Jeremiya 2:1-37
2 Yahova adalewalewa nande kuti:
2 “Ndoko ndipo kauze wanthu wa mu Jeruzalemu kuti: ‘Yahova walewa kuti:
“Ndikukumbukira kubzipereka kwako komwe* udakulatiza pomwe ukhali tswaka,Na lufoyi lomwe udalilatiza pomwe ukhanati kulowodwa na ine,Na momwe ukhanditewerera m’dambo,Dziko lakusaya kubzalidwa.
3 Jirayeri akhali wakucena pamaso pa Yahova, bzisapo bzace bzakuyamba kubvunidwa.”’
‘Wanthu wentse omwe akhayezera kumupfudza, akhakhala na mulandu,
Akhagumana na tsoka,’ walewa tenepo Yahova.”
4 Imwe wanthu wa m’nyumba ya Djakobo,Na wanthu wentse wa m’nyumba ya Jirayeri, tetekerani mafala ya Yahova.
5 Yahova walewa kuti:
“Kodi makolo yanu yakale yadawona bzinthu bziponi bzakuipa kwa ine,Kuti andifundukire tenepaNakuti anamate bzifanikiso bzakusaya basa iwombo acikhala bzinthu bzakusaya basa?
6 Iwo alibe kubvunza kuti: ‘Ali kuponi Yahova,Ule omwe adaticosa m’dziko la Edjipito,Omwe adatitsogolera m’dambo,Dziko lakuuma na la madindi,Dziko lakusaya madzi na la mdima ukulu,Dziko lomwe limbapitidwa lini na munthu ali-wentseLomwe palibe omwe ambalikhala?’
7 Ine ndidakubweresani m’dziko la minda ya miti ya bzisapo,Kuti mudye bzisapo bzace na kukomedwa na bzinthu bzace bzabwino.
Tsono imwepo mudafika, mucipswipiza dziko langu;Utaka bwangu mudabucitisa kukhala cinthu cakunyantsa.
8 Antsembe alibe kubvunza kuti: ‘Ali kuponi Yahova?’
Wale omwe ambaphata basa na lamulo alibe kundidziwa,Amakabusa adandiphindukiraAprofeta adalewa maprofesiya m’dzina la BaalaNdipo adatewera wale omwe angathandize lini munthu.
9 ‘Ndipopa nin’pitiriza kukupasani mulandu,Ndipo nin’dzapasambo mulandu azukulu wanu,’ walewa tenepo Yahova.
10 ‘Yambukani nyanza mpaka ku bzigwa bza* Kitimu kuti muwone.
Tumizani munthu ku Kedari kuti muwone bwino;Onani penu bzidacitika kale bzinthu ninga bzimwebzi.
11 Kodi iripo mitundu inango ya wanthu yomwe idasiya mirungu yawo icinamata mirungu inango yomwe ni mirungu lini?
Tsono wanthu wangu caiwo apereka ulemerero bwangu kwa mirungu yakusaya basa.
12 Nyang’anisani bzinthu bzimwebzi mwakudabwa,Imwe omwe muli kudzulu;Tetemerani na mantha,’ walewa tenepo Yahova.
13 ‘Pakuti wanthu wangu acita bzinthu bziwiri bzakuipa ibzi:
Andisiya ine, ntsantsa ya madzi yamoyo.Ndipo acera* micera,Micera yomwe imbakoya lini madzi.’
14 ‘Kodi Jirayeri ni mtumiki, ayai ni kapolo omwe wabadwira pamui?
Tsono n’thangwe ranyi iye wapambidwa?
15 Mphondolo zalirima thangwe ra iye,Zalira mwakukuwa.
Zacitisa dziko lace kukhala cinthu cakugopswa.
Mizinda yace yatenthedwa, icisala iribe wanthu.
16 Wanthu wa ku Nofi* na wa ku Tapanesi adasenga mu msolo mwako acikusiya na mpala.
17 Kodi mabvuto yomwe ukugumana nayoya, ulibe kuyanyosa wekhaThangwe udasiya Yahova Mulungu wakoPomwe iye akhakutsogolera mu njira?
18 Tsono thangwe ranyi un’funa kuyenda ku EdjipitoKuti ukamwe madzi ya ku Sihori?*
Thangwe ranyi un’funa kuyenda ku AsiriyaKuti ukamwe madzi ya mu Mkulo?*
19 Bzicito bzako bzakuipa bzikhafunika kukulungamiza,Ndipo kusaya kukhulupirika kwako kukhafunika kukutsimula.
Dziwa ndipo uwone kuti mpsakuipa na bzakuwawaKusiya Yahova Mulungu wako;Iwepo umbandigopa lini,’ walewa tenepo Yahova Mbuya Mkululetu wa anyankhondo.
20 ‘Pakuti kale-kale ndidagwata-gwata djoki lakoNdipo ndidagwatambo makorenti yako.
Tsono iwepo udalewa kuti: “Nin’kutumikirani lini.”
Ndipopa m’tumapiri tung’ono-tung’ono na pantsi pa muti wakugudiraIwepo ukhagona pantsi kuti ucite uputa.
21 Ndidakubzala ninga muti wa uva bufuira, yomwe ni mbeu yabwino;Kodi udasandulika tani pamaso pangu, ucikhala mthambi za uva bwakuwawa?’
22 ‘Napo ucisamba na soda na sabau izinji,M’maso mwangu, iwepo ukupitiriza kukhala wakupswipa thangwe ra bzakuphonya bzako,’ walewa tenepo Yahova Mbuya Mkululetu.
23 Kodi ungalewe tani kuti: ‘Ndiribe kubzipswipiza.
Ndiribe kunamata Baala’?
Ona momwe udacitira bzinthu m’cigwa.*
Kumbukira bzomwe udacita.
Iwepo uli ninga ngamira ing’ono yacikazi yomwe imbathamanga kwene-kwene,Yomwe imbathamanga uku na uku ndipo imbadziwa lini komwe ikuyenda,
24 Bulu mkazi wa m’thengo omwe adazolowera kukhala m’thengo,Omwe ana cikhumbo camphanvu.
Mbani angakwanise kum’bweza akakhala ana nkhwidwa?*
Bulu wacimuna an’dzaneta lini kumutewera m’mbuyo.
Pa nthawe ya nkhwidwa,* mabulu yacimunayo yan’dzamugumana.
25 Cita mphole kuti uleke kufamba cithathaNe kuti ngololo yako ikhale idauma.
Tsono iwepo walewa kuti: ‘Ne, bzimwebzi bziribe basa!
Ine ndasirira amuna wa m’madziko manango,*Ndipo ndiniwatewera.’
26 Wanthu wa m’nyumba ya Jirayeri adabva manyaziNinga momwe mbava imbacitira manyazi ikaphatidwa.Iwo, amambo wawo, nduna zawo,Antsembe wawo na aprofeta wawo.
27 Iwo akuuza muti kuti: ‘Iwepo ndiwe pai wangu,’
Ndipo akuuza mwala kuti: ‘Iwepo ndiwe omwe udandibala.’
Tsono iwo andilinza ngoto m’mbuto mwa kundinyang’anisa.
Ndipo mabvuto yakadzawabwerera iwo an’dzalewa kuti:‘Bwerani mutipulumuse!’
28 Kodi iri kuponi mirungu yomwe ukhadabzikonzera ire?
Isiye ibwere penu ingakupulumuse pa nthawe ya mabvuto yako,Iwe Djuda, mirungu yako yawanda kwene-kwene ninga mizinda yako.
29 ‘Thangwe ranyi mukundipasa mulandu?’
Thangwe ranyi mwentsenemwe mukundipandukira?’ walewa tenepo Yahova.
30 Ndidalanga wana wanu wacimuna, koma bziribe kuthandiza.
Iwo alibe kubvuma cirango cangu;Xipada yanu yapha aprofeta wanuNinga mphondolo yaukali.
31 Imwe wanthu wa m’badwo umweyu, tetekerani mafala ya Yahova.
Kodi inepano ndakhala ninga dambo kwa AjirayeriAyai dziko la mdima wamphanvu?
Thangwe ranyi wanthu wangu akulewa kuti: ‘Tikufamba mwakutsudzuka.
Ifepano tin’bwerera lini pomwe kwa imwepo’?
32 Kodi dende lingayebwe bzakubzidekesera,Ayai namwali kuyebwa kirimawu?
Tsono bzingakwanisike lini kulewenga ntsiku zomwe wanthu wangu andiyebwa.
33 Iwe mkaziwe, wabzikonzera njira yakuti amuna akufune!
Wabzipfunzisa wekha kucita bzinthu bzakuipa.
34 Ndipo masaya yako yana nthontsa za mulopa wa wanthu wakusauka na wakusaya mulandu,Napo kuti ndiribe kuwagumana akutcola m’nyumba,Mulopa wawo uli pa masaya yako yentse.
35 Tsono iwepo ukulewa kuti: ‘Ndiribe mulandu ine.
Kulewa cadidi, ciya comwe akhanaco kwa ine camala.’
Tsapano nin’kulangaThangwe ukulewa kuti: ‘Ndiribe kuphonya ine.’
36 Thangwe ranyi ukukumbuka kuti kucinja-cinja makhalidwe yako kulibe kuipa?
Un’dzapasidwambo manyazi ku Edjipito,Ninga momwe udapasidwira manyazi na Asiriya.
37 Ndipopa un’dzafamba uko udaphatirira ku ngoto,Thangwe Yahova walamba wale omwe umbawathemba,Ndipo iwo an’dzakuthandiza lini.”
Mafala ya m'nyantsi
^ Ayai, “lufoyi lako lacadidi lomwe.”
^ Ayai, “pa ntsuwa za.”
^ Pinango-pentse pa mwala.
^ Ayai, “Mefi.”
^ Umweyu ni mkulo omwe umbacokera mu Mkulo wa Nilo.
^ Omwe ni mkulo wa Eufrate.
^ Ayai, “gowa.”
^ Nkhwidwa ni pa nthawe yomwe bzifuwo bzimbafuna kukwirana.
^ Mafala yace caiyo: “Mwezi wace ukakwana.”
^ Ayai, “Ine ndasirira mirungu yacirendo.”
