Jeremiya 27:1-22
27 Kumayambiriro kwa utongi bwa Jewoyakimu mwana wa Djosiya mambo wa Djuda, Yahova adalewalewa na Jeremiya kuti:
2 “Yahova adandiuza kuti: ‘Konza bzingwe na madjoki ndipo ubziikhe m’khosi mwako.
3 Patsogolo pace ubzitumize kwa mambo wa ku Edomu, mambo wa ku Mowabe, mambo wa Aamoni, mambo wa ku Tiro na mambo wa ku Sidoni mwakuphatisa basa atumiki omwe adabwera ku Jeruzalemu kuti adzawonane na Zedekiya mambo wa Djuda.
4 Ndipo uuze atumikiwo kuti akauze azimbuya wawo kuti:
“‘“Yahova wa anyankhondo, Mulungu wa Jirayeri walewa bzomwe mun’funika kukauza azimbuya wanu kuti:
5 ‘Ndine omwe ndidakonza dziko, wanthu pabodzi na bzirombo bzomwe bziri pa dziko. Ndidacita bzimwebzi na mphanvu zangu zikulu pabodzi na boko langu lakufuthuka, ndipo ningabzipereke kwa ali-wentse omwe ningafune.*
6 Ndipo tsapano nin’pereka madziko yentseneya m’manja mwa mtumiki wangu Nabukadinazori mambo wa ku Babiloniya ndipo nin’mupasambo napo bzirombo bza m’thengo kuti bzimutumikire.
7 Mitundu yentse ya wanthu in’dzatumikira iye, mwana wace na mzukulu wace mpaka idzafike nthawe ya dziko lace cairo. Ndipo mitundu mizinji ya wanthu na amambo wace akulu-akulu an’dzamuboneresa.’
8 “‘“‘Mtundu munango wa wanthu ayai umambo bukalamba kutumikira Nabukadinazori mambo wa Babiloniya na kulamba kuikha m’khosi mwace djoki la mambo wa ku Babiloniya, ine nin’dzalanga mtundu umweyo na xipada, njala na cisi* mpaka ndidzawapfudze mwakuphatisa basa manja yace,’ walewa tenepo Yahova.
9 “‘“‘Tenepo lekani kutetekera aprofeta wanu, anyakuvima wanu, anyakuleweratu bzakutsogolo mwakuphatisa basa maloto, anyakucita bzamatsenga ne anyakulodza wanu omwe ambalewa kuti: “Imwepo mun’dzatumikira lini mambo wa ku Babiloniya.”
10 Pakuti iwo ambalewa maprofesiya yakunama, ndipopa mun’dzayendesedwa kutali na dziko lanu, nin’dzakumwazani ndipo mun’dzapfudzidwa.
11 “‘“‘Tsono mtundu omwe uniikha m’khosi mwace djoki la mambo wa Babiloniya na kumutumikira, nin’dzausiya kuti ukhale m’dziko lace, kuti ulime na kukhala m’mwemo,’”’” walewa tenepo Yahova.
12 Ndadziwisambo mafala mabodzi-bodziya kwa Zedekiya mambo wa Djuda kuti: “Ikhani m’khosi mwanu djoki la mambo wa ku Babiloniya, mucitumikira iye pabodzi na wanthu wace kuti mukhale na moyo.
13 Thangwe ranyi imwepo pabodzi na wanthu wanu mun’funa kufa na xipada, njala na cisi ninga momwe Yahova walewera pakulewa bza wanthu omwe anilamba kutumikira mambo wa ku Babiloniya?
14 Lekani kutetekera mafala ya aprofeta omwe ambakuuzani maprofesiya yakunama yakuti: ‘Imwepo mun’dzatumikira lini mambo wa ku Babiloniya.’
15 “‘Pakuti ine ndiribe kuwatuma, tsono iwo akulewa maprofesiya yakunama m’dzina langu. Ndipopa nin’dzakubalalisani na kupfudza imwepo pabodzi na aprofeta omwe akulewa maprofesiya kwa imwepo,’” walewa tenepo Yahova.
16 Ndidauzambo antsembe pabodzi na wanthuwa kuti: “Yahova walewa kuti: ‘Lekani kubvera mafala ya aprofeta omwe akuuzani maprofesiya yakuti: “Tetekerani! Mwakusaya kucedwa bzombo bza m’nyumba ya Yahova bzin’bwezeresedwa kucokera ku Babiloniya,” pakuti iwo akuuzani maprofesiya yakunama.
17 Lekani kuwatetekera. Tumikirani mambo wa ku Babiloniya ndipo mun’khala na moyo. Thangwe ranyi mun’funa kuti mzindayu ukhale matere?
18 Tsono penu iwo ni aprofeta ndipo ana fala la Yahova, ndaphata minyendo, mbakumbire Yahova wa anyankhondo kuti bzombo bzakusala bza m’nyumba ya Yahova, bza nyumba ya mambo wa Djuda na bza ku Jeruzalemu bzileke kuyendesedwa ku Babiloniya.’
19 “Pakuti Yahova wa anyankhondo walewa bza mapilare, tanki ya madzi,* tungolo na bzombo bzinango bzakusala mu mzinda uno,
20 bzomwe Nabukadinazori mambo wa ku Babiloniya alibe kubzipamba pomwe adatenga Jekoniya mwana wa Jewoyakimu mambo wa Djuda, kucoka ku Jeruzalemu kuyenda ku ukapolo ku Babiloniya pabodzi na wanthu wentse wakulemekezeka wa ku Djuda na wa ku Jeruzalemu.
21 Inde, bzimwebzi ni bzomwe Yahova wa anyankhondo, Mulungu wa Jirayeri walewa pakulewa bza bzombo bzomwe bzidasala pa nyumba ya Yahova, nyumba ya mambo wa Djuda na ku Jeruzalemu. Iye walewa kuti:
22 ‘“Iwo an’dzayendesedwa ku Babiloniya ndipo an’dzakhala kumweko mpaka pa ntsiku yomwe nin’dzawakumbukira pomwe. Tenepo nin’dzawacosa kumweko ndiciwabweresa pa mbuto ino,”’ walewa tenepo Yahova.
Mafala ya m'nyantsi
^ Mafala yace caiyo: “kwa ali-wentse omwe ndikuwona kuti an’themera.”
^ Ayai, “matenda.”
^ Ayai, “Nyanza.” Yomwe ni Nyanza ya pa templo yakukonzedwa na kobre.
