Jeremiya 25:1-38
25 Mu gole lacinai la utongi bwa Jewoyakimu, mwana wa Djosiya, mambo wa Djuda, lomwe ni gole lakuyamba la utongi bwa Nabukadinazori* mambo wa Babiloniya, Jeremiya adauzidwa mafala yakulewa bza wanthu wentse wa ku Djuda.
2 Pakulewa bza wanthu wentse wa ku Djuda na wentse omwe ambakhala mu Jeruzalemu mprofeta Jeremiya adalewa kuti:
3 “Kucokera mu gole laci 13 la utongi bwa Djosiya, mwana wa Amoni, mambo wa Djuda, ndikutambira mafala ya Yahova mpaka lero m’magole 23 yentseneya. Ndikulewalewa namwe mwakubwereza-bwereza* tsono imwepo mukunditetekera lini.
4 Ndipo Yahova akhakutumizirani atumiki wace wentse aprofeta ndipo akhawatumiza mwakubwereza-bwereza,* tsono imwepo mukhawatetekera lini ne mukhawabvera lini.
5 Iwo akhalewa kuti: ‘Taphata minyendo, munthu ali-wentse mbaasiye njira yace yakuipa na bzicito bzace bzakuipa, tenepo mun’dzapitiriza kukhala mpaka kale-kale mu dziko lomwe Yahova adakupasani kale-kale na makolo yanu yakale.
6 Lekani kutewera mirungu inango ne kuitumikira ayai kuigodamira, mucindikalipisa na mabasa ya manja yanu, thangwe mukacita bzimwebzi inepano nin’dzakubwereserani tsoka.’
7 “‘Yahova walewa kuti: ‘Tsono imwepo mukhanditetekera lini, m’mbuto mwace mukhandikalipisa na mabasa ya manja yanu kuti yakubweresereni tsoka.’
8 “Tenepo Yahova wa anyankhondo akulewa kuti: ‘“Pakuti mulibe kutetekera mafala yangu,
9 nin’cemeresa wanthu wentse wa ku norte,” walewa tenepo Yahova, “nin’cemeresa mtumiki wangu Nabukadinazori* mambo wa Babiloniya kuti adzapfudze dzikoli, wanthu wakukhala m’mwemu na mitundu yentse yakukhala pafupi na dzikoli. Nin’wapfudza ndipo nin’wacitisa kukhala cinthu cakupasa mantha, cinthu cakuthemera kuliziridwa muluzi na kukhala matere mpaka kale-kale.
10 Pakati pawo nin’dzamalisa baludya la kukomedwa na kusekerera, fala la namwali wacimuna na fala la namwali wacikazi, baludya la mwala wakupeyera na ceza ca mbvuniko.
11 Dziko lentseneli lin’dzasanduka matere, lin’dzakhala cinthu cakupasa mantha, ndipo wanthu wentsenewa an’dzatumikira mambo wa ku Babiloniya kwa magole 70.”’
12 Yahova walewa kuti: “‘Yakadzamala magole 70, nin’dzalanga mambo wa ku Babiloniya pabodzi na mtunduyu thangwe ra bzakuphonya bzace ndipo nin’dzacitisa dziko la Akalideya kukhala matere na lakusaya kukhalidwa mpaka kale-kale.
13 Ine nin’dzalanga dzikoli mwakubverana na mafala yentse yomwe ndidalewa na bzentse bzomwe Jeremiya adalewa pakulewa bza mitunduyi, bzomwe bzidanembedwa m’bukhuli.
14 Pakuti mitundu mizinji ya wanthu pabodzi na amambo wamphanvu an’dzawacitisa kukhala akapolo wawo, ndipo ine nin’dzawabwezera mwakubverana na bzicito bzawo na mabasa ya manja yawo.’”
15 Yahova Mulungu wa Jirayeri walewa kuti: “Tenga kopo yomwe iri m’manja mwanguyi, yomwe ina vinyu ya ukali bwangu ndipo ukapase mitundu ya wanthu yomwe ndikukutumiza kuti ikamwe.
16 Iwo an’dzamwa acidzedzereka ndipo an’dzacita bzinthu ninga anyamsala thangwe ra xipada yomwe nin’dzawatumizira.”
17 Na tenepo ndidatenga kopo yomwe ikhali m’manja mwa Yahova ndipo ndidakapasa mitundu yentse ya wanthu yomwe Yahova akhadanditumiza kuti ikamwe:
18 kuyambira ku Jeruzalemu na mizinda ya Djuda, amambo wawo na nduna zawo kuti akhale matere, cinthu cakupasa mantha, cinthu cakuthemera kuliziridwa muluzi na wanthu wakutembereredwa ninga momwe bziriri lero;
19 pabodzi na Farawo mambo wa Edjipito, atumiki wace, nduna zace, wanthu wace wentse
20 na madzinza yentse yakusiyana-siyana pakati pawo; amambo wentse wa dziko la Uzi, amambo wentse wa dziko la Afilisteu, Asikeloni, Gaza, Ekroni na anyakusala wa ku Asidode,
21 Edomu, Mowabe na Amoni,
22 amambo wentse wa Tiro, amambo wentse wa Sidoni na amambo wentse wa mu ntsuwa za ku nyanza.
23 Dedani, Tema, Buzi na wentse omwe adagwata makungundebvu zakugwatidwa;
24 amambo wentse wa ku Arabya na amambo wentse wa madzinza yakusiyana-siyana yomwe yambakhala m’dambo,
25 amambo wentse wa Zimiri, amambo wentse wa Elamu na amambo wense wa Mediya;
26 amambo wentse wa ku norte, wapafupi na wakutali, amambo wentse wakusiyana-siyana na maumambo manango yentse yomwe yali pa dziko la pantsi ndipo mambo Sesaki* an’dzamwa pakumalizira.
27 “Uwauze kuti: ‘Yahova wa anyankhondo, Mulungu wa Jirayeri walewa kuti: “Mwani muledzere, musanze ndipo mugwe mucitazira kulamuka thangwe ra xipada yomwe nin’kutumizirani.”’
28 Ndipo iwo akakalamba kutambira kopo yomwe iri m’manja mwako kuti akamwe ukawauze kuti: ‘Yahova wa anyankhondo walewa kuti: “Imwepo mun’funika kumwa.
29 Penu ndiniyamba kubweresera tsoka mzinda omwe umbadziwika na dzina langu, kodi imwepo ndiye omwe mun’dzalangidwa lini?”’
“‘Imwepo mun’dzalangidwa, pakuti nin’kubwereserani xipada kuti idzalange wentse wakukhala m’dzikoli,’ walewa tenepo Yahova wa anyankhondo.
30 “Iwepo un’funika kulewa mafala yentse ya m’profesiyayi uciti:‘Yahova an’dzakuwa kucokera kudzulu,Ndipo pa mbuto yace yakucena yakukhala pan’dzabveka fala lace,
Iye an’dzakuwira na mphanvu mbuto yace yakukhala.
An’dzakuwa ninga anyakuponda-ponda* uva,Iye an’dzaimba nyimbo yakusekerera kukunda wentse wakukhala m’dzikoli.’
31 ‘Kun’dzabveka baludya ku malekezero ya dziko,Pakuti mitundu ya wanthu ina mulandu na Yahova.
Iye an’dzatonga yekha wanthu wentse.
Ndipo an’dzapha anyakuipa na xipada,’ walewa tenepo Yahova.
32 Yahova wa anyankhondo walewa kuti:
‘Onani, tsoka likumwazikira mitundu yakusiyana-siyana,Ndipo nin’dzabweresa conzi cikulu kucokera ku mbuto zakutali za pa dziko la pantsi.
33 “‘Pa ntsikuyo, omwe an’dzaphedwa na Yahova an’dzakhala ali mbwee, kucokera ku malire ya dziko mpaka ku malire manango ya dziko. Iwo an’dzaliridwa lini, an’dzalokotedwa lini ne kufuciridwa. Iwo an’dzakhala ninga ndowe pa mataka.’
34 Imwe amakabusa, lirani ndipo kuwani,
Bvunvulikani pantsi, imwe akulu-akulu wa thimu la mabira,Pakuti yafika ntsiku yakuphedwa na yakumwazidwa,Ndipo imwepo mun’dzagwa ninga combo cakufunika kwene-kwene!
35 Amakabusa alibe kwakuthawira,Napo akulu-akulu wa thimu la mabira alibembo kwakuthawira.
36 Tetekerani! Ni kukuwa kwa amakabusa,Na kudandaula kwa akulu-akulu wa thimu la mabira,Pakuti Yahova akupfudza mbuto yakudyesera bzifuwo bzawo.
37 Thangwe ra kugaka kwa ukali bwa Yahova,Mbuto zomwe zikhana mtendere zasala ziribe cinthu camoyo.
38 Iye wacoka pa mbuto yace yakubisalikira ninga mphondolo yamphanvu,Ndipo dziko lawo lasanduka cinthu cakupasa mantha,Thangwe ra xipada yakuipaNa kugaka kwa ukali bwace.”
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Mafala yace caiyo: “nimbamuka macibese kuti ndilewelewe namwe.”
^ Mafala yace caiyo: “nimbamuka macibese kuti ndilewelewe namwe.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Bzikuwoneka kuti limweri ni dzina linango la Babeli (Babiloniya).
^ Ayai, “anyakupsinya.”
