Jeremiya 37:1-21
37 Zedekiya mwana wa Djosiya, adayamba kutonga m’mbuto mwa Koniya* mwana wa Jewoyakimu, thangwe rakuti mambo Nabukadinazori* wa ku Babiloniya akhadamuikha kuti akhale mambo m’dziko la Djuda.
2 Tsono iye, atumiki wace na wanthu wakukhala m’dzikolo alibe kubvera mafala yomwe Yahova akhalewa mwakuphatisa basa mprofeta Jeremiya.
3 Mambo Zedekiya adatuma Jeukali mwana wa Selemiya na Zefaniya mwana wa wantsembe Maaseiya kuti ayende kwa mprofeta Jeremiya kuti akamuuze kuti: “Ndaphata minyendo, tipempherere kwa Yahova Mulungu wathu.”
4 Jeremiya akhafamba mwakutsudzuka pakati pa wanthuwo thangwe akhanati kufungiridwa m’kawoko.
5 Acikunda wa Farawo adabwera kucokera ku Edjipito ndipo Akalideya omwe akhadazungulira mzinda wa Jeruzalemuyo adabva bzimwebzi. Tenepo iwo adacoka ku Jeruzalemuko.
6 Yahova adalewalewa na mprofeta Jeremiya acimuuza kuti:
7 “Yahova Mulungu wa Jirayeri walewa kuti: ‘Mukauze mambo wa Djuda omwe wakutumani kuti mubwere kwa ine kudzalewa kuti: “Acikunda wa Farawo omwe akubwera kudzakuthandizani, an’dzabwerera ku dziko lawo ku Edjipito.
8 Akalideya an’dzabwerera pomwe kudzamenyana na mzinda uno. An’dzaukunda aciutentha na moto.”
9 Pakuti Yahova walewa kuti: “Lekani kubzipumpsa mucimbalewa kuti: ‘Akalideya ayenda ndipo animenyana lini nafe,’ thangwe rakuti iwo alibe kuyenderatu.
10 Napo mucipha pafupi-fupi acikunda wentse wa Akalideya omwe akumenyana namwe, acindosala omwe adapwetekeka kwene-kwene, iwo an’dzamuka basi m’matendi yawo acidzatentha mzindayu na moto.”’”
11 Pomwe acikunda wa Akalideya adacoka ku Jeruzalemu thangwe ra acikunda wa Farawo,
12 Jeremiya adayenda ku dziko la Benjamini kucokera ku Jeruzalemu kuti akatambire mbuto pakati pa wanthu wace.
13 Tsono pomwe iye adafika pa Cipata ca Benjamini, nyakunyang’anira alindiri omwe dzina lace akhali Iriya mwana wa Selemiya, mzukulu wa Hananiya, adaphata mprofeta Jeremiya acimuuza kuti: “Iwepo uli kumbali ya Akalideya!”
14 Tsono Jeremiya adati: “Ne! Ndiri lini kumbali ya Akalideya.” Tsono iye alibe kufuna kumubvera. Tenepo Iriya adamanga Jeremiya acimuyendesa komwe kukhana nduna.
15 Ndunazo zikhadakalipa kwene-kwene na Jeremiya, ndipo izo zidamumenya, zicimumanga kumui kwa munembi Jewonatani komwe kukhadadzasandusidwa kawoko.
16 Jeremiya adafungiridwa m’kawoko m’cipinda ca pantsi, ndipo iye adakhala m’mwemo ntsiku zizinji.
17 Patsogolo pace mambo Zedekiya adatuma wanthu kuti akatenge Jeremiya. Pomwe adabwera naye, mamboyo adamubvunza mibvunzo mwacintsintsi m’nyumba mwace.* Iye adamubvunza kuti: “Kodi una mafala yali-yentse yakucokera kwa Yahova?” Jeremiya adamutawira kuti: “Inde ndinayo!” Ndipo adapitiriza kulewa kuti: “Imwepo mun’dzaperekedwa m’manja mwa mambo wa ku Babiloniya!”
18 Jeremiya adabvunzambo mambo Zedekiya kuti: “Kodi inepano ndakuphonyerani ciyani imwepo, atumiki wanu pabodzi na wanthu wanu kuti mundifungire m’kawoko?
19 Ali kuponi aprofeta wanu omwe akhakuuzani kuti: ‘Mambo wa Babiloniya anibwera lini kudzamenyana na imwepo pabodzi na dzikoli’?
20 Tsapano ndaphata minyendo, nditetekereni mbuya wangu mambo, ndaphata minyendo, bvani mkumbiro wangu wakuti mundidekere mtima. Lekani kundiyendesa pomwe kumui kwa munembi Jewonatani, thangwe kumweko ningakafe.”
21 Tenepo mambo Zedekiya adalewa kuti Jeremiya akafungiridwe mu Kintale ya Alindiri ndipo ntsiku zentse akhambamupasa pau yabololindo, yomwe ikhacokera ku mseu wa anyakuphika pau, ndipo adapitiriza kumupasa pauyo mpaka pau zentse kumala mu mzindamo. Jeremiya adapitiriza kukhala mu Kintale ya Alindiri.
Mafala ya m'nyantsi
^ Omwe ambacemeredwambo kuti Jowaki na Jekoniya.
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “m’nyumba ya mambo.”
