Jeremiya 3:1-25
3 Wanthu ambabvunza kuti: “Mwamuna akathotha mkazace ndipo mkaziyo akacoka acikalowodwa na mwamuna munango, kodi iye angabwererane pomwe na mkaziyo?”
Kodi dzikoli liribe kupswipizidwa kwene-kwene?
“Kodi iwepo ulibe kucita uputa na amuna azinji,Ndipo tsapano un’funa kubwererana na ine?” walewa tenepo Yahova.
2 “Nyang’anisa uwone tumapiri tung’ono-tung’ono tomwe tulibe mauswa.
Ni paponi pomwe ulibe kupswithidwa?
Ukhambakhala m’mphepete mwa miseu pakuwadikhiriraNinga munthu omwe ambandofuluka-fuluka m’dambo.
Ndipo ukupitiriza kupswipiza dzikoliNa uputa bwako pabodzi na bzicito bzako bzakuipa.
3 Ndipopa nvula izinji yasiya kubvumba,Ndipo nthawe ya cirimo kukubvumba lini.
Ukucita bzinthu mwakusaya manyazi ninga mkazi omwe akucita uputa;Ukubva lini pomwe manyazi.
4 Tsapano ukundilirira mwakukuwa kuti:‘Baba wangu, imwepo ndimwe xamwali wangu kuyambira pomwe ndikhali mng’ono!
5 Kodi imwepo mukhafunika kukhala mudasunama,Ayai kukoya cakumtima mpaka kale-kale?’
Bzimwebzi ni bzomwe iwepo umbalewa,Tsono ukupitiriza kucita bzinthu bzentse bzakuipa bzomwe un’kwanisa.”
6 Mu ntsiku za mambo Djosiya, Yahova adandiuza kuti: “‘Kodi wawona bzomwe Jirayeri wakusaya kukhulupirikayu wacita? Iye wakwira phiri liri-lentse litali ndipo wayenda pantsi pa muti uli-wentse ukulu wakugudira kuti acite uputa.
7 Napo iye wacita bzinthu bzentsenebzi, ine ndidapitiriza kumuuza kuti abwerere kwa ine, tsono iye alibe kubwerera, ndipo Djuda akhapitiriza kunyang’anisa bzicito bza m’bale wace wakusaya kukhulupirika.
8 Pomwe ndidawona bzimwebzi, ndidathamangisa Jirayeri wakusaya kukhulupirika ule, ndipo ndidamupasa tsamba lakumalisira malowozi thangwe ra uputa bwace. Tsono Djuda, omwe ni m’bale wace wacikazi wakusaya kukhulupirika ule alibe kucita mantha; iye adayambambo kucita uputa.
9 Iye* adawona kuti uputa bwacebo bukhali lini cinthu cakuipiratu, adapswipiza dzikolo ndipo adacita uputa na minyala na miti.
10 Napo bzacitika bzentsenebzi, m’bale wace wacikazi Djuda wakusaya kukhulupirikayo alibe kubwerera kwa ine na mtima wace wentse, koma mwaciphamaso,’ walewa tenepo Yahova.”
11 Na tenepo, Yahova adandiuza kuti: “Jirayeri wakusaya kukhulupirika walatiza kuti ngwakulungama, kuposa Djuda wakupanduka.
12 Ndoko ndipo kadziwise mafalaya ku mbali ya ku norte:
“‘“Bwerera kwa ine, iwe Jirayeri wakupanduka,” walewa tenepo Yahova.’ ‘“Nin’dzakunyang’anisa lini na ukali, pakuti ndine wakukhulupirika,” walewa tenepo Yahova.’ ‘“Nin’dzapitiriza lini kukhala na cakumtima mpaka kale-kale.
13 Koma ndobvuma kuphonya kwako, pakuti wapandukira Yahova Mulungu wako. Iwepo ukhapitiriza kufambizana na wanthu wa mitundu inango pantsi pa muti uli-wentse wakugudira bwino, ndipo ulibe kufuna kutetekera mafala yangu,” walewa tenepo Yahova.’”
14 “Bwererani imwe wana wakupanduka,” walewa tenepo Yahova. “Pakuti ine ndakhala mbuya* wanu caiye; nin’bwera kudzatenga m’bodzi mu mzinda uli-wentse, ndipo awiri m’banja liri-lentse, ndicidzakubweresani ku Ziyoni.
15 Nin’dzakupasani amakabusa kuti acite bzinthu mwakubverana na kufuna kwangu, ndipo iwo an’dzakudyesani na cidziwiso na luso lakubvesesa bzinthu.
16 Mu ntsiku zimwezo, imwepo mun’dzakhala na wana ndipo mun’dzawanda kwene-kwene m’dzikoli,” walewa tenepo Yahova. “Wanthu an’dzalewa lini pomwe kuti: ‘Thungwa la mpangano la Yahova!’ Lin’dzabwera lini pomwe mu mtima mwawo, an’dzalikumbukira lini ne kulisuwa, ndipo lin’dzakonzedwa lini pomwe.
17 Pa nthawe imweyo, Jeruzalemu an’dzacemeredwa mpando wa umambo wa Yahova, ndipo mitundu yentse ya wanthu in’dzatsonkhanisidwa ku Jeruzalemu kuti itumbize dzina la Yahova. Iwo an’dzagopa lini pomwe kucita bzomwe mitima yawo yakuipa ikufuna.”
18 “Mu ntsiku zimwezo, wanthu wa Djuda na wanthu wa Jirayeri an’dzafamba pabodzi ndipo an’dzacoka pabodzi ku dziko la ku norte, aciyenda ku dziko lomwe ndidapasa makolo yanu yakale ninga utaka.
19 Ndipo ndidakumbuka kuti: ‘Mpsakukondwesa kwene-kwene kuti ndidakuikhani pakati pa wana wangu wacimuna na kukupasani dziko labwino lomwe ni utaka bwabwino bomwe wanthu azinji ambabusirira!’* Ndipo ndikhakumbukambo kuti mungadandicemera ‘Baba wangu!’ nakuti mungadasiya lini kunditewera.
20 ‘Tsono kulewa cadidi, ninga mkazi wakusaya kukhulupirika omwe ambacita uputa acisiya mwamuna wace,* imwepombo wa m’nyumba ya Jirayeri mulibe kukhala wakukhulupirika kwa ine,’ walewa tenepo Yahova.”
21 M’tumapiri tung’ono-tung’ono twakusaya mauswaMukubveka baludya, kulira na kudandaula kwa Ajirayeri,Pakuti iwo agonyolesa njira zawo;Iwo ayebwa Yahova Mulungu wawo.
22 “Bwererani kwa ine, imwe wana wakupandukamwe.
Nin’poza kupanduka kwanu.”
Kulewa cadidi tin’dzalewa kuti: “Tiri pano ife! Tabwera kwa imwepo,Pakuti imwe, Yahova, ndimwe Mulungu wathu.
23 Kulewa cadidi tikhabzinamiza tekha pomwe tikhakuwa mwakusekerera mirungu inango, m’tumapiri tung’ono-tung’ono na m’mapiri.
Kulewa cadidi cipulumuso ca Jirayeri cimbacokera kwa Yahova Mulungu wathu.
24 Tsono kuyambira pa utswaka bwathu, cinthu cakupasa manyazi* cikudya cisapo ca basa lamphanvu la makolo yathu yakale,Mabira yawo na ng’ombe zawo,Wana wawo wacimuna na wacikazi.
25 Mbatigoneni pa manyazi yathu, ndipo tifunike kunyozeka kwathu,Pakuti taphonyera Yahova Mulungu wathu,Ifepano pabodzi na azipai wathuKuyambira pomwe tikhali maswaka mpaka pano,Ndipo tiribe kubvera mafala ya Yahova Mulungu wathu.”
Mafala ya m'nyantsi
^ Pinango-pentse akulewedwayu ni Jirayeri.
^ Ayai pinango, “mwamuna.”
^ Mafala yace caiyo: “bomwe acikunda wa mitundu minango ambabusirira.”
^ Mafala yace caiyo: “mwanzace.”
^ Ayai, “mulungu wakupasa manyazi.”
