Jeremiya 43:1-13
43 Pomwe Jeremiya adamala kuuza wanthu wentse mafala yentse ya Yahova Mulungu wawo, inde, fala libodzi na libodzi la Yahova Mulungu wawo, mafala yomwe akhadamuuza kuti akawauze,
2 Azariya mwana wa Hosaya, Johanani mwana wa Kareya na wanthu wentse wakubzikuza adauza Jeremiya kuti: “Bzomwe ukulewabzi mpsakunama. Yahova Mulungu wathu alibe kukutuma kuti udzatiuze kuti: ‘Muniyenda lini kukakhala ku Edjipito.’
3 Koma ni Baruki mwana wa Neriya, omwe akukupumpsa kuti ifepano tiperekedwe m’manja mwa Akalideya kuti tiphedwe ayai tiyendesedwe ku ukapolo ku Babiloniya.”
4 Tenepo Johanani mwana wa Kareya, atsogoleri wentse wa acikunda na wanthu wentse alibe kubvera lamulo la Yahova la kupitiriza kukhala mu Djuda.
5 M’mbuto mwace, Johanani mwana wa Kareya na atsogoleri wentse wa acikunda adatenga anyakusala wentse wa mu Djuda, omwe akhadabwerera kuti adzakhale m’dziko la Djuda wakucokera ku mitundu yentse ya wanthu ya komwe akhadabalalisidwira.
6 Adatenga amuna, akazi, wana, wana wacikazi wa mambo na wentse omwe Nebuzaradani mkulu wa alindiri akhadawasiya m’manja mwa Gedaliya mwana wa Ahikamu, mzukulu wa Safani. Adatengambo mprofeta Jeremiya na Baruki mwana wa Neriya.
7 Iwo adayenda ku Edjipito, pakuti alibe kubvera mafala ya Yahova ndipo adayenda mpaka ku Tapanesi.
8 Tsono ku Tapanesiko, Yahova adalewalewa na Jeremiya kuti:
9 “Tenga minyala nango mikulu-mikulu ndipo ukaiikhe padzulu pa matijolo pa msuwo pa nyumba ya Farawo ku Tapanesi ucikayampsinkha na mataka, ndipo ukacite bzimwebzi Adjuda akuwona.
10 Uwauze kuti: ‘Yahova wa anyankhondo, Mulungu wa Jirayeri walewa kuti: “Nin’cemera Nabukadinazori* ‘mtumiki wangu mambo wa ku Babiloniya, ndipo nin’dzaikha mpando wace wa umambo padzulu pa minyala yomwe ndaibisayi. Iye an’dzamanga tendi lace padzulu pa minyalayi.
11 Iye an’dzabwera kuti adzamenyane na dziko la Edjipito. Omwe an’funika kudzafa na matenda, an’dzafa na matendayo, omwe an’funika kuyenda ku ukapolo, an’dzayenda ku ukapoloko ndipo omwe an’funika kufa na xipada, an’dzafa na xipadayo.
12 Nin’dzatentha na moto nyumba za* mirungu ya ku Edjipito. Nabukadinazori an’dzatentha nyumbazo aciyendesa mirunguyo ku ukapolo. Iye an’dzaneseka lini kukunda dziko la Edjipito acicoka mwa mtendere* ninga momwe makabusa ambaneseka lini kubvala cakubvala cace.
13 Ndipo iye an’dzapfudza mapilare ya Beti-semesi* mu dziko la Edjipito, ndipo an’dzatentha na moto nyumba za* mirungu ya Edjipito.”’”
Mafala ya m'nyantsi
^ Mafala yace caiyo: “Nabukadirazori.” Kamweka ni kanembedwe kanango ka dzinali.
^ Ayai, “matemplo ya.”
^ Ayai, “mwakusaya kupwetekeka.”
^ Ayai, “Nyumba (Templo) ya Dzuwa,” bzomwe ni Heliyopolisi.
^ Ayai, “matemplo ya.”
