Jeremiya 36:1-32
36 Mu gole lacinai la utongi bwa Jewoyakimu mwana wa Djosiya mambo wa Djuda, Yahova adauza Jeremiya kuti:
2 “Tenga mpukutu ndipo unembe mafala yentse yomwe ndidakuuza pakulewa bza nyathwa yomwe nin’dzapereka kwa Jirayeri, Djuda na mitundu yentse ya wanthu, kuyambira pa ntsiku yakuyamba yomwe ndidalewalewa nawe mu ntsiku za Djosiya mpaka lero.
3 Pinango wanthu wa m’nyumba ya Djuda akabva bza matsoka yentse yomwe nin’funa kuwabweresera angasiye njira zawo zakuipa, kuti ine ndiwalekerere bzakuphonya bzawo na pikado zawo.”
4 Tenepo Jeremiya adacemera Baruki mwana wa Neriya acimuuza mafala yentse yomwe Yahova akhadamuuza, ndipo Baruki adanemba mafalayo mu mpukutu.
5 Patsogolo pace Jeremiya adauza Baruki kuti: “Inepano ndaletsedwa kupita m’nyumba ya Yahova.
6 Ndipopa ndiwepo omwe un’funika kupita ucikawerenga mwakukuwa mafala ya Yahova yomwe yali mu mpukutu omwe ndakuuza kuti unembeyu. Ukawerenge mwakukuwa pamaso pa wanthu wentse m’nyumba ya Yahova pa ntsiku ya kubzimana kudya,* tenepo un’dzakhala ukuwerengera wanthu wentse wa Djuda omwe abwera kucokera m’mizinda yawo.
7 Pinango Yahova angabve mkumbiro wawo wakuti awadekere mtima, ndipo ali-wentse angasiye njira yace yakuipa, pakuti Yahova walewa kuti an’dzalatiza kwa wanthuwa ukali bwace na ciya cace cikulu.”
8 Tenepo Baruki mwana wa Neriya adacita bzentse bzomwe mprofeta Jeremiya akhadamuuza. Iye adapita m’nyumba ya Yahova acikawerenga mwakukuwa mafala ya Yahova yomwe yakhadanembedwa mu mpukutumo.
9 Mu gole lacixanu la utongi bwa Jewoyakimu mwana wa Djosiya mambo wa Djuda, mu mwezi waci 9, wanthu wentse wa mu Jeruzalemu na wentse omwe akhadabwera ku Jeruzalemuko kucokera m’mizinda ya Djuda adadziwisa bza kubzimana kudya pamaso pa Yahova.
10 Patsogolo pace Baruki adakawerenga mwakukuwa mpukutu wa mafala ya Jeremiya m’nyumba ya Yahova, m’cipinda cakudyera ca Gemariya mwana wa munembi Safani, pafupi na khonde likulu pa msuwo wa cipata cipsa ca nyumba ya Yahova, pamaso pa wanthu wentse.
11 Pomwe Mikaya mwana wa Gemariya, mzukulu wa Safani adabva mafala yentse ya Yahova yomwe yakhali mu mpukutumo,
12 adayenda kumui kwa mambo m’cipinda cakudyera ca munembi. Nduna* zentse zikhadakhala m’mwemo ndipo mukhana munembi Elixama, Delaiya mwana wa Semaiya, Elinatani mwana wa Akibori, Gemariya mwana wa Safani, Zedekiya mwana wa Hananiya na nduna zinango zentse.
13 Mikaya adawauza mafala yentse yomwe adabva pomwe Baruki akhawerenga mpukutu wanthu wentse akubva.
14 Tenepo nduna zentse zidatuma Jehudi mwana wa Netaniya, mzukulu wa Selemiya, mzukuludwe wa Kuxi kuti ayende kwa Baruki acikamuuza kuti: “Bwera kuno ndipo utenge mpukutu omwe wauwerenga pamaso pa wanthu wentse ule.” Tenepo Baruki mwana wa Neriya adatenga mpukutuyo aciyenda nawo komwe kukhana iwoko.
15 Ndunazo zidamuuza kuti: “Taphata minyendo, khala pantsi ndipo utiwerengere mpukutuyo mwakukuwa.” Tenepo Baruki adawawerengera mpukutuyo.
16 Pomwe iwo adamala kubva mafala yentseya, adanyang’anisana mwa mantha ndipo adauza Baruki kuti: “Tin’funika kukauzambo mambo mafala yamweya.”
17 Ndipo iwo adabvunza Baruki kuti: “Taphata minyendo, tiuze kuti wayanemba tani mafala yamweya. Kodi ni Jeremiya omwe wakuuza kuti unembe bzinthu bzentsenebzi?”
18 Baruki adawatawira kuti: “Iye akhambandiuza mafala yentseneya ndipo inepano ndayanemba mu mpukutuyu na tinta.”
19 Ndunazo zidauza Baruki kuti: “Iwepo na Jeremiya ndokoni mukabisalike, ndipo munthu ali-wentse aleke kudziwa komwe muli.”
20 Patsogolo pace ndunazo zidayenda kwa mambo omwe akhali pakhonde, ndipo adakasiya mpukutuyo m’cipinda ca munembi Elixama ndipo adauza mambo bzentse bzomwe akhadabva.
21 Pomwe mambo adabva bzimwebzi, adatuma Jehudi kuti akatenge mpukutuyo ndipo iye adakautenga mu cipinda cakudyera ca munembi Elixama. Jehudi adayamba kuwerenga mwakukuwa mpukutuyo pamaso pa mambo na nduna zentse zomwe zikhadaima pafupi na mamboyo.
22 Pa nthawe imweyi mambo akhali m’nyumba yomwe iye akhambakhala pa nthawe ya mphepo ndipo akhawotha moto. Umweyu ukhali mwezi wacipfemba.*
23 Pomwe Jehudi adamala kuwerenga matsamba matatu ayai manai ya mpukutuyo, mambo adayamba kugwata mpukutuyo na cisu ca munembi acimbathusa matsamba yomwe akhagwatayo pa moto omwe ukhali pamwepoyo. Iye adacita bzimwebzi mpaka kumaliza kutentha mpukutu wentseneyo.
24 Mambo pabodzi na atumiki wace wentse omwe akhabva mafala yentseneya, alibe kubva mantha ne kung’amba bzakubvala bzawo.
25 Napo kuti Elinatani, Delaiya na Gemariya adadandaulira mamboyo kuti aleke kutentha mpukutuyo, mamboyo alibe kuwabvera.
26 Patsogolo pace mambo adauza Jerameyeli mwana wa mambo, Seraiya mwana wa Aziriyeli pabodzi na Selemiya mwana wa Abideli kuti akamange munembi Baruki na mprofeta Jeremiya, tsono Yahova adawabisa.
27 Pomwe mambo adatentha mpukutu omwe ukhana mafala yomwe Baruki akhadanemba mwakuuzidwa na Jeremiya, Yahova adalewalewa pomwe na Jeremiya acimuuza kuti:
28 “Tenga mpukutu munango ndipo unembe pomwe mafala yentse yomwe yakhali mu mpukutu wakuyamba ule, omwe Jewoyakimu mambo wa Djuda watentha.
29 Unembe pakulewa bza Jewoyakimu mambo wa Djuda kuti: ‘Yahova walewa kuti: “Iwepo watentha mpukutuyu ucimbalewa kuti: ‘Thangwe ranyi mu mpukutumu mwanembedwa kuti: “Mambo wa ku Babiloniya an’dzabwera acidzapfudza dziko lino ndipo mun’dzagumanika lini wanthu ne bzirombo”?’
30 Tenepo nyathwa yomwe Yahova walewa kuti an’dzapasa Jewoyakimu mambo wa Djuda, njiyi: ‘Palibe mwana wace ne na m’bodziyo omwe an’dzakhala pa mpando wa umambo wa Davide, ndipo mtembo wace un’dzakhala padeca ucidzapsa na dzuwa masikati ndipo usiku un’dzamenyedwa na mphepo.
31 Nin’dzapasa mulandu Jewoyakimu, wana wace na atumiki wace thangwe ra bzakuphonya bzawo. Nin’dzawabweresera matsoka yentse yomwe ndikhadalewa kwa iwo na kwa wanthu wentse wakukhala mu Jeruzalemu na mu Djuda, thangwe rakuti iwo alibe kundibvera.’”’”
32 Patsogolo pace Jeremiya adatenga mpukutu munango, acipasa munembi Baruki, mwana wa Neriya, ndipo Baruki adanemba mafala yentse yomwe Jeremiya adamuuza, yomwe yakhali mu mpukutu omwe Jewoyakimu mambo wa Djuda adautentha ndipo mu mpukutumo adathumizira mafala manango mazinji yakucokera kwa Mulungu.
Mafala ya m'nyantsi
^ Ayai, “jejum.”
^ Ayai, “atsogoleri.”
^ Mwezi umweyu ukhayamba pakati pa Novembro mpaka pakati pa Dezembro. Onani Mafala Yakuphampha B15.
