Jeremiya 28:1-17
-
Jeremiya na mprofeta wakunama Hananiya (1-17)
28 Mu gole libodzi-bodziro, kumayambiriro kwa utongi bwa Zedekiya mambo wa Djuda, m’mwezi wacixanu wa gole lacinai, mprofeta Hananiya, omwe akhali mwana wa Azuri wa ku Gibiyoni, adandiuza pa nyumba ya Yahova na pamaso pa antsembe na pa wanthu wentse mafala yakuti:
2 “Yahova wa anyankhondo, Mulungu wa Jirayeri walewa kuti: ‘Nin’tcola djoki la mambo wa Babiloniya.
3 Mkati mwa magole mawiri,* nin’dzabweresa pomwe pa mbuto ino bzombo bzentse bza nyumba ya Yahova bzomwe Nabukadinazori, mambo wa Babiloniya, adabzitenga pano aciyenda nabzo ku Babiloniya.’”
4 “‘Ndipo nin’dzabwezeresa Jekoniya mwana wa Jewoyakimu, mambo wa Djuda, na Adjuda wentse omwe akhadayendesedwa ku ukapolo ku Babiloniya, pakuti nin’dzatcola djoki la mambo wa ku Babiloniya,’ walewa tenepo Yahova.”
5 Tsono mprofeta Jeremiya adatawira mprofeta Hananiya pamaso pa antsembe na pa wanthu wentse omwe akhadaima pa nyumba ya Yahova.
6 Mprofeta Jeremiya adati: “Ameni!* Yahova acite bzimwebzo. Yahova ateweze mafala yomwe walewa m’profesiyayi mwa kubwezeresa bzombo bza nyumba ya Yahova na wanthu wentse omwe adayendesedwa ku ukapolo ku Babiloniya.
7 Tenepo ndaphata minyendo, tetekerani mafala yomwe nin’lewa kwa iwepo na kwa wanthu wentse kuti:
8 Aprofeta adabwera kale-kale pomwe iwepo na ine tikhanati kubadwa, ndipo iwo adalewa maprofesiya yakulewa bza nkhondo, tsoka na cisi* bzomwe bzingadacitikira maumambo yamphanvu na madziko mazinji.
9 Mprofeta akalewa mafala ya mtendere ndipo mafalayo yacikwanisika, dziwa kuti mprofeta umweyo adatumizidwadi na Yahova.”
10 Tenepo mprofeta Hananiya adacosa djoki m’khosi mwa mprofeta Jeremiya acilitcola.
11 Tenepo Hananiya adalewa pamaso pa wanthu wentse kuti: “Yahova walewa kuti: ‘Ni mwa njira imweyi momwe nin’dzamalisira djoki la mambo Nabukadinazori mambo wa Babiloniya ndipo nin’dzalicosa m’khosi mwa wanthu wentse mkati mwa magole mawiri.’” Tenepo Jeremiya adayenda.
12 Pomwe mprofeta Hananiya adatcola djoki acilicosa m’khosi mwa mprofeta Jeremiya, Yahova adalewalewa na Jeremiya kuti:
13 “Ndoko ukauze Hananiya kuti: ‘Yahova walewa kuti: “Watcola djoki la matabwa, tsono m’mbuto mwace iwepo uti ukonze djoki la simbi.”*
14 Pakuti Yahova wa anyankhondo, Mulungu wa Jirayeri walewa kuti: “Ndiniikha djoki la simbi m’khosi mwa wanthu wentsenewa kuti atumikire Nabukadinazori mambo wa Babiloniya, ndipo iwo an’dzamutumikiradi ndipo ine nin’dzamupasa napo bzirombo bza m’thengo.”’”
15 Tenepo mprofeta Jeremiya adauza mprofeta Hananiya kuti: “Ndaphata minyendo, tetekera Hananiya! Yahova alibe kukutuma, tsono napo bziri tenepo iwepo wacitisa wanthuwa kukhulupira mafala yakunama.
16 Ndipopa Yahova walewa kuti: ‘Nin’citisa kuti ufe. Iwepo unifa gole lino, pakuti wacitisa wanthu kupandukira Yahova.’”
17 Tenepo m’mwezi waci 7 wa gole limwero, mprofeta Hananiya adafadi.
Mafala ya m'nyantsi
^ Mafala yace caiyo: “magole mawiri ya ntsiku.”
^ Ayai, “bzikhale ninga momwe bziririmu.”
^ Ayai, “matenda.”
^ Ayai, “fero.”
