Jeremiya 21:1-14
21 Yahova adalewalewa na Jeremiya pomwe mambo Zedekiya adatumiza Pasuri mwana wa Malikiya na Zefaniya mwana wa Maaseiya omwe akhali wantsembe amukumbire kuti:
2 “Taphata minyendo, kumbirani Yahova kuti atithandize, thangwe Nabukadinazori* mambo wa Babiloniya akumenyana nafe. Pinango Yahova angacite bzinthu bzakudabwisa kuti atithandize, acimungingimiza kuti acoke.”
3 Jeremiya adawatawira kuti: “Kauzeni Zedekiya kuti:
4 ‘Yahova Mulungu wa Jirayeri walewa kuti: “Nin’dzacitisa kuti bzifuzo bza nkhondo bzomwe bziri m’manja mwanu bzidzakuzungunukireni, bzifuzo bza nkhondo bzomwe mukuphatisa basa kuti mumenyane na mambo wa Babiloniya na Akalideya omwe akuzungulirani kunja kwa muro, ndipo nin’dzabzitsonkhanisa pakati pa mzindayu.
5 Ndipo ine nin’dzamenyana namwe na boko lakufuthuka na lamphanvu na ciya na ukali na kuwawidwa kwene-kwene mu mtima.
6 Nin’dzapha wanthu omwe ambakhala mu mzindayu, kuyambira wanthu na bzirombo kubodzi bzin’dzafa thangwe ra cisi.*”’
7 Yahova walewa kuti: “‘“Patsogolo pace nin’dzapereka Zedekiya mambo wa Djuda, atumiki wace na wanthu wa mu mzindayu, wale omwe an’dzapulumuka na cisi, xipada na njala m’manja mwa Nabukadinazori* mambo wa Babiloniya, m’manja mwa anyamadulanthaka wace na m’manja mwa wale omwe an’funa kuwapha. Iye an’dzawapha na xipada, an’dzakhala alibe nawo basa ndipo ne an’dzawabvera lini ntsisi.”’
8 “Ndipo un’funika kuuza wanthuwa kuti: ‘Yahova walewa kuti: “Ndikuikha patsogolo panu njira ya moyo na njira ya infa.
9 Omwe an’dzasala mu mzindayu an’dzafa na xipada, njala na cisi. Tsono ule omwe an’dzacoka acikabzipereka kwa Akalideya omwe akukuzungulirani an’dzapitiriza kukhala na moyo.”’
10 “‘“Pakuti ndatsimikiza kubweresera tsoka mzindayu,* sikuti bzinthu bzabwino. Mzindayu un’dzaperekedwa m’manja mwa mambo wa Babiloniya, ndipo iye an’dzautentha na moto,” walewa tenepo Yahova.”
11 “‘Imwe wanthu wa pamui pa mambo wa Djuda, tetekerani mafala ya Yahova.
12 Imwe wa m’nyumba ya Davide, Yahova walewa kuti:
“Mbacitani cirungamo ntsiku zentse,Wale omwe akuberedwa, apulumuseni m’manja mwa wanthu omwe akuwabera mwacinyengo,Kuti ukali bwangu buleke kukugakirani ninga motoNa kugaka pacisaya munthu wakubuthimaThangwe ra bzicito bzanu bzakuipa.”’
13 ‘Iwe wakukhala m’cigwa, inepano nin’kulanga,Iwe tsendwa la m’gowa,
‘Imwepo mukulewa kuti: “Mbani omwe an’bwera kudzamenyana nafe?
Ndipo mbani omwe an’pita m’nyumba zathu?” walewa tenepo Yahova.
14 Yahova walewa kuti:‘Inepano nin’kupasani nyathwa mwakubverana na bzicito bzanu.
Nin’dzatentha thengo lace,Ndipo motoyo un’dzatentha bzentse bzomwe bziri pafupi na iye.’”
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “matenda.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Mafala yace caiyo: “Ndanyang’anisa mzindayu kuti ndiubweresere tsoka.”
