Jeremiya 33:1-26
33 Pomwe Jeremiya akhadafungiridwa mu Kintale ya Alindiri, Yahova adalewalewa naye pomwe kaciwiri kuti:
2 “Yahova, Ule omwe adalenga dziko, Yahova omwe adalikhazikisa mwakulimba, omwe dzina lace ni Yahova walewa kuti:
3 ‘Ndicemere ndipo ine nin’dzakutawira ndipo pa nthawe imweyoletu nin’dzakufotokozera bzinthu bzikulu na bzakunesa kubvesesa bzomwe umbabzidziwa lini.’”
4 “Yahova Mulungu wa Jirayeri pakulewa bza nyumba za mzindayu na nyumba za amambo wa Djuda zomwe zikupfudzidwa thangwe ra mitunthu yakumenyera nkhondo na xipada
5 na pakulewambo bza wanthu omwe akubwera kudzamenyana na Akalideya na bza mbuto yomwe yadzala na wanthu wakufa omwe ndawapha na ciya cangu na ukali bwangu, omwe kuipa kwawo kwacitisa kuti mzindayu ndiubisire nkhope yangu, walewa kuti:
6 ‘Nin’dzapoza wanthu wa mu mzindayu ndiciwacitisa kukhala na thanzi labwino. Nin’dzawapoza ndiciwapasa mtendere uzinji na mkhomeko.*
7 Nin’dzabwezeresa wanthu wangu Adjuda na Ajirayeri omwe akhadayendesedwa ku ukapolo ndipo nin’dzawalimbisa ninga momwe ndidacitira pakuyamba.
8 Nin’dzawacenesa ku bzakuphonya bzentse bzomwe adandicitira ndipo nin’dzawalekerera bzakuphonya bzawo bzentse bzomwe adandicitira na kusaya kubvera malamulo yangu.
9 Dzina la mzindayu lin’dzandicitisa kukhala wakubvekera, wakutumbizika na wakulemekezeka* pamaso pa mitundu yentse ya wanthu ya pa dziko la pantsi yomwe in’dzabva bzinthu bzentse bzabwino bzomwe nin’dzafuna kucitira wanthu wangu. Ndipo mitundu imweyi in’dzagopa na kutetemera thangwe ra bzinthu bzentse bzabwino na mtendere omwe nin’dzapasa wanthu wangu.’”
10 “Yahova walewa kuti: ‘Pa mbuto ino yomwe mukulewa kuti ni matere yakusaya kukhalidwa na wanthu ne bzirombo, yomwe ni mizinda ya Djuda na miseu ya Jeruzalemu, yomwe ni matere yakusaya kukhalidwa na wanthu ne bzirombo, kumweko kun’dzabveka pomwe
11 baludya la kukomedwa na la kusekerera, fala la namwali wacimuna na fala la namwali wacikazi, mafala ya omwe akulewa kuti: “Tendani Yahova wa anyankhondo pakuti Yahova ngwabwino, lufoyi lace lacadidi lin’dzakhala mpaka kale-kale!”’
“‘An’dzabweresa pa nyumba ya Yahova ntsembe za kutenda, pakuti nin’dzabwezeresa m’dziko lino wale omwe akhadayendesedwa ku ukapolo ndipo iwo an’dzakhala ninga momwe akhaliri pakuyamba,’ walewa tenepo Yahova.”
12 “Yahova wa anyankhondo walewa kuti: ‘Pa mbuto ino yomwe ni matere yakusaya wanthu ne bzifuwo pabodzi na mizinda yace yentse, pan’dzawoneka pomwe mbuto yakudyesera bzifuwo, yomwe amakabusa an’dzayendesa bzifuwo bzawo kuti bzikapume kumweko.’
13 “‘M’mizinda ya m’mapiri, m’mizinda ya m’bzigwa,* m’mizinda ya ku suli, m’dziko la Benjamini, m’mphepete mwa Jeruzalemu na m’mizinda ya Djuda, amakabusa an’dzalewenga pomwe mabira yawo yakadzakhala yakupita pantsi pa manja yawo,’ walewa tenepo Yahova.”
14 Yahova walewa kuti: “‘Onani! Ntsiku zikufika zomwe nin’dzateweza piciro labwino lomwe ndidacita pakulewa bza nyumba ya Jirayeri na nyumba ya Djuda.
15 Mu ntsiku zimwezo na pa nthawe imweyo, nin’dzacitisa kuti kwa Davide kuwoneke mwana wakulungama* ndipo iye an’dzacita bzinthu mwacirungamo na kuteweza malamulo pa dziko.
16 Mu ntsiku zimwezo, Djuda an’dzapulumuka ndipo Jeruzalemu an’dzakhala mwakukhotcerereka. Ndipo dzina lace lin’dzakhala lakuti: Yahova ni Cirungamo Cathu.’”
17 “Pakuti Yahova walewa kuti: ‘Nthawe zentse pan’dzawoneka mbadwa ya Davide yomwe in’dzakhala pa mpando wa umambo pa nyumba ya Jirayeri,
18 ndipo nthawe zentse pamaso pangu pan’dzawoneka wantsembe wa dzinza la Levi kuti adzapereke ntsembe zentse zakucita kutentha, kutentha ntsembe ya bzinthu bza m’munda na kupereka ntsembe zinango.’”
19 Yahova adalewalewa pomwe na Jeremiya kuti:
20 “Yahova walewa kuti: ‘Munthu akakwanisa kupfudza mpangano wangu wakuti pakhale masikati na usiku, acikwanisa kucitisa kuti paleke kuwoneka masikati na usiku pa nthawe yace yakukhazikisidwa,
21 ndiye kuti angakwanisembo kupfudza mpangano omwe ndidacita na mtumiki wangu Davide, acileka kukhala na mwana wacimuna kuti atonge pa mpando wace wa umambo na kupfudzambo mpangano wangu omwe ndidacita na antsembe wa dzinza la Levi omwe mbaatumiki wangu.
22 Pakuti mpsakusaya kukwanisika kulewenga nyenyezi kudzulu* na kupima mcenga m’nyanza, tenepo nin’dzacitisambo kuti mbadwa za* Davide mtumiki wangu na Alevi omwe akunditumikira ziwande.’”
23 Ndipo Yahova adalewalewa pomwe na Jeremiya kuti:
24 “Kodi ulibe kubva wanthu akulewa kuti: ‘Yahova an’dzalamba madzinza mawiri yomwe adayasankhula’? Iwo akulemekeza lini wanthu wangu ndipo akuwawona lini ninga mtundu wa wanthu.
25 “Yahova walewa kuti: ‘Ninga momwe ndidakhazikisira mpangano wangu wakuti pakhale masikati na usiku na malamulo* ya kudzulu na ya pa dziko la pantsi,
26 nin’dzalamba lini mbadwa* za Djakobo na za mtumiki wangu Davide ndicisaya kusankhula atongi pakati pa mbadwa zace kuti atonge mbadwa za Abulahamu, Izaki na Djakobo. Pakuti nin’dzacosa wanthu wace omwe ali ku ukapolo ndipo nin’dzawabvera ntsisi.’”
Mafala ya m'nyantsi
^ Ayai, “cadidi.”
^ Ayai, “wakudeka.”
^ Ayai, “m’magowa.”
^ Ayai, “mphukira yakulungama,” ayai “nyakutambira utaka wakulungama.”
^ Mafala yace caiyo: “thimu la kudzulu.”
^ Ayai, “mbeu ya.”
^ Ayai, “mitemo.”
^ Ayai, “mbeu.”
