Jeremiya 41:1-18
41 Mu mwezi waci 7, mu utongi bwa Jumayeri mwana wa Netaniya, mzukulu wa Elixama omwe akhali wa dzinza la mambo na m’bodzi wa nduna za mambo, adayenda ku Mizipa pabodzi na amuna 10 kuti akawonane na Gedaliya mwana wa Ahikamu. Pomwe akhadya pabodzi ku Mizipa,
2 Jumayeri mwana wa Netaniya pabodzi na amuna 10 omwe akhanawo pabodzi wale, adalamuka acipha na xipada Gedaliya mwana wa Ahikamu, mzukulu wa Safani. Na tenepo iye adapha ule omwe mambo wa Babiloniya akhadamusankhula kuti anyang’anire dzikolo.
3 Jumayeri adapha pomwe Adjuda wentse omwe akhali pabodzi na Gedaliya ku Mizipa na acikunda wa Akalideya omwe akhali kumweko.
4 Mangwana yace,* pomwe palibe omwe akhadziwa kuti Gedaliya waphedwa,
5 adafika wanthu 80 kucokera ku Sekemu, ku Silo na ku Samariya. Iwo akhadagwata ndebvu, akhadabvala bzakubvala bzakung’ambika, akhadaceka-ceka mathupi yawo ndipo akhana ntsembe za bza m‘munda na ntsonono zakununtcira kuti akasiye pa nyumba ya Yahova.
6 Tenepo Jumayeri mwana wa Netaniya adacoka ku Mizipa kuti akagumane nawo ndipo pomwe akhayenda kumweko akhalira. Pomwe adagumana nawo, adawauza kuti: “ Mbatiyendeni kuna Gedaliya mwana wa Ahikamu.”
7 Tsono pomwe adapita mu mzindamo, Jumayeri mwana wa Netaniya pabodzi na anzace adapha amunawo aciwathusa mu mcera.
8 Koma wanthu 10 mwa amuna wale adauza Jumayeri kuti: “Lekani kutipha thangwe tina tirigu, sevada, mafuta na uci bzomwe tabzibisa m’thengo.” Tenepo iye alibe kuwapha ninga momwe akhadacitira na abale wawo.
9 Jumayeri adathusa mu mcera ukulu wanthu wentse omwe adawapha. Umweyu ukhali mcera omwe mambo Aza adakonza thangwe ra Baasa mambo wa Jirayeri. Ni mcera umweyu omwe Jumayeri mwana wa Netaniya adaudzaza na wanthu wakufa.
10 Jumayeri adatenga anyakusala wentse omwe akhali ku Mizipa kuphatanidzambo wana wacikazi wa mambo na wentse omwe akhadasiidwa ku Mizipa, omwe Nebuzaradani mkulu wa alindiri akhadawasiya m’manja mwa Gedaliya mwana wa Ahikamu. Jumayeri mwana wa Netaniya adawatenga ninga akapolo aciyenda nawo ku dziko la Amoni.
11 Pomwe Johanani mwana wa Kareya na atsogoleri wentse wa acikunda omwe akhanaye pabodzi adabva bzakuipa bzentse bzomwe Jumayeri mwana wa Netaniya adacita,
12 adatsonkhanisa amuna wentse ndipo adayenda kukamenyana na Jumayeri mwana wa Netaniya ndipo adagumana naye pa madzi mazinji* ku Gibiyoni.
13 Wanthu wentse omwe akhali pabodzi na Jumayeri adakomedwa kwene-kwene pomwe adagumana na Johanani mwana wa Kareya na atsogoleri wentse wa acikunda omwe akhanaye pabodzi.
14 Na tenepo wanthu wentse omwe Jumayeri akhadawatenga ninga akapolo ku Mizipa adazungunuka acibwerera pabodzi na Johanani mwana wa Kareya.
15 Tsono Jumayeri mwana wa Netaniya na amuna 8 omwe akhanaye pabodzi, adathawa Johanani aciyenda ku dziko la Amoni.
16 Johanani mwana wa Kareya na atsogoleri wentse wa acikunda omwe akhanaye pabodzi adatenga wanthu omwe akhadasala ku Mizipa, omwe iwo akhadawapulumusa m’manja mwa Jumayeri mwana wa Netaniya, pomwe Jumayeriyo adapha Gedaliya mwana wa Ahikamu. Iwo adatenga amuna, acikunda, akazi, wana na akulu-akulu wa pa nyumba ya mambo kucokera ku Gibiyoni.
17 Iwo adacoka ndipo adakafikira ku mbuto yakugona alendo ku Kimami pafupi na Betelehemu kuti ayende ku Edjipito
18 thangwe ra Akalideya. Iwo akhana mantha na Akalideyawo, pakuti Jumayeri mwana wa Netaniya akhadapha Gedaliya mwana wa Ahikamu, omwe mambo wa ku Babiloniya akhadamusankhula kuti anyang’anire dzikolo.
