Jeremiya 18:1-23
18 Yahova adauza Jeremiya kuti:
2 “Lamuka, ndoko kumui kwa nyakuumba bzinthu na dongo ndipo kumweko nin’kakuuza mafala yangu.”
3 Tenepo ndidayenda kumui kwa nyakuumbayo, ndipo ndidamugumana akucita basa lace lakuumba.
4 Tsono combo ca dongo comwe akhaumbaco cidadzongeka m’manja mwace, ndipopa nyakuumbayo adakanya-kanya pomwe dongolo, aciumba pomwe combo cinango comwe cidamudekera.
5 Patsogolo pace Yahova adandiuza kuti:
6 “‘Imwe wa m’nyumba ya Jirayeri, kodi inepano ningakwanise lini kukucitani ninga momwe wacitira nyakuumbayu?’ walewa tenepo Yahova. ‘Ninga dongo lomwe liri m’manja mwa nyakuumba, imwepombo muli tenepoyo m’manja mwangu, imwe wa m’nyumba ya Jirayeri.
7 Nthawe zentse ndikambalewa bza kuzula, kugumula na kupfudza mtundu wa wanthu ayai umambo,
8 ndipo mtunduyo ukasiya kucita bzinthu bzakuipa bzomwe ndikhadalewa, nin’dzacinja makumbukidwe yangu pakulewa bza tsoka lomwe ndikhafuna kuubweresera.
9 Ndipo nthawe zentse ndikambalewa bza kumanga na kubzala mtundu ayai umambo,
10 ndipo mtunduyo ukacita bzinthu bzakuipa pamaso pangu na kuleka kubvera fala langu, nin’dzacinja makumbukidwe yangu pakulewa bza bzinthu bzabwino bzomwe ndikhafuna kuucitira.’
11 “Ndaphata minyendo, uza wanthu wa ku Djuda na anyakukhala ku Jeruzalemu kuti: ‘Yahova walewa kuti: “Ndikukonzekera kukubwereserani tsoka, ndipo ndikukumbukira momwe ningakulangireni. Ndaphata minyendo, siyani njira zanu zakuipa, cinjani makhalidwe yanu na bzicito bzanu.”’”
12 Tsono iwo adalewa kuti: “Bziribe basa ibzo, pakuti ife tin’cita bzinthu mwakubverana na makumbukidwe yathu, ndipo ali-wentse wa ifepano an’cita bzinthu mwakubverana na mtima wace wakuipa.”
13 Tenepo Yahova walewa kuti:
“Ndaphata minyendo, bvunza pakati pa mitundu ya wanthu kuti:
Mbani adabva kale bzinthu ninga bzimwebzi?
Dende la mu Jirayeri lacita cinthu cakuipisisa.
14 Kodi pfulere la m’mapiri ya ku Lebanoni lingamale m’minyala mwace?
Kodi madzi yakudjedjera yakucokera kutali yan’dzauma?
15 Tsono wanthu wangu andiyebwa,
Pakuti akupereka ntsembe* ku bzinthu bzakusaya basa,Ndipo akucitisa wanthu winango kukhukhumudwa mu njira zawo, mu njira zakale-kaleNa kuwacitisa kufamba mu njira zakuphonyeka, zomwe n’zakucereka-cereka,*
16 Kuti acitise dziko lako kukhala cinthu cakugopswaNa cinthu cakuthemera kuliziridwa muluzi mpaka kale-kale.
Wentse omwe an’dzapita na m’mwemo an’dzanyang’anisa na mantha ndipo an’dzakwetedza msolo.
17 Nin’dzawabalalisa pamaso pa nyamadulanthaka wawo ninga mphepo ya kumabvadzuwa.
Nin’dzawalinza ngoto m’mbuto mwa kuwanyang’anisa pa ntsiku yawo ya tsoka.”
18 Tsono iwo adalewa kuti: “Bwerani, mbatiyendeni tikapangane bzinthu bzakuipa bzomwe tin’funa kucitira Jeremiya, pakuti lamulo* la antsembe wathu, malango ya adziwi wathu na mafala ya aprofeta wathu bzin’dzamala lini pomwe. Mbatimunamizireni ndipo tileke kutetekera bzomwe iye an’lewa.”
19 Imwe Yahova nditetekereni,Ndipo bvani bzomwe anyamadulanthaka wangu akulewa.
20 Kodi cabwino cin’funika kubwezeredwa na cakuipa?
Iwo acera cidindi kuti andiphe.*
Kumbukirani kuti ndikhali pamaso panu kuti ndilewe bzabwino pakulewa bza iwo,Kuti ukali bwanu buwacokere.
21 Tenepo citisani kuti wana wawo wacimuna afe na njala,Ndipo asiyeni aphedwe na xipada.
Azikazawo afedwe wana wawo wacimuna na azibayawo,
Azimuna wawo afe na matenda yakugopswa,Ndipo maswaka yawo yafe na xipada ku nkhondo.
22 M’nyumba zawo mubveke kukuwaMukawabweresera anyakupamba mwadzidzidzi.
Pakuti iwo acera cidindi kuti andiphe,Ndipo anditeyera msampha kuti andimange nawo.
23 Tsono imwe Yahova,Imwepo mukudziwa bzinthu bzentse bzakuipa bzomwe iwo akupangana kuti andiphe.
Lekani kuwalekerera bzakuphonya bzawo,Ndipo lekani kupfudza pikado yawo pamaso panu,
Iwo agwe pamaso panu,Mukadzawalatiza ukali bwanu kuti muwalange.
Mafala ya m'nyantsi
^ Ayai, “ntsembe ya utsi.”
^ Ayai, “zomwe ziribe kukonzedwa.”
^ Ayai, “malango.”
^ Ayai, “kuti acose moyo wangu.”
