Jeremiya 22:1-30
22 Yahova walewa kuti: “Ndoko kumui kwa mambo* wa Djuda ndipo ukalewe mafalaya.
2 Ukalewe kuti: ‘Tetekerani mafala ya Yahova imwe mambo wa Djuda, omwe mudakhala pa mpando wa umambo wa Davide pabodzi na atumiki wanu na wanthu wanu omwe akupita na m’bzipata ibzi.
3 Yahova walewa kuti: “Mbacitani bzinthu mwakuteweza malamulo na mwacirungamo. Mbapulumusani anyakubedwa m’manja mwa anyakuba mwacinyengo. Lekani kuboneresa nyakubwera ali-wentse omwe akukhala pakati panu ne nkhungwa ayai mamsiwa, ndipo lekani kupha munthu wakusaya mulandu mu mzindayu.
4 Pakuti mukateweza bwino-bwino mafalaya, amambo omwe an’khala pa mpando wa umambo wa Davide an’dzapita na pa misuwo ya nyumbayi adapakira ngolo na makavalo pabodzi na atumiki wawo na wanthu wawo.”’
5 “‘Tsono mukasaya kubvera mafalaya, ndikulumbira m’dzina langu kuti nyumbayi in’dzapfudzidwa,’ walewa tenepo Yahova.
6 “Pakulewa bza nyumba ya mambo wa Djuda, Yahova walewa kuti:‘Kwa ine, iwepo uli ninga Jiliyadi,Ninga ntsonga ya phiri la Lebanoni.*
Tsono nin’kucitisa kukhala damboMizinda yako yentse in’dzakhalidwa lini na wanthu.
7 Nin’dzaikha wanthu kuti akupfudze,Ali-wentse na bzifuzo bzace.
Iwo an’dzagwesa miti yako yabwino ya mkungudza,*Ndipo an’dzaithusa pamoto.
8 “‘Mitundu mizinji ya wanthu in’dzapita na mu mzindayu, ndipo an’dzabvunzana kuti: “Thangwe ranyi Yahova wacita bzimwebzi na mzinda ukuluyu?”
9 Ndipo mtawiro wace un’dzakhala wakuti: “Ni thangwe rakuti adasiya kuteweza mpangano wa Yahova Mulungu wawo acigodamira mirungu inango na kuitumikira.”’
10 Lekani kulirira ule omwe wafa,Ne kumubvera ntsisi.
M’mbuto mwace, lirirani kwene-kwene ule omwe akuyenda,Thangwe iye an’dzabwerera lini pomwe kudzawona dziko lace lomwe iye adabadwira.
11 “Pakulewa bza Salumu,* mwana wa Djosiya mambo wa Djuda, omwe akutonga m’mbuto mwa pai wace Djosiya omwe adacoka pa mbuto ino, Yahova walewa kuti: ‘Iye an’dzabwerera lini pomwe.
12 Pakuti iye an’dzafera m’dziko lomwe adayendesedwa ku ukapolo ndipo an’dzawona lini pomwe dzikoli.’
13 Tsoka kwa nyakumanga nyumba yace mwakusaya cirungamoNa bzipinda bzace bza padzulu mwacinyengo,Omwe akuphatisa basa mwanzace fovolo,Ndipo akulamba kumupasa kobiri yace;
14 Iye ambalewa kuti: ‘Ndinimanga nyumba yangu ikuluNa bzipinda bzikulu-bzikulu bza m’dzaulu.
Ndiniikha majanera ndipo ndiniyakonza na matabwa ya mkungudzaNdiciipintari na kore ifuira.’
15 Kodi un’pitiriza kutonga mwakuphatisa basa miti ya mkungudza kuposa winango?
Pai wako akhadyambo na kumwa,Tsono akhacita bzinthu mwakuteweza malamulo na mwacirungamoNdipo bzentse bzikhawafambira bwino.
16 Iye akhakhotcerera nyakubonera na nyakusauka pa mulandu wace,Mwakuti bzentse bzikhafamba bwino.
‘Kodi mpsimwebzi lini bzomwe bzimbathandauza kundidziwa?’ walewa tenepo Yahova.
17 ‘Tsono maso yako na mtima wako bzikundofuna kugumana phindu mwacinyengo,Kupha wanthu wakusaya mulandu,Kubera wanthu mwacinyengo na kupamba.’
18 “Tenepo pakulewa bza Jewoyakimu mwana wa Djosiya, mambo wa Djuda, Yahova walewa kuti:‘Palibe omwe an’dzamulira:
“Maine m’bale wangu wacimuna! Maine m’bale wangu wacikazi!”
Palibe omwe an’dzamulira kuti:
“Maine mbuya wangu! Maine, imwe wakulemekezeka!”
19 Iye an’dzataidwa ninga momwe ambataira bulu,Iye an’dzakwekwetedwa acithusidwa kutali,Kunja kwa bzipata bza Jeruzalemu.’
20 Ndoko ku Lebanoni kuti ukalire,Ukalire mwakukuwa ku BasaniNdipo ukalirembo ku Abarimu,Thangwe wentse omwe akhakufuna kwene-kwene amala kupfudzidwa.
21 Ine ndidalewalewa nawe pomwe ukhabzibva kukhala wakukhotcerereka,
Tsono iwepo udalewa kuti: ‘Nin’dzatetekera lini.’
Iwepo ukucita bzimwebzi kucokera pa utswaka bwako,Pakuti ukanati kubvera mafala yangu.
22 Mphepo in’dzayendesa kutali amakabusa wako wentse,Ndipo wale omwe ambakufuna an’dzayendesedwa ku ukapolo.
Ndipo un’dzapasidwa manyazi na kunyozedwa thangwe ra tsoka lentse lomwe lin’dzakugwera.
23 Iwe nyakukhala ku Lebanoni,Omwe umbakonza citsa* cako pakati pa miti ya mkungudza,Un’dzabuula kwene-kwene ukadzayamba kubva kuwawa,Ninga kubva kuwawa kwa mkazi omwe an’funa kubereka.”
24 Yahova walewa kuti: “‘Pana ine Mulungu wamoyo ndikulumbira kuti: ‘Iwe Koniya,* mwana wa Jewoyakimu mambo wa Djuda, ungadakhala kuti ndiwe aneli ku cala cangu ca ku boko lamadidi, ine ningadakucosa.
25 Nin’dzakupereka m’manja mwa wale omwe akukunyang’ana kuti akuphe, m’manja mwa wale omwe umbacita nawo mantha, m’manja mwa Nabukadinazori* mambo wa ku Babiloniya na m’manja mwa Akalideya.
26 Iwepo pabodzi na mai wako omwe adakubereka, nin’dzakuthusani ku dziko linango lomwe mulibe kubadwira, ndipo mun’kafera kumweko.
27 Ndipo iwo an’dzabwerera lini pomwe ku dziko lomwe an’dzalisuwa.
28 Kodi Koniyayu, ali lini ninga mtsuko wakunyozeka na wakubaduka-baduka,Combo comwe palibe munthu omwe angacifune?
Thangwe ranyi iye pabodzi na wanthu wace agwesedwa pantsiAcithusidwa ku dziko lomwe ambalidziwa lini?’
29 Iwe dziko, dziko, dziko, tetekera mafala ya Yahova.
30 Yahova walewa kuti:
‘Nemba munthuyu ninga munthu omwe alibe wana,Ninga munthu omwe bzinthu bzin’dzamufambira lini bwino pa moyo wace,*Pakuti mbadwa zace bzinthu bzin’dzawafambira lini bwinoAkadzakhala pa mpando wa Davide na kutonga pomwe mu Djuda.’”
Mafala ya m'nyantsi
^ Ayai, “ku nyumba ya mambo.”
^ Ayai, “ntsonga ya Lebanoni.”
^ Ayai, “ya sedro.”
^ Ambacemeredwambo na dzina lakuti Jeowahazi.
^ Ayai, “cisasira.”
^ Omwe ambacemeredwambo kuti Jowaki na Jekoniya
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Mafala yace caiyo: “mu ntsiku zace.”
