Jeremiya 30:1-24
-
Piciro la kubwezeresa na kupoza (1-24)
30 Yahova adalewalewa na Jeremiya kuti:
2 “Yahova Mulungu wa Jirayeri walewa kuti: ‘Nemba m’bukhu mafala yentse yomwe nin’kuuza.
3 Yahova akuti: “Zikufika ntsiku zomwe nin’dzatsonkhanisa wanthu wangu omwe adayendesedwa ku ukapolo, Ajirayeri na Adjuda ndipo nin’dzawabwezera pomwe m’dziko lomwe ndidapasa iwo na makolo yawo yakale, ndipo iwo an’dzakhala pomwe m’mwemo,”’” walewa tenepo Yahova.
4 Aya ni mafala yomwe Yahova adauza Ajirayeri na Adjuda.
5 Yahova walewa kuti:
“Tikubva baludya la wanthu omwe akutetemera,Iwo ana mantha ndipo alibe mtendere.
6 Ndaphata minyendo, bvunzani penu mwamuna angabale.
Tenepo thangwe ranyi ndikuwona amuna wentse aphata mimba zawo*Ninga mkazi omwe an’funa kubereka?
Thangwe ranyi wentse nkhope zawo zasunama?
7 Maine! Palibe ntsiku yakundendemerana na imweyi.
Pakuti ntsiku imweyi njakugopswa.*Ni nthawe ya tsoka kwa Djakobo.
Tsono iye an’dzapulumuka.”
8 Yahova wa anyankhondo walewa kuti: “Pa ntsiku imweyo nin’dzatcola djoki lako, nin’dzalicosa m’khosi mwako, ndipo nin’dzabwedza bzingwe bzako. Palibe ne munthu m’bodzi wa m’dziko linango omwe an’dzakuboneresa.
9 Wanthu wangu an’dzatumikira Yahova Mulungu wawo na Davide mambo wawo omwe nin’dzawapasa.”
10 “Ndipo iwe mtumiki wangu Djakobo, leka kucita mantha,Iwe Jirayeri leka kugopa.
Pakuti ndikukupulumusa kucokera kutaliNdipo ndikupulumusambo wanthu wako ku dziko lomwe mbakapolo.
Djakobo an’dzabwerera, ndipo an’dzakhala mwakuderekha na mwa mtendere,Ndipo palibe munthu omwe an’dzawagopswa,” walewa tenepo Yahova.
11 “Pakuti ine ndinawe kuti ndikupulumuse,
Koma nin’pfudza mitundu yentse ya wanthu ya komwe ndidakubalalisira;Tsono iwepo nin’dzakupfudza lini,
Nin’dzakulanga mwakuthemera,Ndipo nin’dzakusiya lini tenepo ne kukulanga,” walewa tenepo Yahova.
12 Pakuti Yahova akulewa kuti:
“Kupwetekeka kwako kun’pola lini.
Cironda cako ciribe mankhwala.
13 Palibe munthu omwe an’kutawirira mulandu wako,Palibe mankhwala ya cironda cako,
Ndipo palibe mankhwala yakukupoza.
14 Akwende wako wentse akuyebwa.
Iwo an’dzakunyang’ana lini pomwe.
Pakuti ndakumenya ninga momwe nyamadulanthaka angadakumenyera,Na cirango cikuluThangwe ra kuphonya kwako na pikado zako.
15 Thangwe ranyi ukulira na cironda cako?
Kubva kuwawa kwako n’kwakusaya kupozeka!
Thangwe ra kuphonya kwako kukulu na pikado zakoIne ndakucitira bzimwebzi.
16 Tenepo nin’dzapfudza wentse omwe akukupfudza,Ndipo anyamadulanthaka wako an’dzayenda ku ukapolo.
Wale omwe adakutengera bzinthu bzako, an’dzatengeredwambo,Ndipo wale omwe adapamba bzinthu bzako, an’dzapambidwambo.”
17 Yahova walewa kuti: “Nin’dzabwezeresa thanzi lako na kupoza bzironda bzako,Napo iwo akhakucemera kuti mzinda wakulambidwa, acimbalewa kuti:
‘Uyu ni mzinda wa Ziyoni omwe palibe munthu omwe akuunyang’ana.’”
18 Yahova walewa kuti:
“Nin’tsonkhanisa wanthu wa Djakobo omwe adayendesedwa ku ukapolo,Ndipo nin’dzabvera ntsisi matabernakulo yace.
Mzinda un’dzamangidwa pomwe pa phiri lace,Ndipo nyumba ya ntsanza yakulimba in’dzamangidwa pa mbuto yace yakuthemera.
19 Iwo an’dzalewa mafala yakutenda acikuwa mwakukomedwa.
Iwo an’dzacepa lini pakuti nin’dzawawandisa.Nin’dzawacitisa kukhala azinji,*Ndipo iwo an’dzakhala lini ang’ono-ng’ono.
20 Wana wa Djakobo an’dzakhala ninga kale-kale,Ndipo wanthu wace an’dzakhala mwakukhazikika pamaso pangu.
Nin’dzalanga wanthu wentse omwe ambamuponderera.
21 Mtsogoleri wawo an’dzakhala m’bodzi wa wanthu waceNdipo mtongi wawo an’dzacoka pakati pawo.
Nin’dzamubweresa pafupi ndipo iye an’dzandifenderera.”
“Pakuti ndikasaya kucita bzimwebzi, mbani omwe angakhwimike kuti andifenderere pafupi?” walewa tenepo Yahova.
22 “Imwepo mun’dzakhala wanthu wangu, ndipo ine nin’dzakhala Mulungu wanu.”
23 Onani! Conzi cakucokera kwa Yahova cin’dzamenya mwaukali,Cin’dzamenya ninga kabvunvuli pa misolo ya wanthu wakuipa.
24 Yahova an’dzabweza lini ukali bwace bwakugaka moto,Mpaka kucita bzomwe iye akufuna mu mtima mwace.
Imwepo mun’dzabvesesa bzimwebzi kuphampha kwa ntsiku zakumalizira.
Mafala ya m'nyantsi
^ Ayai, “m’ciuno mwawo.”
^ Mafala yace caiyo: “njikulu.”
^ Ayai pinango, “wakulemekezeka.”
