Jeremiya 40:1-16
40 Yahova adalewalewa na Jeremiya, pomwe Nebuzaradani mkulu wa alindiri akhadamutsudzula ku Rama. Iye akhadayendesa Jeremiya kumweko adamangidwa na njema ndipo Jeremiya akhali pakati pa wanthu wa ku Jeruzalemu na ku Djuda omwe akhayendesedwa ku ukapolo ku Babiloniya.
2 Na tenepo mkulu wa alindiri adatenga Jeremiya aciyenda naye pambali acikamuuza kuti: “Yahova Mulungu wako akhadalewa kale bza tsoka lomwe likucitika pa mbuto ino,
3 ndipo Yahova walibweresa ninga momwe iye akhadalewera thangwe imwepo mudaphonyera Yahova ndipo mulibe kubvera fala lace. Ndipopa bzimwebzi bzakucitikirani.
4 Tsapano nin’kutsudzula njema zomwe ziri m’manja mwako. Penu iwepo un’funa, mbatiyende pabodzi ku Babiloniya ndipo inepano nin’kakusamalira. Tsono penu un’funa lini kuyenda pabodzi na ine ku Babiloniya, sala. Ona dziko lentseneli. Ndoko komwe iwepo un’funa.”
5 Pomwe Jeremiya akhanati kubwerera, Nebuzaradani adamuuza kuti: “Bwerera kwa Gedaliya mwana wa Ahikamu mwana wa Safani, omwe mambo wa ku Babiloniya adamuikha kuti ambanyang’anire mizinda ya Djuda ndipo ukakhale naye kumweko pabodzi na wanthu ayai ndoko kuli-kwentse komwe ungafune.”
Tenepo mkulu wa alindiri adamupasa bzakudya na mphaso ndipo adamusiya kuti ayende.
6 Tenepo Jeremiya adayenda kwa Gedaliya mwana wa Ahikamu ku Mizipa ndipo adakhala kumweko na iye pabodzi na wanthu omwe akhadasala m’dzikolo.
7 Na kupita kwa nthawe, atsogoleri wentse wa acikunda omwe akhali m’thengo pabodzi na acikunda wawo adabva kuti mambo wa ku Babiloniya akhadaikha Gedaliya mwana wa Ahikamu kuti ambanyang’anire dzikolo nakuti ambanyang’anirembo amuna, akazi na wana wakusauka m’dzikolo omwe akhalibe kuyendesedwa ku Babiloniya.
8 Tenepo iwo adayenda kukagumana na Gedaliya ku Mizipa. Iwo akhali Jumayeri mwana wa Netaniya, Johanani na Jonatani wana wa Kareya, Seraiya mwana wa Tanihumeti, wana wa Efai wa ku Netofa na Jezaniya mwana wa Maakati pabodzi na acikunda wawo.
9 Gedaliya mwana wa Ahikamu, mwana wa Safani, adalumbira kwa iwo na kwa acikunda wawo mwakuwauza kuti: “Lekani kugopa kutumikira Akalideya. Khalani m’dziko lino ndipo tumikirani mambo wa ku Babiloniya ndipo bzentse bzin’dzakufambirani bwino.
10 Ine nin’dzakhala ku Mizipa ninga muimikiri wanu kuna Akalideya omwe an’dzabwera kuna ife. Tsono imwepo mun’funika kukonkhobza vinyu, bzisapo bza m’cirimo na mafuta na kubzikoya m’bzombo mucikakhala m’mizinda yomwe mudaitenga.”
11 Tsono Adjuda wentse omwe akhali ku Mowabe, ku Amoni, ku Edomu na m’madziko manango yentse adabvambo kuti mambo wa ku Babiloniya akhadasiya wanthu winango ku Djuda nakuti akhadaikhambo Gedaliya mwana wa Ahikamu mwana wa Safani kuti ambawanyang’anire.
12 Tenepo Adjuda wentse adayamba kubwerera kucokera ku mbuto zentse zomwe akhadawabalalisira. Iwo adapita m’dziko la Djuda ndipo adayenda ku Mizipa kukawonana na Gedaliya. Iwo adakonkhobza vinyu na bzisapo bza m’cirimo bzizinji kwene-kwene.
13 Johanani mwana wa Kareya na atsogoleri wentse wa acikunda omwe akhali m’thengo, adayenda kwa Gedaliya ku Mizipa.
14 Iwo adamuuza kuti: “Kodi imwepo mukudziwa lini kuti Baalisi mambo wa Amoni watuma Jumayeri mwana wa Netaniya kuti adzakupheni?” Tsono Gedaliya mwana wa Ahikamu alibe kuwakhulupira.
15 Tenepo Johanani mwana wa Kareya adauza Gedaliya pambali ku Mizipa kuti: “Nin’funa kukapha Jumayeri mwana wa Netaniya ndipo palibe omwe an’dzadziwa bzimwebzi. Thangwe ranyi iye an’funa kukuphani imwepo? Thangwe ranyi wanthu wentse wa ku Djuda omwe akubwera kudzaphatana namwe an’funika kubalalisidwa pomwe? Ndipo thangwe ranyi anyakusala wa ku Djuda an’funika kudzaphedwa?”
16 Tsono Gedaliya mwana wa Ahikamu adauza Johanani mwana wa Kareya kuti: “Leka kucita bzimwebzo, pakuti bzomwe iwepo ukulewa pakulewa bza Jumayeri mpsakunama.”
