Jeremiya 38:1-28
38 Sefatiya mwana wa Matane, Gedaliya mwana wa Pasuri, Jukali mwana wa Selemiya na Pasuri mwana wa Malikiya adabva mafala yomwe Jeremiya akhauza wanthu wentse yakuti:
2 “Yahova walewa kuti: ‘Omwe an’sala mu mzinda muno, an’dzafa na xipada, njala na cisi,* tsono omwe an’dzabzipereka kwa Akalideya an’dzapitiriza kukhala na moyo. An’dzapulumusa moyo wace ndipo un’dzakhala ninga mabaibai yace.’
3 Yahova walewa kuti: ‘Kulewa cadidi, mzinda uno un’dzaperekedwa m’manja mwa acikunda wa mambo wa ku Babiloniya, ndipo iye an’dzautenga.’”
4 Nduna zidauza mambo kuti: “Taphata minyendo, tongani kuti munthuyu aphedwe thangwe akutepesa acikunda omwe asala mu mzinda muno pabodzi na wanthu wentse pakuwauza mafala yamweya. Munthu umweyu akufunira lini wanthuwa mtendere, koma tsoka.”
5 Mambo Zedekiya adawatawira kuti: “Iye ali m’manja mwanu, pakuti mambo angacite lini ciri-centse cakukuletsani.”
6 Na tenepo, iwo adaphata Jeremiya acimuikha mu mcera wa Malikiya mwana wa mambo, omwe ukhali pafupi na Kintale ya Alindiri. Iwo adaikha Jeremiya mu mceramo mwakuphatisa basa bzingwe. Mu mceramo mukhalibe madzi koma matope yokha-yokha, ndipo Jeremiya adayamba kumira m’matopemo.
7 Ebedi-meleki wa ku Etiyopiya akhali mtsogoleri wa pa nyumba ya mambo ndipo adabva kuti Jeremiya waikhidwa mu mcera. Pomwe mambo akhadakhala pa Cipata ca Benjamini,
8 Ebedi-meleki adacoka pa nyumba ya mambo acikalewalewa na mamboyo kuti:
9 “Imwe mbuya wangu mambo, bzomwe wanthuwa akumucita mprofeta Jeremiya mpsakuipa kwene-kwene. Iwo amuthusa mu mcera ndipo iye anifa mom’mule na njala, pakuti mu mzinda muno mulibe cakudya.”
10 Tenepo mambo adauza Ebedi-meleki wa ku Etiyopiya kuti: “Tenga amuna 30 ndipo mukacose mprofeta Jeremiyayo mu mceramo pomwe akanati kufa.”
11 Tenepo Ebedi-meleki adatenga amunawo ndipo adapita nawo m’nyumba ya mambo, m’cipinda comwe cikhali pantsi pa mbuto yakukoyera cuma. Kumweko adakatenga ntsanza na mausakala acikayapitisa mu mcera momwe mukhana Jeremiya mwakuphatisa basa bzingwe.
12 Patsogolo pace, Ebedi-meleki wa ku Etiyopiya adauza Jeremiya kuti: “Ndaphata minyendo, tenga ntsanza na mausakalaya, ubzikulungire ku bzingwebzo ndipo ubzimangirire m’phwaphwa.” Jeremiya adacitadi bzimwebzo,
13 ndipo iwo adapfuwa Jeremiyayo na bzingwebzo acimucosa mu mceramo. Jeremiya adapitiriza kukhala mu Kintale ya Alindiri.
14 Mambo Zedekiya adatuma wanthu kuti akacemere mprofeta Jeremiya kuti abwere kuna iye pa msuwo wacitatu wa pa nyumba ya Yahova. Pomwe Jeremiya adafika, mamboyo adamuuza kuti: “Nin’funa kukubvunza cinthu cinango, tsono uleke kundibisira ciri-centse.”
15 Tenepo Jeremiya adauza Zedekiya kuti: “Ndikakuuzani, kulewa cadidi imwepo mun’ndipha, ndipo ndikakupasani malango, imwepo mun’ndibvera lini.”
16 Tenepo mambo Zedekiya adalumbira kwa Jeremiya mwacintsintsi kuti: “Pana Yahova Mulungu wamoyo, omwe adatipasa moyoyu, inepano nin’kupha lini ndipo nin’kupereka lini m’manja mwa wanthu omwe an’funa kukuphawa.”
17 Jeremiya adauza Zedekiya kuti: “Yahova Mulungu wa anyankhondo, Mulungu wa Jirayeri walewa kuti: ‘Mukabzipereka m’manja* mwa nduna za mambo wa ku Babiloniya, mun’dzapitiriza kukhala na moyo ndipo mzindayu un’tenthedwa lini na moto, ndipo imwepo na mabanja yanu mun’pitiriza kukhala na moyo.
18 Tsono mukasaya kubzipereka* m’manja mwa nduna za mambo wa ku Babiloniya, mzindayu un’dzaperekedwa m’manja mwa Akalideya, iwo an’dzautentha na moto ndipo imwepo mun’dzapulumuka lini m’manja mwawo.’”
19 Patsogolo pace mambo Zedekiya adauza Jeremiya kuti: “Ndina mantha na Adjuda omwe aphatana na Akalideya, pakuti ndikaperekedwa kwa iwo, pinango iwo angandicite bzinthu bzakuipa.”
20 Tsono Jeremiya adamutawira kuti: “Imwepo mun’dzaperekedwa lini m’manja mwawo. Ndaphata minyendo, ndobverani fala la Yahova mwakucita bzomwe inepano ndikukuuzani, bzinthu bzin’dzakufambirani bwino ndipo mun’dzapitiriza kukhala na moyo.
21 Tsono mukalamba kubzipereka,* Yahova wandiuza ibzi:
22 Ndikuwona akazi wentse omwe adasala pamui pa mambo wa Djuda akuyendesedwa kunja kwa nduna za mambo wa ku Babiloniya, ndipo akaziwo akulewa kuti:‘Amuna omwe ukhawathemba, akupumpsa ndipo akukunda.
Acitisa kuti minyendo yako imire m’matope.
Tsapano iwo akuzungunukira acikuthawa.’
23 Iwo akutenga azikazi wanu na wana wanu ndipo akuyenda nawo kwa Akalideya. Imwepo mun’dzapulumuka lini m’manja mwawo, koma mun’dzaphatidwa na mambo wa ku Babiloniya ndipo mzindayu un’dzatenthedwa thangwe ra imwepo.”
24 Tenepo Zedekiya adauza Jeremiya kuti: “Leka kuuza munthu ali-wentse bzimwebzi kuti uleke kufa.
25 Nduna zikadziwa kuti ndalewalewa nawe zicibwera kudzakuuza kuti: ‘Taphata minyendo, tiuze bzomwe wauza mambo. Leka kutibisira ciri-centse ndipo tin’kupha lini. Kodi mambo wakuuza ciyani?’
26 Iwepo uzitawire kuti: ‘Inepano ndikhakumbira mambo kuti aleke kundiyendesa pomwe kumui kwa Jewonatani thangwe ningakafere kumweko.’”
27 Pomwe padapita nthawe, nduna zentse zidayenda kwa Jeremiya kuti zikamubvunze. Iye adaziuza bzentse bzomwe mambo akhadamuuza, ndipo ziribe kumubvunza pomwe bzinthu bzinango, thangwe palibe ne na m’bodzi wa iwo omwe akhadabva bzomwe adaceza.
28 Jeremiya adapitiriza kukhala mu Kintale ya Alindiri mpaka pa ntsiku yomwe Jeruzalemu adapfudzidwa. Iye akhali pamwepo pa nthawe yomwe Jeruzalemu adapfudzidwa.
Mafala ya m'nyantsi
^ Ayai, “matenda.”
^ Mafala yace caiyo: “mukayenda.”
^ Mafala yace caiyo: “mukasaya kuyenda.”
^ Mafala yace caiyo: “mukalamba kucoka.”
