Jeremiya 29:1-32
29 Aya ni mafala ya mu tsamba lomwe mprofeta Jeremiya adatumiza kucokera ku Jeruzalemu yaciyenda kuna akulu-akulu omwe akhadasala pakati pa wanthu omwe akhadayenda ku ukapolo, antsembe, aprofeta na wanthu wentse omwe Nabukadinazori akhadawatenga ku Jeruzalemu aciyenda nawo ku Babiloniya,
2 pomwe mambo Jekoniya akhadacoka ku Jeruzalemu pabodzi na mai wace, akulu-akulu wa pa nyumba ya mambo, nduna za Djuda na za Jeruzalemu, amisiri na anyakuphata basa na simbi.*
3 Iye adatumiza tsambalo ku Babiloniya mwakuphatisa basa Elasa mwana wa Safani na Gemariya mwana wa Hilikiya omwe mambo wa Djuda Zedekiya adatumiza kuna Nabukadinazori mambo wa Babiloniya. Tsambalo likhalewa kuti:
4 “Yahova wa anyankhondo, Mulungu wa Jirayeri walewa kuna wanthu wentse omwe akhali ku ukapolo, omwe iye adacitisa kuti acoke ku Jeruzalemu ayende ku ukapolo ku Babiloniya kuti:
5 ‘Mangani nyumba ndipo mukhale m’mwemo. Bzalani minda ya bzisapo ndipo mudye bzisapo bzace.
6 Lowolani ndipo mubereke wana wacimuna na wacikazi. Lowolerani wana wanu wacimuna ndipo lowozesani wana wanu wacikazi kuti iwo aberekembo wana wacimuna na wacikazi. Wandani ndipo lekani kucepa.
7 Lingani mtendere mu mzinda omwe ndidakuyendesani ninga akapolo. Pembani kwa Yahova kuti bzinthu bzikufambire bwino, pakuti mzindayo ukakhala pa mtendere, imwepombo mun’dzakhala pa mtendere.
8 Pakuti Yahova wa anyankhondo, Mulungu wa Jirayeri walewa kuti: “Lekani kupumpsidwa na aprofeta wanu ne na anyakuvima wanu omwe ali pakati panu ndipo lekani kutetekera maloto yawo.
9 Thangwe ‘iwo ambalewa maprofesiya yakunama m’dzina langu. Ine ndiribe kuwatuma,’ walewa tenepo Yahova.”’”
10 “Yahova walewa kuti: ‘Mukadzapfitsa magole 70 ku Babiloniya nin’dzakukumbukirani pomwe ndipo nin’dzateweza piciro langu lakukubweresani pomwe ku mbuto ino.’
11 “‘Pakuti ndikudziwa bwino bzomwe ine ndikufuna kuna imwepo, ndikufuna kuti mukhale na mtendere, sikuti na tsoka. Ndikufuna kukupasani tsogolo labwino na cidikhiro,’ walewa tenepo Yahova.
12 Imwepo mun’dzandicemera ndipo mun’dzabwera mucipemba kwa ine ndipo ine nin’dzakutetekerani.’
13 “‘Imwepo mun’dzandinyang’ana ndipo mun’dzandigumana, pakuti mun’dzandinyang’ana na mtima wentse.
14 Ndipo inepano nin’dzabvuma kuti mundigumane,’ walewa tenepo Yahova. ‘Nin’dzatsonkhanisa wanthu wanu omwe adayenda ku ukapolo, ndipo nin’dzawatsonkhanisambo pakati pa mitundu yentse na mbuto zomwe ndidakubalalisirani. Ndipo nin’dzakubwezeresani ku mbuto yomwe ndidakutengani ninga akapolo,’ walewa tenepo Yahova.
15 “Tsono imwepo mumbalewa kuti: ‘Yahova watipasa aprofeta ku Babiloniya.’
16 “Tenepo Yahova akuuza mambo omwe adakhala pa mpando wa umambo wa Davide na wanthu wentse omwe ambakhala mu mzindamu pabodzi na abale wanu omwe alibe kuyenda namwe ku ukapolo kuti:
17 ‘Yahova wa anyankhondo walewa kuti: “Ndiniwatumizira xipada, njala na cisi,* ndipo ndiniwacitisa kuti akhale ninga nkhuyu zakubvunda,* zakuipa kwene-kwene zomwe ne zingadyeke lini.”’
18 “‘Nin’dzawalanga na xipada, njala na cisi ndipo nin’dzawacitisa kukhala cinthu cakugopswa kwa maumambo yentse ya pa dziko la pantsi. Nin’dzawacitisa kukhala ciratizo ca wanthu omwe agumana na tsoka, cinthu cakupasa mantha, cinthu cakuthemera kuliziridwa muluzi na cinthu cakuthemera kutukwanidwa pakati pa mitundu yentse ya wanthu ya komwe ndidawabalalisira.’
19 Ndipo Yahova walewa kuti: ‘Pakuti mulibe kutetekera mafala yangu yomwe ndikhayalewa mwakuphatisa basa atumiki wangu aprofeta omwe ine ndikhawatumiza mwakubwereza-bwereza.’*
“‘Tsono imwepo mukhawatetekera lini,’ walewa tenepo Yahova.
20 “Ndipopa tetekerani mafala ya Yahova, imwe wanthu wentse omwe mudayendesedwa ku ukapolo, omwe ndidakucosani ku Jeruzalemu kuyenda ku Babiloniya.
21 Yahova wa anyankhondo, Mulungu wa Jirayeri, akulewa bza Akabe mwana wa Kolaya na Zedekiya mwana wa Maaseiya omwe adalewa maprofesiya yakunama m’dzina langu kuti: ‘Nin’dzawapereka m’manja mwa Nabukadinazori* mambo wa ku Babiloniya ndipo iye an’dzawapha imwepo mukuwona.
22 Ndipo bzomwe bzin’dzawacitikira bzin’dzakhala themberero kwa Adjuda wentse omwe adayendesedwa ku ukapolo ku Babiloniya. Iwo an’dzati: “Yahova akucitise kukhala ninga Zedekiya na Akabe, omwe mambo wa ku Babiloniya adawatentha pamoto.
23 Pakuti iwo adacita bzinthu bzakupasa manyazi mu Jirayeri, mwakucita upombo na mkazi wa mwenekaciro na kulewa bzinthu bzakunama m’dzina langu uko ine ndiribe kuwatuma.
“‘“Ine ndikudziwa ndipo ndine mboni ya bzimwebzi,” walewa tenepo Yahova.’”
24 “Ndipo Semaiya wa ku Nehelamu umuuze kuti:
25 ‘Yahova wa anyankhondo, Mulungu wa Jirayeri walewa kuti: “Pakuti iwepo watumiza matsamba mu dzina lako kwa wanthu wentse wakukhala mu Jeruzalemu, kwa wantsembe Zefaniya mwana wa Maaseiya na kwa antsembe wentse ndipo matsambayo yakhalewa kuti:
26 ‘Yahova wakuikha kuti ukhale wantsembe m’mbuto mwa wantsembe Jehoyada, kuti ukhale nyakunyang’anira nyumba ya Yahova kuti unyang’anire dzenga omwe angacite bzinthu ninga mprofeta ucimumangirira pa muti;
27 tsono thangwe ranyi iwepo ulibe kumanga Jeremiya wa ku Anatoti omwe akucita bzinthu ninga mprofeta pakati panu?
28 Pakuti iye watituma kuti tikalewe ku Babiloniya kuti: “Imwepo munikhala kumweko magole mazinji. Mangani nyumba kuti mukhale. Bzalani minda ya bzisapo ndipo mudye bzisapo bzace.”’”’”
29 Pomwe wantsembe Zefaniya adawerenga tsambalo pamaso pa mprofeta Jeremiya,
30 Yahova adalewalewa na Jeremiya kuti:
31 “Uza wanthu wentse omwe ali ku ukapolo kuti: ‘Pakulewa bza Semaiya wa ku Nehelamu Yahova akulewa kuti: “Pakuti Semaiya wakuuzani maprofesiya uko ine ndiribe kumutuma ndipo wakucitisani kukhulupira bzinthu bzakunama,
32 Yahova akulewa kuti: ‘Nin’dzalanga Semaiya wa ku Nehelamu pabodzi na adzinza wace ndipo palibe ne na m’bodzi wa adzinza wace omwe an’dzapulumuka pakati pa wanthuwa. Iye an’dzawona lini bzinthu bzabwino bzomwe nin’dzacitira wanthu wangu, pakuti adacitisa wanthu kupandukira Yahova,’ walewa tenepo Yahova.”’”
Mafala ya m'nyantsi
^ Ayai pinango, “anyakumanga bzinthu bzakulimba.”
^ Ayai, “matenda.”
^ Ayai pinango, “zakubaduka.”
^ Mafala yace caiyo: “nimbamuka macibese kuti ndilewelewe namwe.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
