Jeremiya 34:1-22
34 Pomwe Nabukadinazori* mambo wa ku Babiloniya pabodzi na acikunda wace wentse na maumambo yentse ya pa dziko la pantsi yomwe yakhali pantsi pa utongi bwace na wanthu wentse omwe akhamenyana na Jeruzalemu na mizinda yomwe ikhali m’mbali mwace, Yahova adalewalewa pomwe na Jeremiya kuti:
2 “Yahova Mulungu wa Jirayeri walewa kuti: ‘Ndoko ukalewelewe na Zedekiya mambo wa Djuda ndipo ukamuuze kuti: “Yahova walewa kuti: ‘Nin’dzapereka mzindayu m’manja mwa mambo wa ku Babiloniya ndipo iye an’dzautentha na moto.
3 Un’dzapulumuka lini m’manja mwawo, pakuti mwakusaya kupenukira un’dzatengedwa ucikaperekedwa kwa iye. Un’dzawonana na mambo wa ku Babiloniya ndipo iye an’dzalewalewa nawe maso na maso ndipo patsogolo pace un’dzayendesedwa ku Babiloniya.’
4 Tenepo iwe Zedekiya mambo wa Djuda, tetekera mafala ya Yahova yakuti: ‘Pakulewa bza mambo, Yahova walewa kuti: “Iwepo un’dzafa lini na xipada.
5 Iwepo un’dzafa mwa mtendere ndipo wanthu an’dzatentha bzakununtcirisa pakupendesedwa kwako ninga momwe adacitira na makolo yako yakale na amambo omwe adakhala kale na moyo pomwe iwepo ukhanati kubadwa, ndipo wanthu an’dzakulira aciti: ‘Maine, mbuya wangu!’ Pakuti ndine omwe ndalewa mafala yamweya,’ walewa tenepo Yahova.”’”’”
6 Tenepo mprofeta Jeremiya adalewa mafala yentseneya kwa Zedekiya mambo wa Djuda ku Jeruzalemu,
7 pomwe acikunda wa mambo wa ku Babiloniya akhamenyana na Jeruzalemu pabodzi na mizinda yentse yakusala ya ku Djuda, yomwe ni Lakisi na Azeka pakuti ndiyo yokha mizinda yomwe ikhana mimuro yakulimba yomwe ikhadasala m’mizinda ya Djuda.
8 Yahova adalewalewa na Jeremiya pomwe mambo Zedekiya akhadamala kucita mpangano na wanthu wentse wa ku Jeruzalemu wakuti alewe bza kutsudzulidwa.
9 Wentsene akhafunika kutsudzula akapolo wawo Wacihebereu amuna na akazi kuti paleke kuwoneka munthu ali-wentse wakupitiriza kukhala na m’bale wace omwe ni Mdjuda ninga kapolo.
10 Tenepo nduna zentse na wanthu wentse adabvera. Iwo adacita mpangano wakuti angadatsudzula akapolo wawo wacimuna na wacikazi nakuti angadapitiriza lini kukhala nawo ninga akapolo. Iwo adabvera ndipo adawatsudzula.
11 Tsono patsogolo pace adatenga pomwe akapolo wacimuna na wacikazi omwe akhadawatsudzula wale aciwakhalisa pomwe akapolo.
12 Ndipopa Yahova adauza Jeremiya mafala, ndipo Yahova adati:
13 “Yahova Mulungu wa Jirayeri akulewa kuti: ‘Ine ndidacita mpangano na makolo yanu yakale pa ntsiku yomwe ndidawacosa mu dziko la Edjipito, dziko lomwe iwo akhali akapolo ndiciwauza kuti:
14 “Yakadzamala magole 7, munthu ali-wentse an’funika kudzatsudzula m’bale wace Mhebereu omwe adamugula ninga kapolo omwe adamutumikira kwa magole 6; mun’funika kudzamutsudzula.” Tsono makolo yanu yakale yalibe kundibvera ne kunditetekera.
15 Tsapanopapa* imwepo mwacinja ndipo mwacita bzinthu bzabwino pamaso pangu, mwakudziwisa bza kutsudzula anzanu. Mwacita mpangano pamaso pangu, pa nyumba yomwe imbadziwika na dzina langu.
16 Tsono mwabwerera pomwe m’mbuyo mucipswipiza dzina langu, mwakubweresa pomwe akapolo wanu wacimuna na wacikazi omwe mukhadawatsudzula mwakubverana na kufuna kwawo, ndipo mwawacitisa pomwe kukhala akapolo.’
17 “Tenepo Yahova walewa kuti: ‘Imwepo mulibe kundibvera pomwe mwadziwisa bza ali-wentse kutsudzula m’bale wace na kutsudzula mwanzace. Ndipopa tsapano ndikukudziwisani bza kutsudzulidwa kuti mufe na xipada, cisi* na njala ndipo nin’dzakucitisani kukhala cinthu cakugopswa kwa maumambo yentse ya pa dziko la pantsi,’ walewa tenepo Yahova.
18 Bzimwebzi ni bzomwe bzin’dzacitikira wanthu omwe adaphonyera mpangano wangu mwakusaya kuteweza mafala ya mpangano omwe adaucita pamaso pangu pomwe adagwata mphulu pakati, acipita na pakati pa mphuluyo,
19 omwe ni nduna za Djuda, nduna za Jeruzalemu, akulu-akulu wa pa nyumba ya mambo, antsembe na wanthu wentse wa m’dzikoli, ndipo adapita na pakati pa mbali ziwiri za mphuluyo:
20 Nin’dzawapereka kwa anyamadulanthaka wawo na kwa wale omwe akuwanyang’ana kuti awaphe, ndipo mathupi yawo yan’dzakhala cakudya kwa mbalame na kwa bzirombo bza pa dziko la pantsi.
21 Ndipo nin’dzapereka Zedekiya mambo wa Djuda pabodzi na nduna zace m’manja mwa anyamadulanthaka wawo, mwa wale omwe an’funa kuwapha na m’manja mwa acikunda wa mambo wa ku Babiloniya omwe asiya kumenyana namwe.’
22 “‘Ine nin’dzapereka lamulo, nin’dzawabwezeresa pomwe mu mzindayu ndipo iwo an’dzamenyana naye, an’dzaukunda aciutentha na moto. Nin’dzacitisa mzindayu kukhala matere na wakusaya kukhalidwa na wanthu,’ walewa tenepo Yahova.”
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Mafala yace caiyo: “Lero.”
^ Ayai, “matenda.”
