Jeremiya 26:1-24
26 Kumayambiriro kwa utongi bwa Jewoyakimu mwana wa Djosiya mambo wa Djuda, Yahova adalewalewa na Jeremiya kuti:
2 “Yahova walewa kuti: ‘Ndoko mu kintale ya nyumba ya Yahova ndipo kumweko ukalewelewe na wentse wakukhala m’mizinda ya Djuda, omwe ambabwera kudzanamata* pa nyumba ya Yahova. Uwauze bzentse bzomwe inepano ndidakuuza, leka kusiya fala liri-lentse.
3 Pinango iwo angatetekere ndipo ali-wentse angasiye njira yace yakuipa. Bzimwebzi bzikacitika, nin’dzawabweresera lini tsoka lomwe ndikhafuna kuwabweresera thangwe ra bzicito bzawo bzakuipa.
4 Uwauze kuti: “Yahova walewa kuti: ‘Mukasaya kundibvera na kuteweza lamulo langu* lomwe ndidakupasani,
5 ndipo mukasaya kubvera mafala ya atumiki wangu aprofeta omwe nimbakutumizirani mwakubwereza-bwereza,* omwe mumbawabvera lini,
6 nin’dzacitisa nyumbayi kundendemerana na Silo ndipo nin’dzacitisa kuti mitundu yentse ya pa dziko la pantsi iwone kuti mzindayu ngwatsoka.’”’”
7 Antsembe, aprofeta na wanthu wentse adabva Jeremiya akulewalewa mafala yamweya pa nyumba ya Yahova.
8 Pomwe Jeremiya adamala kulewa bzentse bzomwe Yahova akhadamuuza kuti auze wanthu wentse, antsembe, aprofeta na wanthu wentse adamuphata acimuuza kuti: “Kulewa cadidi iwepo unifa.
9 Thangwe ranyi ukulewa profesiya m’dzina la Yahova kuti: ‘Nyumbayi in’khala ninga Silo, mzindayu un’pfudzidwa ndipo un’dzakhalidwa lini pomwe na wanthu’?” Ndipo wanthu wentse adazungulira Jeremiya pa nyumba ya Yahova.
10 Pomwe nduna za Djuda zidabva mafalaya, zidayenda ku nyumba ya mambo mpaka ku nyumba ya Yahova ndipo zidakakhala pa msuwo wa cipata cipsa ca nyumba ya Yahova.
11 Antsembe na aprofeta adauza nduna na wanthu wentse kuti: “Munthuyu an’themera nyathwa ya infa, thangwe iye walewa profesiya yakulewa bza tsoka lomwe lin’gwera mzindayu, ninga momwe mwabvera mwekha na makutu yanu.”
12 Tenepo Jeremiya adauza nduna zentse na wanthu wentse kuti: “Ni Yahova omwe wandituma kuti ndidzalewe mafalaya pakulewa bza nyumbayi na mzindayu.
13 Na tenepo cinjani njira zanu na bzicito bzanu, mucibvera fala la Yahova Mulungu wanu, ndipo Yahova an’dzacinja makumbukidwe yace acileka kukubwereserani tsoka lomwe adalewa.
14 Tsono ine ndiri m’manja mwanu. Citani nande ciri-centse comwe n’cabwino na comwe cin’kudekerani m’maso mwanu.
15 Koma dziwani kuti mukandipha, imwepo, mzinda uno na wanthu omwe akukhala muno, mun’dzakhala na mulandu wakupha munthu wakusaya kuphonya, pakuti ni Yahova omwe wandituma kuti ndidzakuuzeni mafala yentse yomwe ndakuuzani pamaso panu.”
16 Patsogolo pace, ndunazo na wanthu wentse adauza antsembe na aprofeta kuti: “Munthuyu an’themera lini nyathwa ya infa, pakuti iye walewalewa nafe mu dzina la Yahova Mulungu wathu.”
17 Tsono akulu-akulu winango wa mu mzindamo adalamuka aciuza wanthu wentse omwe akhali pamwepowo kuti:
18 “Mika wa ku Moreseti, omwe akhalewa maprofesiya mu ntsiku za Ezekiya mambo wa Djuda, adauza wanthu wentse wa ku Djuda kuti: ‘Yahova wa anyankhondo walewa kuti:
“Ziyoni an’dzalimidwa ninga munda,Jeruzalemu an’dzakhala midu ya matere,Ndipo phiri la Nyumba ya Mulungu* lin’dzakhala ninga tumapiri tomwe tuli m’thengo.”’
19 “Kodi Ezekiya mambo wa Djuda na wanthu wentse wa mu Djuda adamupha? Kodi iye alibe kugopa Yahova acikumbira kuti Yahova amuthandize ndipo Yahova adacinja makumbukidwe yace, acileka kuwabweresera tsoka lomwe akhadalewa kuti angadawabweresera? Tikacita bzimwebzi tin’bzibweresera tsoka likulu.
20 “Akhalipo mwamuna munango omwe akhalewambo maprofesiya mu dzina la Yahova. Dzina lace akhali Uria, mwana wa Semaiya wa ku Kiriyati-jeyarimu. Iye akhalewa maprofesiya pakulewa bza tsoka lomwe lingadacitikira mzindayu pabodzi na dzikoli na mafala yakundendemerana na ya Jeremiya.
21 Mambo Jewoyakimu, acikunda wace wentse na nduna zace zentse adabva mafala yace ndipo mambo adafuna kumupha. Pomwe Uriya adabva bzimwebzi, iye adabva mantha ndipo adathawira ku Edjipito.
22 Tenepo mambo Jewoyakimu adatuma Elinatani mwana wa Akibori pabodzi na amuna winango kuti ayende ku Edjipitoko.
23 Iwo adakatenga Uria ku Edjipito acimubweresa kwa mambo Jewoyakimu, ndipo adamupha na xipada acimuthusa mu thenje la wanthu wentse.”
24 Tsono Ahikamu mwana wacimuna wa Safani adathandizira Jeremiya, mwakuti iye alibe kuperekedwa m’manja mwa wanthu kuti aphedwe.
Mafala ya m'nyantsi
^ Ayai, “kudzagodama.”
^ Ayai, “malango yangu.”
^ Mafala yace caiyo: “nimbalamuka macibese-bese ndicikucenjezani.”
^ Ayai, “templo.”
