Jeremiya 44:1-30
44 Jeremiya adauzidwa mafala kuti akauze Adjuda wentse omwe akhakhala m’dziko la Edjipito, ku Migidoli, ku Tapanesi, ku Nofi* na ku Patrosi yakuti:
2 “Yahova wa anyankhondo, Mulungu wa Jirayeri walewa kuti: ‘Mwawona matsoka yentse yomwe ndabweresera Jeruzalemu na mizinda yentse ya Djuda, ndipo lero iyo ni matere yakusaya kukhalidwa na wanthu.
3 Bzimwebzi bzacitika thangwe ra bzinthu bzakuipa bzomwe iwo adacita kuti andikalipise, mwakupereka ntsembe na kutumikira mirungu inango yomwe iwo, imwepo ne makolo yanu yakale ambaidziwa lini.
4 Ine ndikhakutumizirani atumiki wangu wentse omwe ni aprofeta, ndikhawatuma mwakubwereza-bwereza* ndicimbalewa kuti: “Ndaphata minyendo, lekani kucita bzinthu bzakunyantsabzi bzomwe ine nimbabziwenga.”
5 Tsono iwo alibe kundibvera ne kunditetekera kuti asiye bzicito bzawo bzakuipa, mwakuleka kupereka ntsembe kwa mirungu inango.
6 Ndipopa ndidakhuthula ukali bwangu na ciya cangu, bzomwe bzidatentha mizinda ya Djuda na miseu ya Jeruzalemu, ndipo iyo idapfudzidwa icikhala matere ninga momwe bziriri lero.’
7 “Yahova Mulungu wa anyankhondo, Mulungu wa Jirayeri walewa kuti: ‘Thangwe ranyi imwepo mukubzibweresera tsoka likululi mucicitisa kuti amuna wentse, akazi, wana na matcece apfudzidwe mu Djuda pacisaya kuwoneka munthu wakusala?
8 Thangwe ranyi imwepo mwandikalipisa na mabasa ya manja yanu, mwakupereka ntsembe kwa mirungu inango ya ku dziko la Edjipito, dziko lomwe mudayenda kukakhala? Imwepo munifa ndipo mun’khala cinthu cakuthemera kutembereredwa na cinthu cakuthemera kutukwanidwa pakati pa mitundu yentse ya pa dziko la pantsi.
9 Kodi imwepo mwayebwa bzakuipa bzomwe adacita makolo yanu yakale, bzakuipa bza amambo wa Djuda, bzakuipa bza azikazawo kuphatanidzambo bzakuipa bzanu na bza azikazanu bzomwe bzidacitika mu dziko la Djuda na m’miseu ya Jeruzalemu?
10 Mpaka lero imwepo mulibe kubzicepesa* ne kugopa ne kufamba mwakubverana na malamulo yangu na mitemo yangu, yomwe ndidapasa imwepo na makolo yanu yakale.’
11 “Yahova wa anyankhondo, Mulungu wa Jirayeri walewa kuti: ‘Ndatsimikiza kukubwereserani tsoka lomwe lin’pfudza wanthu wentse wa mu Djuda.
12 Ndipo nin’dzatenga anyakusala wa Djuda omwe akhafuna kuyenda kukakhala ku dziko la Edjipito ndipo wentsenewo an’dzafera ku Edjipitoko. Iwo an’dzaphedwa na xipada ndipo an’dzafa na njala. Kuyambira mng’ono mpaka mkulu an’dzaphedwa na xipada ndipo an’dzafa na njala. Iwo an’dzakhala cinthu cakuthemera kutembereredwa, cinthu cakuthemera kugopedwa na cinthu cakuthemera kunyozedwa na kutukwanidwa.
13 Nin’dzalanga wanthu wa mu dziko la Edjipito, ninga momwe ndidalangira wanthu wa ku Jeruzalemu na xipada, njala na cisi.*
14 Ndipo anyakusala wa Djuda omwe adayenda kukakhala ku Edjipito, an’dzathawa lini ne kupulumuka kuti abwerere pomwe ku dziko la Djuda. Iwo an’dzafunisisa kubwerera kuti akakhale pomwe kumweko, koma an’dzabwerera lini, kusiya winango omwe adabwerera kumweko akuthawa.’”
15 Amuna wentse omwe akhadziwa kuti azikazawo akhambapereka ntsembe kwa mirungu inango na akazi wentse omwe akhali kumweko acikhala thimu likulu, pabodzi na wanthu wentse omwe akhakhala ku Patrosi ku dziko la Edjipito, adatawira Jeremiya kuti:
16 “Mafala yomwe watiuzaya m’dzina la Yahova, ifepano tiniyatetekera lini.
17 M’mbuto mwace, ifepano tin’teweza mafala yentse yomwe yan’coka pamulomo pathu. Tin’pereka ntsembe kwa Mambo Wacikazi wa Kudzulu* na kumuthululira ntsembe ya vinyu, ninga momwe ifepano, makolo yathu yakale, amambo wathu na nduna zathu tidacitira m’mizinda ya Djuda na m’miseu ya Jeruzalemu, pomwe tikhana cakudya cizinji ndipo tikhasaya lini cinthu ciri-centse na pomwe tikhawona lini tsoka liri-lentse.
18 Pomwe tidasiya kupereka ntsembe kwa Mambo Wacikazi wa Kudzulu* na kumuthululira ntsembe ya vinyu, tidayamba kusaya bzentse ndipo tidaphedwa na xipada na njala.”
19 Akazi adalewambo kuti: “Ndipo pomwe tikhapereka ntsembe kwa Mambo Wacikazi wa Kudzulu* na kumuthululira ntsembe ya vinyu, kodi tikhabvumizidwa lini na azibayathu kuti timukonzere mabolo yakundendemerana na cithunzi-thunzi cace na kumuthululira ntsembe ya vinyu?”
20 Tenepo Jeremiya adauza wanthu wentse, amuna, azikazawo na wanthu wentse omwe akhalewalewa na iye kuti:
21 “Pakulewa bza ntsembe zomwe imwepo, makolo yanu yakale, amambo wanu, nduna zanu na za wanthu zomwe mudazipereka m’mizinda ya Djuda na m’miseu ya Jeruzalemu, Yahova wazikumbukira ndipo zamubwerera m’makumbukidwe mwace.
22 Pakumalizira pace, Yahova an’kwanisa lini kupitiriza kupirira bzicito bzanu bzakuipa na bzinthu bzakunyantsa bzomwe mukhacita, ndipo dziko lanu lapfudzidwa, lakhala cinthu cakupasa mantha, cinthu cakuthemera kutembereredwa na lakusaya kukhalidwa na wanthu ninga momwe bziriri lero.
23 Pakuti mudapereka ntsembezi muciphonyera Yahova, mwakusiya kubvera mafala ya Yahova na kufamba mwakubverana na malamulo yace, mitemo yace na mcenjezo wace, tsokali lakubwererani ninga momwe bziriri lero.”
24 Jeremiya adapitiriza kuuza wanthu wentse na akazi wentse kuti: “Imwe Adjuda mwentse omwe mukukhala m’dziko la Edjipito, tetekerani mafala ya Yahova.
25 Yahova wa anyankhondo, Mulungu wa Jirayeri walewa kuti: ‘Bzomwe imwepo na azikazanu mwalewa na miromo yanu, mwabzicita na manja yanu pakuti mwalewa kuti: “Tin’dzacita bzomwe tidalumbira bzakupereka ntsembe kwa Mambo Wacikazi wa Kudzulu* na kumuthululira ntsembe ya vinyu.” Imwepo akazimwe mun’dzapitiriza kuteweza lumbiro lanu na kucita bzomwe mudapicira.’
26 “Tenepo imwe Adjuda mwentse omwe mukukhala m’dziko la Edjipito, tetekerani mafala ya Yahova yakuti: ‘“Ndikulumbira m’dzina langu likulu,” walewa tenepo Yahova, “kuti m’dziko lentse la Edjipito palibe munthu wa ku Djuda omwe an’dzalumbira mwakuphatisa basa dzina langu acilewa kuti: ‘Pana Mulungu wamoyo, Yahova Mbuya Mkululetu.’
27 Ndakonzeka kuwabweresera tsoka, sikuti cinthu cabwino. Wanthu wentse wa ku Djuda omwe akukhala m’dziko la Edjipito an’dzaphedwa na xipada na njala mpaka wentse kumala.
28 Wanthu ang’ono-ng’ono okha ndiwo omwe an’dzapulumuka na xipada, ndipo an’dzabwerera ku Djuda kucokera ku dziko la Edjipito. Tenepo wanthu wentse wakusala wa Djuda, omwe adabwera kudzakhala m’dziko la Edjipito an’dzadziwa kuti ni mafala ya mbani yomwe yadakwanisika, penu ni yangu ayai yawo.”’”
29 Yahova walewa kuti: “‘Ndikukupasani cizindikiro ici cakuti nin’dzakulangani pa mbuto ino, kuti mudziwe kuti piciro langu lakukubwereserani tsoka lin’dzakwanisika.
30 Yahova walewa kuti: “Farawo Hofara mambo wa Edjipito nin’dzamupereka m’manja mwa anyamadulanthaka wace na mwa omwe akumunyang’ana kuti amuphe, ninga momwe ndidaperekera Zedekiya mambo wa Djuda m’manja mwa Nabukadinazori* mambo wa ku Babiloniya, omwe akhali nyamadulanthaka wace na omwe akhamunyang’ana kuti amuphe.”’”
Mafala ya m'nyantsi
^ Ayai, “Mefi.”
^ Mafala yace caiyo: “nimbamuka macibese kuti ndilewelewe namwe.”
^ Ayai, “kubzipasa mulandu.”
^ Ayai, “matenda.”
^ Limweri ni dzina la mulungu wacikazi omwe Ajirayeri wakupanduka akhamunamata, pinango-pentse mulungu wacikazi wamphanvu zakuberekesa.
^ Limweri ni dzina la mulungu wacikazi omwe Ajirayeri wakupanduka akhamunamata, pinango-pentse mulungu wacikazi wamphanvu zakuberekesa.
^ Limweri ni dzina la mulungu wacikazi omwe Ajirayeri wakupanduka akhamunamata, pinango-pentse mulungu wacikazi wamphanvu zakuberekesa.
^ Limweri ni dzina la mulungu wacikazi omwe Ajirayeri wakupanduka akhamunamata, pinango-pentse mulungu wacikazi wamphanvu zakuberekesa.
^ Mafala yace caiyo: “Nabukadirazori.” Kamweka ni kanembedwe kanango ka dzinali.
