Jeremiya 35:1-19
-
Ciratizo cabwino cakubvera ca Arekabu (1-19)
35 Mu ntsiku za Jewoyakimu mwana wa Djosiya, mambo wa Djuda, Yahova adalewalewa na Jeremiya kuti:
2 “Ndoko ukalewelewe na wanthu wa pamui pa Rekabu, ukawabwerese m’cipinda cakudyera ca pa nyumba ya Yahova, ndipo uwapase vinyu kuti amwe.”
3 Tenepo ndidatenga Jaazaniya mwana wa Jeremiya, mwana wa Habaziniya pabodzi na abale wace, wana wace wentse na wanthu wentse wa pamui pa Arekabu
4 ndiciyenda nawo pa nyumba ya Yahova. Ndidayenda nawo m’cipinda cakudyera ca wana wa Hainani, omwe akhali mwana wa Igadaliya munthu wa Mulungu wacadidi. Cipinda cimweci cikhakhala pambali pa cipinda ca nduna zomwe zikhakhala padzulu pa cipinda ca Maaseiya mwana wa Salumu, nyakukhala pa msuwo.
5 Patsogolo pace ndidaikha makopo yakudzala na vinyu pamaso pa amuna wa pamui pa Rekabu, ndipo ndidawauza kuti: “Mwani vinyu.”
6 Tsono iwo adatawira kuti: “Tinimwa lini vinyu, pakuti Jewonadabi mwana wa Rekabu kholo lathu lakale adatiuuza kuti: ‘Lekani kudzamwa vinyu, imwepo ne wana wanu.
7 Lekani kumanga nyumba, kubzala mbeu, kubzala minda ya uva ne kukhala nayo. M’mbuto mwace, mbakhalani m’matendi kuti mukhale na moyo nthawe itali m’dziko lomwe mukukhala ninga alendo.’
8 Ndipopa timbapitiriza kubvera mafala ya Jewonadabi mwana wa Rekabu kholo lathu lakale, mwakucita bzentse bzomwe iye adatiuza, ndipo ife, azikazathu, wana wathu wacimuna na wacikazi timbamwa lini vinyu.
9 Tiribembo kumanga nyumba zakukhala ndipo tiribe minda ya uva, timbalima lini minda minango ne kubzala mbeu.
10 Tikupitiriza kukhala m’matendi na kupitiriza kubvera bzentse bzomwe Jewonadabi kholo lathu lakale adatiuza.
11 Tsono pomwe Nabukadinazori mambo wa Babiloniya adabwera kudzamenyana na dziko lathu tidalewa kuti: ‘Bwerani, mbatipiteni mu Jeruzalemu kuti tipulumuke kwa anyankhondo wa Akalideya na wa Asiriya ndipo tsapano tikukhala mu Jeruzalemu.’”
12 Ndipo Yahova adalewalewa na Jeremiya kuti:
13 “Yahova wa anyankhondo, Mulungu wa Jirayeri walewa kuti: ‘Ndoko ndipo kauze wanthu wa mu Djuda na wanthu wa mu Jeruzalemu kuti: “Kodi mulibe kuuzidwa mwakubwereza-bwereza kuti mubvere mafala yangu?” walewa tenepo Yahova.
14 Jewonadabi mwana wa Rekabu adauza wana wace kuti aleke kumwa vinyu, ndipo mpaka lero iwo akupitiriza kuteweza mafala yace yakuti aleke kumwa vinyu mwakubvera lamulo la kholo lawo lakale. Tenepo, ine ndikupitiriza kulewalewa namwe mwakubwereza-bwereza, tsono imwepo mukundibvera lini.
15 Ndikhambakutumizirani atumiki wangu wentse, aprofeta. Ndikhambawatumiza mwakubwereza-bwereza ndipo iwo akhambalewa kuti: ‘Ndaphata minyendo, ali-wentse mbaasiye njira yace yakuipa acicita bzomwe mpsabwino. Lekani kutewera mirungu inango ne kuitumikira, tenepo mun’dzapitiriza kukhala m’dziko lomwe ndidakupasani imwepo na makolo yanu yakale.’ Tsono mulibe kundibvera ne kunditetekera.
16 Wana wa Jewonadabi omwe akhali mwana wa Rekabu akubvera lamulo lomwe kholo lawo lakale lidawapasa, tsono wanthuwa akundibvera lini.”’”
17 “Tenepo Yahova Mulungu wa anyankhondo, Mulungu wa Jirayeri walewa kuti: ‘Nin’bweresera Djuda na wanthu wentse wakukhala mu Jeruzalemu tsoka lomwe ndidawacenjeza kuti lingadabwera, pakuti ndidawauza tsono alibe kundibvera, ndipo ndidapitiriza kuwacemera koma alibe kunditawira.’”
18 Jeremiya adauza wanthu wa pamui pa Rekabu kuti: “Yahova wa anyankhondo, Mulungu wa Jirayeri walewa kuti: ‘Pakuti mwabvera lamulo la Jewonadabi kholo lanu lakale ndipo mukupitiriza kuteweza mitemo yace yentse na kucita ndendende bzomwe iye adalewa,
19 Yahova wa anyankhondo, Mulungu wa Jirayeri walewa kuti: “Nthawe zentse pan’dzawoneka mwana wa Jewonadabi omwe ni mwana wa Rekabu kuti anditumikire.”’”
