Jeremiya 23:1-40
23 “Tsoka amakabusa omwe akudzonga na kubalalisa mabira yomwe yali pa mbuto yangu yakudyesera bzifuwo!” walewa tenepo Yahova.
2 Kwa amakabusa omwe ambausa wanthu wangu, Yahova Mulungu wa Ajirayeri walewa kuti: “Imwepo mwabalalisa mabira yangu, mwayamwaza ndipo mulibe kuyakonkhobza.”
“Tenepo nin’dzakulangani thangwe ra bzicito bzanu bzakuipa,” walewa tenepo Yahova.
3 “Patsogolo pace nin’dzatsonkhanisa mabira yangu yentse yakusala m’madziko yentse yomwe ndidayabalalisira ndiciyabweresa ku mbuto yakudyesera bzifuwo, ndipo iyo yan’dzabalana yaciwanda.
4 Ndipo nin’dzayapereka kwa amakabusa omwe an’dzayausa bwino. Iyo yan’dzagopa lini ayai kucita mantha, ndipo palibe ne m’bodzi omwe an’dzataika,” walewa tenepo Yahova.
5 Yahova walewa kuti: “Onani! Ntsiku zikufendera zomwe nin’dzacitisa kuti kwa Davide kudzacoke mphukira yakulungama.* Ndipo mambo an’dzatonga, iye an’dzalatiza kuti ana luso lakubvesesa bzinthu, an’dzacita bzinthu mwacirungamo na kuteweza malamulo pa dziko.
6 Mu ntsiku za mambo umweyu, Djuda an’dzapulumusidwa ndipo Jirayeri an’dzakhala mwakukhotcerereka. Ndipo iye an’dzacemeredwa na dzina lakuti: Yahova ni Cirungamo Cathu.”
7 Yahova walewa kuti: “Na tenepo, ntsiku zikufika zomwe iwo an’dzalewa lini pomwe kuti: ‘Pana Yahova Mulungu wamoyo, ule omwe adacosa Ajirayeri m’dziko la Edjipito!’
8 m’mbuto mwace an’dzalewa kuti: ‘Pana Yahova Mulungu wamoyo, ule omwe adacosa na kuikha wana wa Jirayeri m’dziko la ku norte na m’madziko yentse yomwe akhadawabalalisira,’ ndipo iwo an’dzakhala m’dziko lawo cairo.”
9 Pakulewa bza aprofeta, ndikulewa kuti:
Mtima wangu wasweka mkati mwangu.
Mafupa yangu yentse yakutetemera.
Ndakhala ninga munthu wakuledzera,Munthu omwe wakundidwa na vinyu,Thangwe ra Yahova na mafala yace yakucena.
10 Pakuti dzikoli ladzala na uputa na upombo;Dzikoli likulira thangwe ra kutembereredwa,Ndipo mbuto za m’dambo zakudyesera bzifuwo zauma.
Iwo ambacita bzinthu bzakuipa ndipo ambaphatisa basa kuipa mphanvu zawo.
11 “Aprofeta na antsembe kubodzi mbakupswipa.*
Mpaka pa nyumba yangu caiyo ndawona bzinthu bzakuipa bzomwe iwo ambacita,” walewa tenepo Yahova.
12 “Ndipopa njira yawo in’dzakhala yakuterera na ya mdima,Iwo an’dzagwinyidwa acigwa.
Pakuti nin’dzawabweresera tsokaMu gole lomwe nin’dzafuna kuwalanga,” walewa tenepo Yahova.
13 “Kwa aprofeta wa ku Samariya, ndawona cinthu cakunyantsa.
Maprofesiya yomwe iwo ambalewa nja BaalaNdipo iwo akusoceresa wanthu wangu Ajirayeri.
14 Ndipo ndawona aprofeta wa ku Jeruzalemu akucita bzinthu bzakunyantsa kwene-kwene.
Iwo ambacita upombo ndipo ambalewa bzinthu bzakunama;Ambathandizira wanthu wakuipa,Ndipo akusiya lini kucita bzinthu bzakuipa.
Kwa ine, wentse ali ninga Sodoma,Ndipo anyakukhala mu mzindamo ali ninga Gomora.”
15 Pakulewa bza aprofeta, Yahova wa anyankhondo walewa kuti:
“Ndiniwadyesa msapani*Ndipo ndiniwamwesa madzi ya veneno.
Pakuti aprofeta wa mu Jeruzalemu acitisa wanthu kupanduka m’dziko lentse.”
16 Yahova wa anyankhondo walewa kuti:
“Lekani kubvera mafala ya aprofeta omwe akukuuzani maprofesiya.
Iwo akundokunamizani,
Akulewa masomphenya ya mu mtima mwawo,Sikuti yakucokera pamulomo pa ine Yahova.
17 Iwo ambauza mwakubwereza-bwereza wale omwe ambandilemekeza lini kuti:‘Yahova walewa kuti: “Mun’dzakhala na mtendere.”’
Ndipo wale omwe ambatewera mtima wawo wakuipa, iwo ambawauza kuti:‘Palibe tsoka lomwe lin’dzakufikirani.’
18 Mbani omwe akucita mbali ya wanthu omwe ali pa uxamwali na YahovaKuti awone na kubva mafala yace?
Mbani omwe watetekera mafala yace aciyabvera?
19 Onani! Cimphepo cakucokera kwa Yahova cikubwera na ukali;Cikubwera ninga conzi kuti cidzafulize misolo ya wanthu wakuipa.
20 Yahova an’dzabweza lini ukali bwaceMpaka kucita bzomwe iye akufuna mu mtima mwace.
Imwepo mun’dzabvesesa bzimwebzi kuphampha kwa ntsiku zakumalizira.
21 Ndiribe kutuma aprofetawa, napo bziri tenepo iwo adayenda acithamanga.
Ndiribe kulewalewa nawo, napo bziri tenepo iwo adalewa maprofesiya.
22 Tsono bzingadakhala kuti iwo akucita mbali ya wanthu omwe ali pa uxamwali na ine,Angadacitisa wanthu wangu kutetekera mafala yanguNdipo angadawathandiza kusiya njira zawo zakuipa na bzicito bzawo bzakuipa.”
23 “Kodi inepano ndine Mulungu ndikakhala ndiri pafupi na imwepo basi, ndipo ndine lini Mulungu ndikakhala ndiri kutali na imwepo?” walewa tenepo Yahova.
24 “Kodi munthu angabisale pa mbuto yomwe inepano ningakwanise lini kumuwona?” walewa tenepo Yahova.
“Kodi inepano nimbakhala lini kudzulu na pa dziko la pantsi?” walewa tenepo Yahova.
25 “Ine ndabva aprofeta akulewa maprofesiya yakunama m’dzina langu. Iwo akulewa kuti: ‘Ine ndalota! Ine ndalota!’
26 Kodi iwo an’dzapitiriza kulewa maprofesiya yakunama yakucokera mu mtima mwawo mpaka lini? Iwo akulewa maprofesiya yakunama yakucokera mu mtima mwawo.
27 Na maloto yomwe ambauza anzawo, iwo an’funa kucitisa wanthu wangu kuyebwa dzina langu ninga momwe makolo yawo yakale yadayebwera dzina langu thangwe ra Baala.
28 Mprofeta omwe walota, alewe bzomwe walotabzo, tsono ule omwe ana mafala yangu, alewe mafala yanguyo mwakukhulupirika.”
“Kodi pana kundendemerana kuponi pakati pa mungu na mbeu ya tirigu?” walewa tenepo Yahova.
29 “Kodi fala langu liri lini ninga moto, ndipo liri lini ninga martelo omwe ambaswa mwala?” walewa tenepo Yahova.
30 “Ndipopa ndikukomedwa lini na aprofeta, wale omwe ambaberana mafala yangu,” walewa tenepo Yahova.
31 Yahova walewa kuti: “Ndikukomedwa lini na aprofeta omwe akuphatisa basa lirime lawo kuti alewe kuti: ‘Iye walewa tenepo!’”
32 Yahova walewa kuti: “Ndikukomedwa lini na aprofeta omwe akulota bzinthu bzakunama, wale omwe akulewa malotoyo na kupambusa wanthu wangu na bzinthu bzawo bzakunama pabodzi na kubzikuza kwawo.”
“Tsono ine ndiribe kuwatuma ne kuwapasa lamulo liri-lentse. Na tenepo iwo an’dzakhala alibe phindu liri-lentse kuna wanthuwa,” walewa tenepo Yahova.
33 “Ndipo wanthu, mprofeta ayai wantsembe akabvunza kuti: ‘Kodi mtolo* wa Yahova n’ciyani?’ iwepo uwatawire kuti: ‘“Mtoloyo ndimwepoletu. Inepano nin’kusiyani,” walewa tenepo Yahova.’
34 Ndipo mprofeta ayai wantsembe ayai munthu ali-wentse akalewa kuti: ‘Uyu ni mtolo wa* Yahova!’ Inepano nin’dzalanga munthu umweyo na wanthu wa pamui pace.
35 Ali-wentse wa imwepo akubvunza m’bale wace na xamwali wace kuti: ‘Kodi Yahova watawira tani? Kodi Yahova walewa ciyani?’
36 Tsono muleke kulewa pomwe bza mtolo wa* Yahova, pakuti mtoloyo ni mafala ya ali-wentse wa imwepo, ndipo imwepo mudacinja mafala ya Mulungu wamoyo, Yahova wa anyankhondo, Mulungu wathu.
37 “Ukabvunze aprofeta kuti: ‘Kodi Yahova watawira ciyani? N’ciyani comwe Yahova walewa?
38 Ndipo mukapitiriza kulewa kuti: “Mtolo wa* Yahova!” Yahova walewa kuti: “Pakuti imwepo mukulewa kuti: ‘Mafalaya ni mtolo wa Yahova,’ uko ine ndidakuuzani kuti: ‘Lekani kumbalewa kuti: “Mtolo wa Yahova!”’
39 nin’dzakudzusani ndicikuthusani kutali na ine, imwepo pabodzi na mzinda omwe ndidakupasani na omwe ndidapasambo makolo yanu yakale.
40 Ndipo nin’dzakucitisani manyazi na kukhala wakunyozeka mpaka kale-kale, bzomwe bzin’dzayebweka lini pomwe.”’”
Mafala ya m'nyantsi
^ Ayai, “nyakudzatambira utaka wakulungama.”
^ Ayai, “mbaapanduki.”
^ Umweyu ni muliwo omwe umbawawa ninga luni.
^ Ayai, “mafala yakulemera.” Mu Cihebereu fala limweri lina mathandauzo mawiri yakuti: “mafala yakulemera yakucokera kwa Mulungu” ayai “cinthu cakulemera.”
^ Ayai, “aya ni mafala yakulemera ya.”
^ Ayai, “ mafala yakulemera ya.”
^ Ayai, “mafala yakulemera ya.”
