Jeremiya 39:1-18
39 Mu gole laci 9, mu mwezi waci 10 wa utongi bwa Zedekiya mambo wa Djuda, Nabukadinazori* mambo wa ku Babiloniya pabodzi na acikunda wace wentse adafika mu mzinda wa Jeruzalemu ndipo adauzungulira.
2 Mu gole laci 11 la utongi bwa Zedekiya, mu mwezi wacinai, pa ntsiku yaci 9 ya mweziyo, iwo adabowola muro wa mzindayo.
3 Ndipo nduna zentse za mambo wa ku Babiloniya zidapita zicikhala pa Cipata Capakati. Iwo akhali Nerigali-sarezeri omwe akhali Samugari, Nebo-Sarisekimu omwe akhali Rabisarisi,* Nerigali-sarezeri omwe akhali Rabimagi* pabodzi na nduna zentse za mambo wa ku Babiloniya.
4 Pomwe Zedekiya mambo wa Djuda na acikunda wentse adawawona, iwo adathawa acibula mu mzindamo usiku na njira ya ku zunde la mambo, pa cipata comwe ciri pakati pa mimuro miwiri ndipo adayendera ku njira ya ku Araba.
5 Tsono acikunda wa Akalideya adawathamangisa, ndipo adagumana Zedekiya mu cigwa ca* Jeriko. Iwo adamuphata ndipo adayenda naye kwa Nabukadinazori* mambo wa ku Babiloniya ku Ribila m’dziko la Hamate, komwe adakamutonga acimupasa nyathwa.
6 Mambo wa ku Babiloniya adatonga kuti wana wa Zedekiya aphedwe ku Ribila pomwe iye akuwona, ndipo iye adatongambo kuti wanthu wakulemekezeka wentse wa ku Djuda aphedwe.
7 Patsogolo pace adabowola maso ya Zedekiya acimumanga na makorenti ya kobre* kuti ayende nayo ku Babiloniya.
8 Tenepo Akalideya adatentha nyumba ya mambo na nyumba za wanthu, ndipo adagwesa muro wa Jeruzalemu.
9 Nebuzaradani mkulu wa alindiri adatenga wanthu omwe akhadasiidwa mu mzindamo na wanthu omwe akhadathawira ku mbali yace pabodzi na wentse omwe akhadapulumuka, aciyenda nawo ku ukapolo ku Babiloniya.
10 Tsono Nebuzaradani mkulu wa alindiri adasiya m’dziko la Djuda wanthu winango omwe akhadasauka kwene-kwene, omwe akhalibe na cinthuco. Ndipo pa ntsikuyo, iye adawapasa minda ya uva na minda inango kuti alime.*
11 Nabukadinazori* mambo wa ku Babiloniya, adapasa Nebuzaradani mkulu wa acikunda mtemo pakulewa bza Jeremiya wakuti:
12 “Ndokoni mukamutenge ndipo mumusamalire. Lekani kumucita cakuipa. Citani ciri-centse comwe iye akumbire.”
13 Tenepo Nebuzaradani mkulu wa alindiri, Nebusazibani omwe akhali Rabisarisi,* Nerigali-sarezeri omwe akhali Rabimagi* pabodzi na akulu-akulu wentse wa mambo wa ku Babiloniya adatuma wanthu
14 kuti akacose Jeremiya mu Kintale ya Alindiri ndipo adam’pereka kwa Gedaliya mwana wa Ahikamu, mwana wa Safani kuti ayende naye kumui kwace. Tenepo Jeremiya adakhala pabodzi na wanthu winango.
15 Pomwe Jeremiya akhali mu Kintale ya Alindiri, Yahova adalewalewa naye acimuuza kuti:
16 “Ndoko ukauze Ebedi-meleki wa ku Etiyopiya kuti: ‘Yahova wa anyankhondo, Mulungu wa Jirayeri walewa kuti: “Nin’teweza mafala yangu yakulewa bza tsoka lomwe ndidalewa kuti linicitikira mzindayu sikuti bzabwino, ndipo pa ntsikuyo iwepo un’dzawona bzimwebzi bzikucitika.”’
17 “‘Tsono nin’dzakupulumusa pa ntsikuyo ndipo un’dzaperekedwa lini m’manja mwa wanthu omwe ukuwagopawo,’ walewa tenepo Yahova.
18 “‘Pakuti kulewa cadidi nin’dzakupulumusa ndipo un’dzafa lini na xipada. Moyo wako un’dzakhala ninga mabaibai* pakuti wandithemba,’ walewa tenepo Yahova.”
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “Nerigali-sarezeri, Samugari-nebo, Sarisekimu, Rabisarisi,” pakutewezera kalewedwe kanango m’Cihebereu.
^ Ayai, “mkulu wa anyakucita matsenga (anyakukhulupira nyenyezi).”
^ Ayai, “gowa la.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “mkuwa.”
^ Ayai pinango, “kuti awaphatise basa mwacibalo.”
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “nduna ikulu.”
^ Ayai, “mkulu wa anyakucita matsenga (anyakukhulupira nyenyezi).”
^ Ayai, “un’dzapulumusa moyo wako.”
