Jeremiya 19:1-15
19 Yahova walewa kuti: “Ndoko ukagule mtsuko kwa nyakuumba. Tenga atsogoleri winango wa wanthu na akulu-akulu winango wa antsembe,
2 ndipo ndoko ku cigwa ca Mwana wa Hinomu, pa msuwo wa Cipata ca Anyaphale, ndipo ukalewe kumweko mafala yomwe nin’kuuza.
3 Ukalewe kuti: ‘Tetekerani mafala ya Yahova, imwe amambo wa Djuda na anyakukhala mu Jeruzalemu. Yahova wa anyankhondo, Mulungu wa Jirayeri walewa kuti:
“‘“Tsapanopapa nin’bweresa tsoka pa mbuto ino, lomwe lin’dzagodesa makutu ya wale omwe anilibva.
4 Nin’cita bzimwebzi thangwe iwo adandisiya ndipo adacitisa mbuto ino kusaya kuzindikiridwa. Pa mbuto ino, iwo akupereka ntsembe kwa mirungu inango yomwe ne iwo, ne makolo yawo yakale ne amambo wa Djuda alibe kuidziwa, ndipo adzaza mbuto ino na mulopa wa wanthu wakusaya mulandu.
5 Iwo adamangira Baala mbuto zapadzulu kuti ambatenthere wana wawo wacimuna pa moto ninga ntsembe kwa Baala, bzinthu bzomwe ndiribe kuwauza kuti acite ayai kulewa ndipo ne ndikhanati kale kubzikumbukira mu mtima mwangu.”’
6 “‘“Tenepo, zikufika ntsiku zomwe mbutoyi in’dzacemeredwa lini pomwe kuti Tofeti ayai Cigwa ca Mwana wa Hinomu, koma in’dzacemeredwa kuti Cigwa Cakuphera Wanthu,” walewa tenepo Yahova.
7 “Bzomwe wanthu wa ku Djuda na Jeruzalemu an’funa kucita pa mbuto ino, nin’dzacitisa kuti bzitazike ndipo nin’dzacitisa kuti aphedwe na xipada pamaso pa anyamadulanthaka wawo na m’manja mwa wale omwe akuwanyang’ana kuti awaphe. Ndipo nin’dzapereka mathupi yawo kuti yakhale cakudya kwa mbalame na kwa bzirombo bza pa dziko.
8 Nin’citisa mzindayu kukhala cinthu cakugopswa na cinthu cakuthemera kuliziridwa muluzi. Wentse omwe an’dzapita na m’mwemu an’dzanyang’anisa na mantha ndipo an’dzaliza muluzi thangwe ra matsoka yace yentse.
9 Nin’dzawacitisa kudya wana wawo wacimuna na wacikazi, ndipo ali-wentse an’dzadya mwanzace, thangwe ra kusaya cidikhiro akadzazunguliridwa na anyamadulanthaka wawo pabodzi na wale omwe akuwanyang’ana kuti awaphe.”’
10 “Tenepo uswe mtsuko pomwe wanthu omwe wayenda nawowo akuwona,
11 ndipo uwauze kuti: ‘Yahova wa anyankhondo walewa kuti: “Nin’dzapfudza wanthuwa pabodzi na mzindayu ninga momwe munthu ambaswera mtsuko omwe ungadzakonzeke lini pomwe. Iwo an’dzapendesa anyakufa ku Tofeti mpaka kudzasaya mbuto ya kuwapendesera.”’
12 “‘Bzimwebzi ni bzomwe nin’dzacita na mbuto ino pabodzi na wanthu wentse omwe akukhala m’mwemu kuti mzindayu ukhale ninga Tofeti,’ walewa tenepo Yahova.
13 ‘Ndipo nyumba za mu Jeruzalemu na za amambo wa Djuda zin’dzakhala zakupswipa ninga mbuto ino ya Tofeti, inde, nyumba zentse zomwe pa ntsodzi zace iwo akhaperekera ntsembe kuna bzinthu bzentse bzakudzulu,* ndipo akhaperekerambo ntsembe za vinyu kwa mirungu inango.’”
14 Pomwe Jeremiya adabwerera ku Tofeti, komwe Yahova akhadamutuma kuti akalewe maprofesiya, iye adaima m’khonde la nyumba ya Yahova ndipo adauza wanthu wentse kuti:
15 “Yahova wa anyankhondo, Mulungu wa Jirayeri walewa kuti: ‘Nin’bweresera tsoka mzindayu na wentse omwe akukhala m’mwemu, tsoka lomwe ndikhadalewa kuti ndiniwabweresera, thangwe iwo aumisa mitima yawo kuti aleke kubvera mafala yangu.’”
Mafala ya m'nyantsi
^ Mafala yace caiyo: “anyankhondo wentse wakudzulu.”
