Jeremiya 31:1-40
31 Yahova walewa kuti: “Pa nthawe imweyo, ine nin’dzakhala Mulungu wa Ajirayeri wentse ndipo iwo an’dzakhala wanthu wangu.”
2 Yahova walewa kuti:
“Wanthu omwe adapulumuka na xipada adabveredwa ntsisi ku dambo,Pomwe Ajirayeri akhayenda ku mbuto yawo yakupuma.”
3 Yahova adandibwerera na patali ndipo adalewa kuti:
“Nimbakufuna na lufoyi lakusaya kumala.
Thangwe ra lufoyi limweri ndakukwewera kwa ine ndicikhala wakukhulupirika kwa iwepo.*
4 Ine nin’dzakumanga pomwe, ndipo iwepo un’dzamangidwa pomwe.
Iwe dende la Jirayeri, un’dzatenga pomwe tung’oma twako tung’ono,Ndipo un’dzabzina mwakukomedwa.
5 Un’dzabzala pomwe miti ya uva m’mapiri ya Samariya.Alimi an’dzabzala ndipo an’dzadya bzisapo bzawo.
6 Pakuti in’dzafika ntsiku yomwe alindiri wa m’phiri la Efraimu an’dzakuwa kuti:
‘Mbatikwireni m’phiri la Ziyoni komwe kuna Yahova Mulungu wathu.’”
7 Yahova walewa kuti:
“Imbirani Djakobo mwakukondwa.
Kuwani thangwe muli padzulu pa wanthu wa mitundu.
Dziwisani bzimwebzi ndipo tumbizani mucimbalewa kuti:‘Imwe Yahova, pulumusani wanthu wanu, anyakusala wa Jirayeri.’
8 Nin’dzawabweresa kucokera ku dziko la ku norte.
Nin’dzawatsonkhanisa kucokera ku mbuto zakutali za dziko.
Pakati pawo pan’dzakhala azimola na anyakupunduka,Akazi omwe ana mimba pabodzi na wale omwe asala pang’ono kubereka.
Iwo an’dzabwerera ninga thimu likulu.
9 Iwo an’dzabwerera akulira.
Nin’dzawatsogolera pa nthawe yomwe iwo akukumbira thandizo langu.
Nin’dzawatsogolera komwe kuna madzi mazinji,Mu njira yabwino yomwe in’dzawakhukhumudwisa lini.
Pakuti ine ndine Baba wa Jirayeri, ndipo Efraimu ni mwana wangu wakuyamba.”
10 Imwe mitundu ya wanthu,Tetekerani mafala ya Yahova ndipo dziwisani pakati pa ntsuwa zakutali kuti:
“Ule omwe adabalalisa Ajirayeri ndiye omwe an’dzawatsonkhanisa.
Iye an’dzawakhotcerera ninga momwe makabusa ambakhotcererera bzifuwo bzace.
11 Pakuti Yahova an’dzalombola Djakobo,Ndipo an’dzamupulumusa m’manja mwa ule omwe ngwamphanvu kwene-kwene kuposa iye.
12 Iwo an’dzabwera acikuwa mwakukondwa padzulu pa phiri la Ziyoni,Ndipo an’dzakomedwa na kudeka mtima kwa* Yahova,Iwo an’dzakomedwa na bzinthu bza m’munda, vinyu ipsa na mafuta.An’dzakomedwambo na wana wa mabira na wa ng’ombe.
Iwo an’dzakhala ninga munda wakuthiriziridwa bwino,Ndipo an’dzafota lini pomwe.”
13 “Pa nthawe imweyi, madende yan’dzabzina mwakukomedwaPabodzi na maswaka na nkhalamba,
Kulira kwawo nin’dzakusandusa kuti kukhale cikondweso.
Nin’dzawatsangalaza ndiciwacitisa kukhala wakukondwa m’mbuto mwakukhala wakusunama.
14 Antsembe nin’dzawapasa cakudya cizinji,Ndipo wanthu wangu an’dzakhuta na bzinthu bzabwino bzomwe nin’dzawapasa,” walewa tenepo Yahova.
15 “Yahova walewa kuti:
‘Ku Rama kukubveka fala la munthu omwe akudandaula na kulira kwene-kwene kuti:
Rakeli akulira wana wace,
Iye akulamba kutsangalazidwa,Thangwe wanawo kulibe.’”
16 Yahova walewa kuti:
“‘Nyamala ndipo pukuta misozi yako,Pakuti un’dzabairidwa na basa lako,
Iwo an’dzabwerera kucokera ku dziko la anyamadulanthaka wawo,’ walewa tenepo Yahova.
17 ‘Ndipo pana cidikhiro cakuti tsogolo lako lin’dzakhala labwino.
Wana wako an’dzabwerera pomwe ku dziko lawo,’” walewa tenepo Yahova.
18 “Ndabva kudandaula kwa Efraimu kwakuti:‘Imwepo mwanditsimula ndipo ine ndabvuma kutsimulidwako,Ninga kamphulu komwe kakanati kupfunzisidwa.
Ndibwezeni ndipo ine nin’dzabwerera mwakusaya kucedwa,Pakuti imwe Yahova ndimwe Mulungu wangu.
19 Ndabwerera thangwe ndakungula;Pomwe mudandithandiza kubvesesa ndidamenya ntcafu yangu thangwe ra kubva kuwawa.
Ndipo ndikhana manyazi kwene-kwene,Thangwe ra bzomwe ndidacita pomwe ndikhali tswaka.’”
20 “Kodi Efraimu ni mwana lini wakufunika kwene-kwene kwa ine, mwana omwe nimbamufuna?
Pomwe nimbamutsimula mwakubwereza-bwereza, ni pomwe nimbamukumbukira kazinji.
Ndipopa nimbaneseka mu mtima mwangu* thangwe ra iye,
Kulewa cadidi nin’dzamubvera ntsisi,” walewa tenepo Yahova.
21 “Ikha bzizindikiro mu mseuNdipo imisa bzikwangwali m’mwemo.
Khala tceru mu mseu, mu njira yomwe iwepo un’dzafamba.
Bwerera iwe dende la mu Jirayeri, bwerera ku mizinda yako.
22 Iwe mwana wacikazi wakusaya kukhulupirika, un’dzapenukira mpaka lini?
Pakuti Yahova adalenga cinthu cipsa pa dziko:
Mkazi an’dzalinga mwamuna mwakufunisisa.”
23 Yahova wa anyankhondo Mulungu wa Jirayeri walewa kuti: “Mafalaya yan’dzalewedwa pomwe m’dziko la Djuda na m’mizinda yace ndikadzabweresa wanthu wangu omwe ali ku ukapolo: ‘Yahova akusimbe iwe mbuto yakulungama, iwe phiri lakucena.’
24 M’mwemo mun’dzakhala Djuda pabodzi na mizinda yace yentse, alimi na wale omwe akuusa bzifuwo.
25 Pakuti nin’dzalimbisa ule omwe waneta, ndipo nin’dzakhutisa ule omwe wakomoka na njala.”
26 Na tenepo ndidamuka, ndidafungula maso ndipo ndidawona kuti tulo twangu tukhali twakudekeza.
27 Yahova walewa kuti: “Onani! Ntsiku zikufika ndipo nin’dzacitisa wanthu wa m’nyumba ya Jirayeri na wanthu wa m’nyumba ya Djuda kuwanda ndipo nin’dzawandisambo bzifuwo bzawo.”
28 “Ndikhawanyang’anisisa kuti ndiwazule, ndiwagumule, ndiwagwese, ndiwapfudze nakuti ndiwadzonge. Mwakundendemerana na bzimwebzi nin’dzawanyang’anisisambo kuti ndiwamange na kuwabzala,” walewa tenepo Yahova.
29 “Mu ntsiku zimwezo, kun’dzabveka lini pomwe mafala yakuti: ‘Abereki adya uva bwakuwawa, tsono wana ndiwo omwe abva dziriza mano yawo.’
30 M’mbuto mwace, munthu ali-wentse an’dzafa thangwe ra kuphonya kwace. Omwe an’dya uva bwakuwawa ndiye omwe an’dzabva dziriza mano yace.”
31 Yahova walewa kuti: “Onani! Zikufika ntsiku zomwe nin’cita mpangano upsa na wanthu wa m’nyumba ya Jirayeri na wa m’nyumba ya Djuda.
32 Un’dzakhala lini ninga mpangano omwe ndidacita na makolo yawo yakale mu ntsiku zomwe ndidaphata boko lawo kuti ndiwacose m’dziko la Edjipito, mpangano wangu omwe iwo alibe kuubvera, napo ine ndikhali mwenekaciro wawo,’* walewa tenepo Yahova.”
33 Yahova walewa kuti: “Uyu ni mpangano omwe nin’dzacita na wanthu wa m’nyumba ya Jirayeri pambuyo pa ntsiku zimwezo. Nin’dzaikha lamulo langu mkati mwawo ndipo nin’dzalinemba mumtima mwawo. Ine nin’dzakhala Mulungu wawo ndipo iwo an’dzakhala wanthu wangu.”
34 “Iwo an’dzapfunzisana lini okha-okha ayai ali-wentse kupfunzisa m’bale wace kuti: ‘Dziwani Yahova!’ thangwe wentsenewo, kuyambira mng’ono mpaka mkulu an’dzandidziwa. Pakuti nin’dzalekerera kuphonya kwako ndipo nin’dzakumbukira lini pomwe pikado yawo,” walewa tenepo Yahova.
35 Yahova, ule omwe ambapereka dzuwa,Kuti limbabvunike masikati,Malamulo* ya mwezi na ya nyenyezi kuti bzimbabvunike usiku,Ule omwe ambabvundula nyanza kuti icite mabimbiOmwe dzina lace ni Yahova wa anyankhondo, walewa kuti:
36 “‘Malamuloyo yakadzasiya kuphata basa,Ni pomwe dzinza la Jirayeri lin’dzasiya kukhala langu mpaka kale-kale,’ walewa tenepo Yahova.”
37 Yahova walewa kuti: “‘Penu munthu angakwanise kupima kudzulu, acikwanisambo kufufudza aliserse zentse za dziko la pantsi, ndiye kuti inepano ningalambe mtundu wentse wa Jirayeri thangwe ra bzinthu bzentse bzomwe adacita,’ walewa tenepo Yahova.”
38 Yahova walewa kuti: “Onani! Zikufika ntsiku zomwe mzindayu un’dzamangidwira pomwe Yahova kucokera ku ntsanza ya Hananeli mpaka ku Cipata ca Pakhona.*
39 Ndipo cingwe cakupimira cin’dzafuthulidwa mpaka pa phiri la Garebi ndipo cin’dzagonyola mpaka kuyenda ku Gowa.
40 Ndipo cigwa centse ca wanthu wakufa na ca dotha na minda yentse mpaka ku cigwa ca Kidironi, inde, mpaka pakhona pa Cipata ca Kavalo ku mbali ya kumabvadzuwa, in’dzakhala mbali yakupambulika ya Yahova. Mzindayu un’dzatengedwa lini ne kupfudzidwa.”
Mafala ya m'nyantsi
^ Ayai, “ndicikulatiza lufoyi lacadidi.”
^ Ayai, “na bzinthu bzabwino bza.”
^ Mafala yace caiyo: “m’mimba mwangu.”
^ Ayai pinango, “mwamuna wawo.”
^ Ayai, “mitemo.”
^ Ayai, “paponta.”
