Jeremiya 24:1-10
-
Nkhuyu zabwino na zakuipa (1-10)
24 Na tenepo Yahova adandilatiza bzitundu bziwiri bza nkhuyu bzomwe bzikhali patsogolo pa templo ya Yahova, pambuyo pa Nabukadinazori* mambo wa Babiloniya kuyendesa ku ukapolo Jekoniya* mwana wa Jewoyakimu mambo wa Djuda pabodzi na nduna za mu Djuda, amisiri na anyakuphata basa na bzinthu bza simbi;* iye adawatenga ku Jeruzalemu aciwayendesa ku Babiloniya.
2 Citundu cibodzi cikhana nkhuyu zabwino kwene-kwene, ninga nkhuyu zakuyamba kufuira, tsono citundu cinangoco cikhana nkhuyu zakuipa kwene-kwene, zakuipa zomwe ne zingadyeke lini.
3 Patsogolo pace Yahova adandibvunza kuti: “Kodi Jeremiya ukuwona ciyani?” Ine ndidatawira kuti: “Ndikuwona nkhuyu. Nkhuyu zabwino zomwe n’zabwino kwene-kwene na zakuipa, zomwe n’zakuipa kwene-kwene kuti ne zingadyeke lini.”
4 Patsogolo pace Yahova adandiuza kuti:
5 “Yahova Mulungu wa Jirayeri walewa kuti: ‘Ninga nkhuyu zabwinozi, Adjuda omwe adayendesedwa ku ukapolo, omwe ndidawacosa mu dzikoli kuti ayende m’dziko la Akalideya, nin’dzawawonambo ninga wabwino.
6 Nin’dzapitiriza kuwasamalira* kuti bzinthu bziwafambire bwino ndipo nin’dzawabwezeresa m’dzikoli. Nin’dzawamanga, sikuti kuwagwesa ndipo nin’dzawabzala sikuti kuwazula.
7 Nin’dzawapasa mtima wakuti adziwe kuti ine ndine Yahova. Iwo an’dzakhala wanthu wangu ndipo ine nin’dzakhala Mulungu wawo, pakuti iwo an’dzabwerera kwa ine na mtima wawo wentse.
8 “‘Tsono pakulewa bza nkhuyu zakuipa, zomwe n’zakuipa kwene-kwene zomwe ne zingadyedwe lini, Yahova akulewa kuti: “Nin’dzawonambo tenepoyo Zedekiya mambo wa Djuda, nduna zace, anyakusala mu Jeruzalemu omwe asala m’dzikoli na omwe adayenda kukakhala m’dziko la Edjipito.
9 Nin’dzawacitisa kukhala cinthu cakugopswa kwa maumambo yentse ya pa dziko la pantsi, akadzawona tsoka lomwe nin’dzawabweresera. An’dzatukwanidwa, an’dzawonedwa ninga ciratizo ca wanthu omwe agumana na tsoka ndipo an’dzasekedwa na kutembereredwa kuli-kwentse komwe nin’dzawabalalisira.
10 Nin’dzawatumizira xipada, njala na cisi* mpaka adzamale mu dziko lomwe ndidapasa iwo na makolo yawo yakale.”’”
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Omwe ambacemeredwambo kuti Jowaki na Koniya.
^ Ayai, “fero.” Ayai pinango, “anyakumanga bzinthu bzakulimba.”
^ Ayai, “kuwanyang’anisa.”
^ Ayai, “matenda.”
