwe angalikhale.
7 Wakusimbidwa ni munthu* omwe ambathemba Yahova,Omwe ambakhulupira Yahova.
8 Iye an’dzakhala ninga muti wakubzalidwa m’mphepete mwa madzi,Ndipo mizi yace imbayenda mpaka m’madzi.
Nthawe yakupsa ikafika, iye an’dzazindikira lini,Ndipo masamba yace yan’dzakhala yadapswipirira nthawe zentse.
M’gole la cirala iye an’dzacita lini thupo,Ne an’dzasiya lini kubala bzisapo.
9 Mtima ngwakupumpsa* kwene-kwene kuposa cinthu ciri-centse, ndipo ungacite cinthu ciri-centse cakuipa.*
Mbani angaudziwe?
10 Ine Yahova nimbafufudza mu mtima,Nimbawona makumbukidwe* ya mkati,Kuti ndibwezere ali-wentse mwakubverana na makhalidwe yace,Ali-wentse mwakubverana na mabasa yace.
11 Ninga nkhwale yomwe imbabwamira mazai yomwe iyo iribe kuthusa,Mpsibodzi-bodzimbo na munthu omwe ambakhala na cuma mwacinyengo.*
Cumaco cin’dzamala pakati pa moyo wace,Ndipo pakumalizira pace iye an’dzakhala munthu wakusaya nzeru.”
12 Mbuto yathu yakucena ni mpando wa umambo wa ulemerero,Omwe udakuzidwa kucokera pakuyamba.
13 Imwe Yahova, cidikhiro ca Jirayeri,Wentse omwe ambakusiyani an’dzapasidwa manyazi.
Omwe ambakupandukirani* madzina yawo yan’dzanembedwa pa pfumbi,Thangwe adasiya Yahova, omwe ali ninga madzi yamoyo.
14 Imwe Yahova, ndipozeni ndipo nin’dzapola,
Ndipulumuseni, ndipo nin’dzapulumuka,Pakuti imwe ndimwe ule omwe nimbamutumbiza.
15 Onani! Pana wanthu omwe akundiuza kuti:
“Kodi yali kuponi mafala ya Yahova?
Mbayakwanise ndipo!”
16 Tsono ine ndiribe kusiya kukutewerani ninga makabusa,Ndipo ndiribe kukhumba ntsiku ya tsoka.
Imwepo mumbadziwa bzinthu bzentse bzomwe mulomo wangu walewa;Bzentsene bzidacitika imwepo mukuwona.
17 Lekani kundigopswa,
Imwepo ndimwe mbuto yangu yakuthawira pa ntsiku ya tsoka.
18 Kuti wale omwe ambanditewera m’mbuyo apasidwe manyazi,Ndipo ine ndileke kupasidwa manyazi.
Kuti iwo abve mantha,Tsono ine ndileke kubva mantha.
Abweresereni ntsiku ya tsoka,Ndipo apfudzeni, muciwamalisiratu.*
19 Yahova wandiuza kuti: “Ndoko mpaka pa msuwo wa wana wa wanthu, msuwo omwe amambo wa Djuda ambapita acibula nawo na ku misuwo inango yentse ya Jeruzalemu.
20 Kawauze kuti: ‘Tetekerani mafala ya Yahova, imwe amambo wa m’Djuda, imwe wanthu wentse wa m’Djuda na mwentse omwe mumbakhala mu Jeruzalemu, omwe mumbapita na pa misuwoyi.
21 Yahova walewa kuti: “Citani mphole kuti muleke kunyamula mtolo uli-wentse pa ntsiku ya Sabudu ne kupita nawo pa misuwo ya Jeruzalemu.
22 Lekani kubweresa mtolo uli-wentse kucokera kumui kwanu pa ntsiku ya Sabudu, ndipo lekani kuphata basa liri-lentse. Ntsiku ya Sabudu in’funika kukhala yakupambulika ninga momwe ndidauzira makolo yanu yakale.
23 Tsono iwo alibe kundibvera ne kunditetekera. Adaumisa mtima wawo* acilamba kundibvera, ndipo adalambambo cirango cangu.”’
24 Yahova walewa kuti: “‘“Tsono imwepo mukandibvera mwakukhulupirika, mwakuleka kupita na mitolo pa misuwo ya mzindayo pa ntsiku ya Sabudu na kupitiriza kumbawona ntsiku ya Sabudu kukhala yakupambulika, mwakuleka kuphata basa liri-lentse,
25 amambo na nduna omwe adakhala pa mpando wa umambo wa Davide an’dzapitambo na pa misuwo ya mu mzindayu akufamba na ngolo na pa makavalo. Iwo pabodzi na nduna zawo, amuna wa ku Djuda na anyakukhala mu Jeruzalemu, ndipo mzindayu un’dzakhalidwa na wanthu mpaka kale-kale.
26 Wanthu an’dzabwera kucokera m’mizinda ya Djuda, pafupi na mzinda wa Jeruzalemu, m’dziko la Benjamini, m’cigwa,* m’mphimpha za mapiri na ku Negebe.* Iwo an’dzabweresa pa nyumba ya Yahova ntsembe zakucita kutentha, ntsembe zinango, ntsembe ya bzinthu bza m’munda, ntsonono zakununtcira na ntsembe za kutenda.
27 “‘“Tsono mukasaya kundibvera na kusiya kumbawona ntsiku ya Sabudu kukhala yakupambulika, mucimbanyamula mitolo na kumbapita nayo m’misuwo ya Jeruzalemu pa ntsiku ya Sabudu, nin’dzatentha na moto misuwo yanu. Motoyo un’dzapfudza prediyo zakulimba za Jeruzalemu ndipo un’dzathimisidwa lini.”’”
Mafala ya m'nyantsi
^ Ayai, “fero.”
^ Onani Kafotokozedwe ka Mafala Manango.
^ Mafala yace caiyo: “mbuto za padzulu.”
^ Ayai pinango, “Pakuti ninga moto, imwepo mwagaka mu ukali bwangu.”
^ Ayai, “munthu wamphanvu.”
^ Ayai, “munthu wamphanvu.”
^ Ayai, “ngwacinyengo.”
^ Ayai pinango, “wakusaya kupozeka.”
^ Mafala yace caiyo: “impso.”
^ Ayai, “kugumana cuma mwakusaya cirungamo.”
^ Ayai, “ambakusiyani.” Mafala yace caiyo: “omwe ambandipandukira, pinango-pentse omwe akulewedwayu ni Yahova.
^ Ayai, “muciwapfudza kawiri-kentse.”
^ Mafala yace caiyo: “adaumisa khosi lawo.”
^ Ayai, “m’gowa.”
^ Ayai, “na ku suli.”
